RINALATAN 8:14 - Tanou Moonsoi Timugon

¹⁴ Kaining boo rasul-rasul ru Jirusalim ra ulun Samaria nangapu ra Tanou Moonsoi, susubo' nilo boo i Pitrus am i Juanis minongoi ra giu' i.

RINALATAN 8:14 ပူးပေါင်းရင်းမြစ်များ

1 RAJA'-RAJA' 13:32

Ragu ru Tuhan ondo' pinasaboi nano ra altar giu' ra Bitil no am ngaangai' intok sambayangan giu' ra bandar-bandar ru Samaria maaru' masauk.”

MATIUS 13:23

Sampug ondo' nakatias ra tana' malabung no koson ra ulun ondo' mangkirongog ra tanou no am makarati' ilo. Mangkakawa' ilo, mokoondo' mangkawa' ra maatus ruli' no, mokoondo' onom ngoopor am bokon no talu ngoopor.”

LUKAS 22:8

Panusub i Jisus ri Pitrus am i Juanis, indagu Io, “Ongoyo' min pongoono' kalalair intok pagakanan takau ra Paska.”

JUANIS 12:48

Osoi ayuk manginggi' Raki' am ragu Kuno, mokoondo' noyo mangakim riso. Ragu ondo' pinasaboi Kuli mangakim riso ra Orou Pupus.

RINALATAN 11:1

Rasul am ngaangai' ulun nangintopot ra ati ayuk ra Judia nakaining ra ulun sala' ka Jaudi nokoowot ra bala' ri Aki Kapuuno'.

RINALATAN 15:4

Pakasaboi ilo ra Jirusalim, inuma' ilo ru ulun Kristian, rasul-rasul am niayuk tingganai ru pasimpungan ulun Kristian. Ginio ra tunungo' nilo boo ngaangai' ondo' sinauk ri Aki Kapuuno' risilo.

RINALATAN 17:11

Giu' ra Biria, ulun ru Jaudi moonsoi guang intor ra ulun ru Jaudi giu' ra Tisalonika. Naansayan ilo mangkirongog ra tanou intor ri Jisus. Moonong orou mambasa' ilo ra Buuk Kitab koson magilong ra motopot kia pangilaan ri Paulus ti.

RINALATAN 2:41

Masuang ulun nangintopot ra rinagu ri Pitrus, am ilo pana riniu'. Suang ru ulun nangintopot ri Kristus paat ra orou raginio riminuang poyo ra talu ngaribu ngaulun.

RINALATAN 8:1

I Saulus niayuk nangiou ra namatayan ri Stipanus. Orou ragili niayuk pasimpungan ulun Kristian ra Jirusalim inimbolo' ra maaja'. Ngaangai' ulun nangintopot nantutuliar pagiru' ra Judia am niayuk Samaria, kaa' rasul-rasul ayuk kalo.

GALATIA 2:9

I Jakubus, Pitrus am i Juanis ondo' karaan ra tingganai, nangiou ilo ra aku sinusub ri Aki Kapuuno' mambaal ra kandoi maatang ti. Ginio ra sikin ilo raki' am niayuk i Barnabas. Ginio tatandu' ra rondo' guang mai mangandoi, aku am i Barnabas mampatanou ra ulun sala' ka Jaudi, liliwa' ilo mampatanou ra ulun ru Jaudi.

1 TISALONIKA 2:13

Gitio rondo' poyo sasaban ra akai masalok maringkuanang ri Aki Kapuuno', ra nangkirongog am nangapu kau po ra tanou intor ri Aki Kapuuno' ondo' pinasaboi maili. Nangapu kau ra tanou no sala' ka koson ra tanou intor ra ulun, kaa' koson ra totopot i Aki Kapuuno' noyo intor ru tanou no. Am Io po nampasauk ramuyun nangintopot ri Kristus.

1 TISALONIKA 3:2

liliwa' poongoyon mai ramuyun i Timotius, pabukat takau. Io no sangulun mangangandoi ra Tuhan ondo' mabaya' ramon mampasaboi ra Tanou Moonsoi ri Kristus. Io sinusub mai mampaikang ra guang am pangintapatan mino ri Kristus.

2 TISALONIKA 2:10

Mamparuung io ra mansalinut kalaatan ra ulun ondo' maaru' pusoon. Pusoon ilo sabap ra kalo nangapu am nonogom ilo ra katapatan intor ri Aki Kapuuno' ondo' makapamayag risilo.