PINAINTALANG 9:11 - Tanou Moonsoi Timugon

¹¹ Ilo ti mokoondo' ra sangulun raja' ondo' mamarinta risilo, am raja' ti noyo malaikat ondo' makakunsi' ra intok ru ulun namagatoi. Inggalan nati ralalom ragu ru Ibrani iono Abadon, am ralalom ragu ru Junani iono Apolion (ondo' arati' no “i Mampalunsai”).

PINAINTALANG 9:11 ပူးပေါင်းရင်းမြစ်များ

AYUP 26:6

Intok ru ulun namagatoi naukab ra saang ri Aki Kapuuno' kalo inangaban saboi makito No.

AYUP 28:22

Kapatayan am kapusaan pana mindagu ra ondo' norongog tanou kalo naaruan ayuk.

AYUP 31:12

Tula no mamuso koson ra apui ru naraka, monolob ra ngaangai' ondo' longgom kuno.

MAZMUR 88:11

Nambaal Kou kia ra kaimuagan risilo ondo' namagatoi? Liminuat ilo kia am mongompor Rirun?

AMSAL 15:11

Amon ru makapandai Tuhan no ra nansalinut baal intor ra tana' ru ulun minatoi, maaru' mapandayan No niayuk pangkaraan ru ulun.

LUKAS 8:31

Gumogot toojo riwato-riwato no ri Jisus koson kalo pagiruon ilo giu' ra intok ru ulun namagatoi.

JUANIS 12:31

Raino ti noyo pangakiman ra ulun ru tana' ti; raino ti alapon noyo kuasa' intor riso ondo' manguasa' ra tana' ti.

JUANIS 14:30

Kalo boo masuang raguon Kutu ramuyun, sabap ra nasuku' noyo paat ra io ondo' manguasa' ra tana' ti matong. Kaa' kalo makapanguasa' io Raki'.

JUANIS 16:11

I Aki Kapuuno' niayuk nakatalimpuun noyo mangukum, sabap ra io ondo' manguasa' ra tana' ti inukum noyo.

JUANIS 5:2

Giu' no, maar ra umpasan ru bandar ondo' inggalanin ra, “Kulobon ru Domba”, mokoondo' rondo' kulam, ondo' ralalom ragu ru Ibrani sabiton ra “Bitisda”. Mamaar ra kulam ti mokoondo' limo ngantulus langgar.

JUANIS 8:44

Tingganai ru riwato no ama' min am maayo guang min gumagaya' ra kasagaan nano. Naintaran ra galing i, mamamatoi io ayuk am kalo igondo' giminagaya' ra katapatan, sabap ra kolondo' katapatan riso. Paat ra io magabau, maya' io ayuk ra paliso nano, sabap ra io no maabau-abau, am puun io ru ngaangai' abau.

2 KORINTUS 4:4

Guang ru ulun ondo' kalo mangintopot ti kinolondom ru tingganai malaat ondo' mamarinta ra tana' ti. Io noyo ondo' manginga' risilo makakito ra sinda intor ra Tanou Moonsoi, ioginio katulayan ri Kristus ondo' mogondo' ri Aki Kapuuno'.

IPISUS 2:2

Paat ragili minaya' kau ayuk ra paliso malaat ru ulun ru tana' ti. Giminagaya' kau ra tingganai ru mangunguasa' ra limbowon, am raino pana manguasa' ra ulun ondo' minanggal ri Aki Kapuuno'.

1 JUANIS 4:4

Kaa' pabukat kau ngaangai', akau intor ri Aki Kapuuno'. Naanggal min nabi-nabi magabau sabap ra mokoondo' kau ra Ambiluo ondo' makakuasa' toojo intor ra ambiluo ru ulun ru tana' ti.

1 JUANIS 5:19

Nakapandai takau ra itakau ti intor ri Aki Kapuuno', kabalu' pana ngaangai' ulun ru tana' ti kinuasa' ru Tingganai ru riwato.

PINAINTALANG 12:9

Ginio nai ra tambuakal maayo no pinatiran ra liwar! Io ti kukuo intor ra galing i ondo' ininggalanan ra “Tingganai ru riwato”, kapoam “Ambiluo Malaat”, ondo' nampakalayau ra ngaangai' ulun ru tana' ti. Pinatiran io ra tana' ti nabaya' ra ngaangai' malaikat nano.

PINAINTALANG 16:16

Riwato-riwato no boo nanimung ra raja'-raja' giu' ra intok ondo' ralalom ragu ru Ibrani inggalanin ra Armagidon.