PINAINTALANG 7:2 - Tanou Moonsoi Timugon

² Kakito ku boo malaikat ra bokon poyo siminalula' intor ra sirangon nagibit ra saap ri Aki Kapuuno' ondo' maayag. Nampiau malaikat no ra bolos mosongou ra kaapat malaikat ondo' inanian ri Aki Kapuuno' ra kuasa' mampalunsai ra lantur am raat ti.

PINAINTALANG 7:2 ပူးပေါင်းရင်းမြစ်များ

2 RAJA'-RAJA' 19:4

Nanusub raja' ru Asyur ra pagawai masawat kaga' nano koson magasab ri Aki Kapuuno' ondo' maayag. Gama' ru Tuhan, i Aki Kapuuno' muno mangkirongog ra pagasaban no am mangukum risilo ondo' mindagu raginio. Ginio ra pakiasi' no ri Aki Kapuuno' koson ra mamagun takau ondo' lakat poyo maayag.”

RIMBAI PANGAMPARAN 8:6

Sauko' aku ra ambai muno; pai' ganggol ra bokon ondo' ak am aku, sabap ra lumaai no koson ra kinaikang ru kapatayan, am saga' ru guang galama' manguasa' koson ra patayan. Simbula' nano koson ra simbula' ru apui, ondo' bibilak ra makalalaa'.

JISAYA 41:2

Osoi kia naparatong ra mangnguasa' intor ra sirangon, am napamanang riso ra ati ayuk angayan nano? Osoi kia ondo' nangani' riso ra kamanangan ra raja'-raja' am bansa'-bansa'? Ilang nano monotok risilo, pagilayan risilo onongon ayuk ra kaau. Panah nilono mapatabulias risilo koson ra rami masiob ru angin.

YEHEZKIEL 9:4

“Ongoyo' titikop ru bandar Jirusalim am tatandui' rabas ru ngaangai' ulun ondo' mangiluk guang am mapagon sabap ra binaal ondo' makauyuyu' ondo' binaal giu' ra bandar no.”

MALIAKI 3:1

Tumaam Tuhan Ondo' Maayo Kaga' Kuasa', “Atarin Ku ulun sinusub Kuno koson manampos ra ralan Kuno. Pulusat ru Tuhan ondo' uyumon min, matong ra Baloi ru Tuhan. Ulun sinusub Kuno ondo' inaanin min matong am mampatanou ra nabantuan Kuno.”

MALIAKI 4:2

Kaa' akau ondo' gumagaya' Raki', kuasa' Kuno ondo' mamayag ramuyun sumirang koson ra mato ru orou, am kuasa' Kuno mangani' ra pamabasan koson ra sinda mato ru orou. Makalabus kau am maansukan koson ra anak ru sapi' ondo' pinaingkual intor ra kandang.

MATIUS 16:16

Taam i Simon Pitrus, “Okou no Mamamayag ondo' sinusub i, Anak ri Aki Kapuuno' Ondo' Maayag.”

MATIUS 26:63

Nongkoror ayuk i Jisus. Igondo' poyo Tingganai Maayo Imam Jaudi ti mangkuot Riso, “Ralalom inggalan ri Aki Kapuuno' ondo' naayag, balai' akai, Okou kia Mamamayag ondo' sinusub ri Aki Kapuuno', ioginio Anak ri Aki Kapuuno'?”

JUANIS 6:27

Pai' kano paguyum ra akanon ondo' mataki' malaat. Kaa' paguyum kano ra akanon ondo' tumaan, ioginio mangani' ra kaayagan motopot am mantilayun. Anak ru Ulun noyo mangani' ramuyun ra akanon ragitio, sabap ra i Aki Kapuuno' noyo galama' nangiou Riso.”

2 KORINTUS 1:22

Koson ragitio noyo itakau tinatanduan ri Aki Kapuuno' ra Io tatangan; pinataak No Ambiluo Nano ra guang takau koson mapakalansan ra mangani' Io ritakau ra ngaangai' ondo' binantu' Nali.

IPISUS 1:13

Akau niayuk nasauk noyo ra ulun ri Aki Kapuuno' paat ra akau nokorongog ra tanou ondo' motopot no, ioginio Tanou Moonsoi ondo' nagibit ra pamayagan. Nangintopot kau Riso am tinatanduan kano ri Aki Kapuuno' ra inanian kau ra Ambiluo Nano ondo' binantu' no.

