ROMA 11:25 - Tanou Moonsoi Timugon

²⁵ Pabukat kau ngaangai', mapaintutun aku ramuyun ra katapatan ondo' kalo igondo' pinabala', maa' ra akau makapandai no, kalo boo lumimbau kau. Gitio noyo katapatan i; kalo mantilayun ulun ru Israil mokotog ulu, kaa' polos ayuk ra morontop noyo suang ru ulun sala' ka Jaudi matong ri Aki Kapuuno'.

ROMA 11:25 ပူးပေါင်းရင်းမြစ်များ

MAZMUR 107:43

Gama' ru ulun mapintar mangkara' ra baal raginio, gama' ru karaan nilo togom ru Tuhan.

MAZMUR 127:1

Rimbai ru ratangan ri Raja' Salomo. Amon ru sala' ka Tuhan no mambaal ra baloi, banangan ayuk kandoi ru ulun-ulun mangngandoi; amon ru sala' ka Tuhan no manindung ra bandar, banangan ayuk ru ulun-ulun mantatamung no mangandoi.

MAZMUR 22:27

Ulun balabag mangkan am maasug; ilo ondo' matong ra Tuhan mongompor Riso. Gama' lumangkaya' ilo ra sabubuoi no!

MAZMUR 72:17

Gama' ru sabuoi-buoi no inggalan ru raja' karaan, am sasabiton inggalan nano mantilayun koson mato ru orou. Gama' ru ngaangai' bansa' makibarakat koson ra raja', am ngaangai' ulun manabit ra raja' makakaansukan.

AMSAL 26:12

Sasambungon pana ulun, sala' ka koson ra kinasambung ru ulun ondo' mangkara' ra io mapintar, sotopot no kalo.

AMSAL 26:16

Ulun matiar no mangkara' io mapandai poyo ka tulu' ngaulun ondo' nakataam ra natimpok.

JISAYA 5:21

Aibui boo ramuyun! Pangkaraan min, mapintar kau am mapandai toojo!

GOSIA 14:9

Ulun ru Israil mamatir ra ngaangai' sinungkalalaing; iowon Ku pakiasian nilo am magalung risilo. Koson ra puun tataun sumansam ayuk sindungin Ku ilo; Aku noyo puun ru ngaangai' barakat nilo.”

MATIUS 13:11

Taam i Jisus, “Binalaan kano ondo' kalo igondo' pinabala' ra ati kulaan i Aki Kapuuno' mamarinta, kaa' ulun masuang no kalo.

LUKAS 21:24

Mokoondo' ulun potoyon ra ilang, am mokoondo' poyo ibiton am uliponon ra ati ayuk pagun ra bokon; am bandar Jirusalim kikinjangin ru bansa' ondo' kalo makaulig ri Aki Kapuuno' saboi paat ra inaru' no risilo maukop.”

JUANIS 10:16

Mokoondo' Aku poyo ra domba-domba ra bokon ondo' kalo nakaaya' ra tayar ragitio. Ilo pana musiti' Ku ibiton, am mokorongog ilo boo ra bolos Kuno. Ilo ti simpungon Ku am rondo' ayuk magagalung risilo.

ROMA 1:13

Pabukat kau ngaangai', masaga' aku makapandai kau ra ingkula' noyo aku pangatang mongoi ramuyun, kaa' masalok mokoondo' ayuk mongompong raki'. Moogot aku magibit ra ulun ra intok mino mangintopot ri Kristus, mogondo' ra ulun sala' ka Jaudi ra intok ra bokon.

ROMA 11:12

Sabap ra tula ru ulun ru Jaudi no ulun-ulun ru tana' ti binarakat ri Aki Kapuuno', am sabap ra pangintapatan ru ulun ru Jaudi malawo, barakat ra ulun sala' ka Jaudi mauli'. Amon ru koson poyo raginio, mulu' poyo barakat ri Aki Kapuuno' ra ulun ru Jaudi no paat ra ilo ngai' sumaguli' Riso.

ROMA 11:24

Akau ulun sala' ka Jaudi, koson ra raan puun jaitun lumayau ondo' pinakapit ra puun jaitun tinanom. Ginio kalo niayuk maya' ra kaindalaman. Atan poyo ulun ru Jaudi ondo' koson ra raan puun jaitun tinanom no? Maaru' maluoi i Aki Kapuuno' mampatapuli' risilo ra puun kopoyo.

ROMA 12:16

Kaayag kano ra rondo' guang ra rondo' am bokon. Pai' pampaguang ra akau ti maatang, kaa' latok kano ra ulun musikin. Pai' pangkara' ra akau ti poyo mapintar.

