PINAINTALANG 19:7 - Tanou Moonsoi Timugon

⁷ Ibok takano pakaansuk am pangiantak; omporo' takau kuasa' Nano. Sabap ra nasuku' noyo orou paguatan ru Anak Domba no, am ruandu' uoton no nakatampos noyo.

PINAINTALANG 19:7 ပူးပေါင်းရင်းမြစ်များ

MAZMUR 107:42

Ulun moonsoi maansukan makakito ra baal raginio, kaa' ngaangai' ulun malaat pinongkoror.

MAZMUR 48:11

Inggalan Muno nakatanou am omporon ra titikop ru tana' ti, namarintaan Muno matimpok.

MAZMUR 9:14

Pakaasi' no raki', iou Tuhan! Ilai' noyo, pantula' kuno ondo' mangimbolo' raki'. Bayago' aku no intor ra kapatayan, iou Tuhan,

AMSAL 29:2

Amon ru ulun matimpok no mamarinta, mamagun maansukan. Amon ru ulun malaat no mamarinta, mamagun maimbolo'.

RIMBAI PANGAMPARAN 3:11

Ingkual no, alii ralaa-ralaa ru Sion, ilai' min Raja' Salomo. Nangkaraun io ra ondo' pinasampak ru ina' nano, orou ra paguatan nano, orou ra io maansukan.

JISAYA 52:1

Luat noyo, okou Jirusalim, luat noyo! Ikango' guang muno! Sulungi' bayang moonsoi kaga' muno! Okou Jirusalim, bandar ondo' matulai, ulun majamol kalo boo sumubol ra kulobon garabang muno.

JISAYA 62:5

Koson ra buayoi maguot ra sangulun ralaa, ginio niayuk ri Namangun rirun maguot rirun. Koson ra ungkuyon maguot maansukan magilong ra ruandu' uoton, ginio niayuk ri Aki Kapuuno' muno maansukan rirun.

JISAYA 66:10

Pakaansuk noyo mababaya' ra Jirusalim, akau ngai' ondo' monogom ra bandar no. Pakaansuk noyo mababaya' ra Jirusalim ragino, akau ngai' ondo' nantangi' ra galing i.

JISAYA 66:14

Paat ra akau makakito ra kasaukan raginio, maansukan kau. Maligag kau koson ra sakot malabung. Bagu no makapandai kau ra Aku, Tuhan mangindangan ra ulun ondo' gumagaya' Raki', am pakitonon Ku sangit Kuno ra pantula' Kuno.”

JAKARIA 9:9

Pakaansuk kano, akau mamagun ru Sion! Pagitapap kano, akau mamagun ru Jirusalim! Ilai', raja' min matong! Matong io ra katulayan am kamanangan, kaa' ra minggana' guang, matong io nangura' ra kaladai, am nangura' ra anak kaladai ondo' mamulok.

MATIUS 1:20

Paat ri Jusup nampaguang koson raginio naginupi io. Pulusat boo ru sangulun malaikat am indagu io ri Jusup, “O Jusup, papag ru raja' Daut, pai' no kalaa' manangandu' ri Maria ti, sabap anak nano intor ra kuasa' ru Ambiluo ri Aki Kapuuno'.

MATIUS 22:2

Indagu Io, “Paat ri Aki Kapuuno' mamarinta, baal no koson ra sangulun raja' mampatampos ra bunsag paguatan ra anak ungkuyon nano.

LUKAS 12:36

Tilu kau ra ulipon ondo' maginaa ra tuan nilai muli' intor ra bunsag ru paguguatan. Paat ra tuan nilai makiukab ra kulobon, ukabin nilo ra mataki'.

JUANIS 3:29

Koson niayuk ra paguguatan: Ungkuyon uatin mokoowot ra andu'; kaa' mamparangan ra ungkuyon uatin ti ondo' mangkirongog riso pana maansukan. Ginio nai ra raino ti maansukan aku toojo,

2 KORINTUS 11:2

Maayo guang kuno ramuyun am i Aki Kapuuno' pana koson raginio. Akau ti karaan koson ra ralaa mapasau toojo ondo' pawatin ku ra rondo' ayuk toojo ungkuyon, ioginio i Kristus.

IPISUS 5:23

Sabap ra ralaki noyo ondo' maningganai ra andu' nano, mogondo' ri Kristus maningganai ra pasimpungan ulun Kristian, ioginio inan Nano.

IPISUS 5:32

Malandom kaga' arati' ru gitio, kaa' ondo' kon kuni, abig ru pabukatan ri Kristus am pasimpungan ulun Kristian no.

SAGULION 32:43

“Akau bansa' ngaangai', omporo' noyo ulun ru Tuhan. Mangukum Tuhan ra ngaangai' ulun ondo' mamatoi ra ulun Nano; mansuli' Io ra pantula' Nano, am mangampun ra tula ru ulun Nano.”

PILIPI 3:3

Sotopot no itakau noyo ondo' makaulig ri Aki Kapuuno' sala' ka ilo, sabap ra itakau ti ondo' sumamba ri Aki Kapuuno' maya' ra indangan ru Ambiluo Nano galama'. Am itakau niayuk maringkuanang sabap ra nakasimpung noyo ri Jisus Kristus. Intor raginio kalo boo malansan takau ra kaulayan ondo' binaal ayuk ru ulun.

PINAINTALANG 11:13

Paat raginio niayuk mogonggon tana' ti ra makalalaa'. Mopor piatus ru bandar no linunsai am tulu' ngaribu ngaulun pinatoi. Ulun ra bokon no malaa' boo kakaga', am nongongompor ilo ra kuasa' ri Aki Kapuuno' ra suruga'.

PINAINTALANG 19:9

Indagu boo malaikat no raki', “Tulisi' noyo gitio: Pakaansuk noyo ilo ondo' piniau ra bunsag paguatan ru Anak Domba no.” Tungguli' poyo ru malaikat no, “Gitio noyo pambalaan motopot intor ri Aki Kapuuno'.”

PINAINTALANG 21:2

Kakito ku niayuk Bandar Matulai no, ioginio bandar Jirusalim bagu, tumuun intor ra suruga' intor ri Aki Kapuuno'. Bandar no pinatampos noyo koson ra ruandu' uoton nakatampos noyo mongoi uma' ra ralaki nano.

PINAINTALANG 21:9

Rondo' intor ra katulu' malaikat no ondo' nampaguut ra tulu' sangkir makasuang ra tulu' kapaganan malaat ra pupus no, ratong raki' am indagu, “Ibok. Tuluin tokou ra ruandu' uoton no, ioginio andu' ru Anak Domba.”

1 SAMUIL 2:1

Kopongo raginio pakiasi' i Ana, “Napakaansuk Tuhan no ra guang kutu; mapara' boo bansuk kutu, sabap ra atan ondo' binaal Nano raki'. Raino kuritin ku pantula' kuno; mapara' boo bansuk kuno sabap ra nangindangan noyo i Aki Kapuuno' no raki'.