IPISUS 4:30

Pai' noyo pangiluko' Ambiluo ri Aki Kapuuno' no, sabap ra Io sumoroi ramuyun noyo tinatanduan kau ri Aki Kapuuno' ra akau ti Io no tatangan. Ambiluo raginio noyo ondo' mapakalansan ramuyun ra matong niayuk orou pampalabusan ramuyun ri Aki Kapuuno'.

SAGULION 5:26

Igondo' kia ulun magulayun maayag malupus mokorongog ri Aki Kapuuno' ondo' maayag intor ra apui?

1 TISALONIKA 1:9

Sabap ra ilo galama' mantunung boo ra ati kulaan nangapuan min ramon paat ra akai minongoi ramuyun gili. Mantunung ilo ati kulaan timinalikur kau intor ra sumamba ra sinungkalalaing, am mangandoi boo ri Aki Kapuuno' ondo' maayag am motopot.

2 TIMOTIUS 2:19

Kaa' ondo' binaal ri Aki Kapuuno' no ra guang ru ulun Nano kalo maalap kauyog. Am minindagu Io noyo, “Tuhan makaulig ra osoi ulun Nano,” am poyo ra, “Osoi ayuk mangiou ra io ulun ru Tuhan, musiti' io tumalikur intor ra kasalaan nano.”

IBRANI 12:22

Kaa' sotopot no nakainggaar kau ra Bulur Sion am bandar ri Aki Kapuuno' ondo' maayag no, ioginio Jirusalim am poyo riribu malaikat giu' ra suruga'.

PINAINTALANG 1:3

Pakaansuk noyo osoi ondo' mambasa' am mangkirongog ra tanou pinaintalang ti am niayuk gumagaya' ra atan ondo' tinulisan ragitio. Sabap ra kalo boo mabuoi ngaangai' baal ragitio masauk.

PINAINTALANG 10:1

Kakito ku boo rondo' poyo malaikat maikang tumuun intor ra suruga'. Kinulumput io ru gaun no am liminiput bulintung no ra ulu nano. Bulos nano makabinusasal koson ra mato ru orou am kalayam nano koson ra sinimbula' ru apui.

PINAINTALANG 10:4

Pakataam ilo ayuk am tulisin ku, kaa' korongog ku rondo' bolos intor ra limbowon minindagu ra, “Sibunio' noyo atan ondo' rinagu ru tulu' timpalak ni, am pai' tulisi'.”

PINAINTALANG 16:12

Pasasaro' boo ru malaikat koonom no suang ru sangkir nano ra sungoi Iprat ondo' maayo no. Ginio ra sungoi no liminasak saboi nasauk ra intok pansailan ru raja'-raja' ondo' intor ra sirangon no.

PINAINTALANG 5:2

Kakito ku boo sangulun malaikat maikang ondo' napabala' ra mosongou, kono, “Osoi kia iowon mampalungkab ra segel ti am niayuk mamingkal ra naskhah rinulun ti?”

PINAINTALANG 8:3

Kopongo ragili ratong malaikat ra bokon ondo' nagibit ra pambulian ra kaminyan ondo' binaal intor ra mas, am bigor io ra saang ru panalaban no. Inanian io ra kaminyan masuang koson polotokon ra pakiasian ru ulun ri Aki Kapuuno' no. Solobon no boo ginio ra panalaban ra kaminyan ondo' binaal intor ra mas ondo' soroi ra saang ru takhta no.

PINAINTALANG 9:14

Indagu bolos ti ra malaikat koonom no, “Labusi' noyo apat malaikat ondo' nabangkil giu' ra sungoi ru Iprat no!”

PINAINTALANG 9:4

Ilo ti binalaan ra kalo mampalunsai ra sakot, puun tataun kapoam tutuu' ra tinanom no. Mampasinduol ilo ayuk ra ulun ondo' kolondo' tatandu' ri Aki Kapuuno' ra rabas nilono.

1 SAMUIL 17:26

Nangkuot i Daut ra saujor ondo' soroi ra mamaar riso, “Atan kia ondo' taakin ra ulun ondo' makapamatoi ra ulun ru Palistin no am mapalabus ra Israil intor ra pagasaban? Makakau' kaga' ulun ru Palistin no, ulun ondo' kalo makaulig ri Aki Kapuuno', manggal ra saujor ri Aki Kapuuno' ondo' naayag!”

1 SAMUIL 17:36

Namatoi aku noyo ra singa' am baawang, am ulun ru Palistin ondo' kalo nakaulig ri Aki Kapuuno' no, niayuk nogondo' pamakuan kuno koson ra bibiag raginio, sabap ra makakau' io manggal ra saujor ri Aki Kapuuno' ondo' naayag.