ROMA 16:25

Omporo' noyo i Aki Kapuuno'! Makakuasa' Io mampaikang ra pangintapatan mino sumugut ra Tanou Moonsoi intor ri Jisus Kristus ondo' pinabala' kuno ramuyun. Ginio potonowon kuno sumugut ra ondo' pinaintalang noyo ri Aki Kapuuno' raki', ioginio katapatan ondo' kalo igondo' pinabala' intor ra galing i.

ROMA 9:18

Ginio nai ra, amon ru masaga' i Aki Kapuuno' makaasi' ra sasangulun, ginio baalon No. Am poyo, amon ru masaga' Io mambaal ra sasangulun mokotog ulu, ginio baalon No.

1 KORINTUS 10:1

Pabukat kau ngaangai', masaga' aku mampakara' ramuyun ra ondo' nasauk ra kinamatuaan takali paat ra nangkiralanan nilai mabaya' ri Musa. Ngaangai' nilo kinulumput ru gaun am namuntana' liminaup ra Raat Malia' i.

1 KORINTUS 12:1

Raino mambala' aku ati kulaan taak intor ra Ambiluo ri Aki Kapuuno'. Pabukat kau ngaangai', masaga' aku ra akau makatutun toojo ra atan sotopot no taak raginio.

1 KORINTUS 2:7

Kapintaran ra rinagu kuli io no kapintaran intor ri Aki Kapuuno', ondo' kalo igondo' pinabala'. Ginio nga ra kalo poyo biningkal tana' ti, pinongo noyo ri Aki Kapuuno' kapintaran Nano koson itakau pana katulayon.

1 KORINTUS 4:1

Karaa' min noyo ra akai ti ulipon ri Kristus. Akai ti noyo inanian ra kandoi mampatanou ra katapatan ri Aki Kapuuno' ondo' kalo igondo' pinabala'.

IPISUS 1:9

Itakau noyo napaintalangan no ra ondo' kalo igondo' pinabala', ioginio inatang no kalalair i, koson ralalom ri Kristus ginio pinongo.

IPISUS 3:9

Mampakito aku ra ngaangai' ulun ra inatang ri Aki Kapuuno' ondo' kalo igondo' pinabala' ti. Nga Io ondo' nampasauk ra ngaangai' limbowon am tana' ti, kalo nambala' Io ra inatang Nano intor ragili.

IPISUS 4:18

Pangaratian nilo pana molondom. Kalo niayuk nakaliman ilo ra kaayagan ondo' taakin ri Aki Kapuuno', sabap ra kalo masaga' ilo mintutun am mokotog toojo ulu nilo.

2 PITRUS 3:8

Kaa' pabukat kau ngai' ondo' tagamin ku, pai' min liliani' gitio, songorou ra pangkaraan ru Tuhan mogondo' ayuk ra buoi saribu ngambilor am saribu ngambilor mogondo' ayuk ra buoi songorou; karuruo no mogondo' ayuk Riso.

PINAINTALANG 1:20

Gitio noyo arati' ru tulu' butitin ondo' makito muno ra kalindu' pamiris Kutu, am intor ra tulu' tampakan ra lampung binaal intor ra mas no: Tulu' butitin raginio iono malaikat ru tulu' pasimpungan ulun Kristian no, am tulu' tampakan ra lampung no ioginio tulu' pasimpungan ulun Kristian.”

PINAINTALANG 10:7

Paat ra malaikat katulu' no manamput ra bujung, pasaukon ri Aki Kapuuno' inatangan ondo' sinibuni Nano, ondo' pinabala' noyo ra galing i ra nabi-nabi, ioginio ulipon-ulipon Nano.”

PINAINTALANG 11:15

Samputi' boo ru malaikat katulu' no bujung. Bolos-bolos mosongou morongog giu' ra suruga', konilo, “Kuasa' mamarinta ra tana' ti soroi raino ra Tuhan takau am ra Mamamayag Nano. Mamarinta Io ra sabuoi-buoi no!”

PINAINTALANG 7:9

Kopongo raginio, kakito ku poyo rondo' tinimungan ru ulun masuang ondo' kalo maalap ra untob ru osoi ayuk pana! Ilo ti intor ra ngaangai' bansa', papag, pagun am ragu. Am minigor ilo ra saang ru Io ondo' nanturung ra takhta am ra Anak Domba no. Nambayang ilo ra sukub ra mapulak am nampaguut ra raun palma.