RINALATAN 4:13 - Tanou Moonsoi Timugon

¹³ Ulun ru Majlis Ugama nangimuag magilong ra kinabaani ri Pitrus am i Juanis, am poyo katutuni' nilo karuo rasul ti sala' ka ulun maatang am kolondo' sikul. Katutuni' nilo boo ruo ngaulun rasul ti rangan toojo ri Jisus.

RINALATAN 4:13 ပူးပေါင်းရင်းမြစ်များ

MATIUS 11:25

Paat ragili indagu i Jisus; “Ama', Tuhan ru limbowon am tana'! Paringkuanangan Ku Rirun sabap ra pinakito Mu ngaangai' raginio ra ulun kolondo' kapandayan, am pinasibuni Mu intor ra ulun mapintar am nakaigigila'.

MATIUS 26:71

Paat ri Pitrus mingkual ra kulobon ru timbok ru baloi no, mokoondo' sangulun ulipon ruandu' ra bokon nakakito ri Pitrus. Indagu io ra ulun ondo' soroi ra giu' no, “Ilain ku ulun raginio niayuk nabaya' ri Jisus ulun Nasarit no.”

MATIUS 26:73

Kopongo raginio, ulun-ulun ondo' minigor ra giu' i ratong ri Pitrus am indagu, “Maaru' okou ti sangulun intor risilo. Mauligan mai intor ra lalayuk ru ragu muno.”

LUKAS 22:8

Panusub i Jisus ri Pitrus am i Juanis, indagu Io, “Ongoyo' min pongoono' kalalair intok pagakanan takau ra Paska.”

JUANIS 19:26

Nakito ri Jisus ina' Nano nabaya' ra maamaya' tagamin Nano minigor ra giu' i. Ginio ra indagu Io ra ina' Nano, “Ina', pinakaanak mu ayuk io.”

JUANIS 7:15

Nangimuag toojo tingganai ru ulun ru Jaudi, am pagindagu ilo boo, “Ati kulaan ulun ti makapandai ra masuang pangilaan, kabalu' pana baal raginio kalo igondo' Io ilaa'?”

JUANIS 7:49

Kaa' ulun masuang ti ondo' kalo makatutun ra Ukum ri Musa, mausung ilo!”

RINALATAN 4:14

Kaa' kalo boo nakapaguta' ilo, sabap ra nakito nilo ulun ra nababas no bigor ra giu' no nabaya' ri Pitrus am i Juanis.

RINALATAN 4:19

Kaa' taam i Pitrus am i Juanis, “Guango' min galama' atan motopot ra pagilangan ri Aki Kapuuno': Gumagaya' ramuyun kia kapoam gumagaya' ri Aki Kapuuno'?

RINALATAN 4:29

Raino Tuhan, ilai' ati kulaan akai lolobon nilo. Anii' akai, ulipon-ulipon Muti, ra kakawan mampabala' ra tanou Muno.

RINALATAN 4:31

Kopongo ilo makiasi', intok tinimungan nilai nauyog. Kinuasa' ilo ngaangai' ru Ambiluo ri Aki Kapuuno', am tumalimpuun ilo mampabala' ra tanou intor ri Aki Kapuuno' ra kalo malaa'.

RINALATAN 9:27

Kaa' inindangan io ri Barnabas ondo' nagibit riso paumaa' ra rasul-rasul. Tunungo' ri Barnabas risilo ati kulaan i Saulus nakakito ra Tuhan ra tanga' ru ralan am ati kulaan Tuhan minindagu riso. Nambala' io niayuk ra ati kulaan i Saulus makakau' toojo nampasaboi ra Tanou Moonsoi intor ri Jisus giu' ra Damsyik.

RINALATAN 9:28

Ginio boo ra minayan i Saulus risilo, am makakau' io mangila' ra ati ayuk giu' ra Jirusalim ralalom inggalan ru Tuhan.

1 KORINTUS 1:27

Siningon ri Aki Kapuuno' nampili' ra ondo' kinara' ra sasambungon ru ulun ru tana' ti, koson mampakauyu' ra ulun-ulun mapintar no. I Aki Kapuuno' niayuk nampili' ra ondo' kinara' ra malawo ru ulun ru tana' ti, koson mampakauyu' ra ulun-ulun maikang no.

1 KORINTUS 14:25

Ginio boo ra atan ondo' soroi ra guang nano makasalula', saboi sumamba io ri Aki Kapuuno' mabaya' ra guang minggana' am mangiou ra, “I Aki Kapuuno' topot-topot soroi ramuyun.”

2 KORINTUS 3:12

Sabap ra makakalansanan akai raginio, makakau' akai boo mampatanou.