PINAINTALANG 15:3 - Tanou Moonsoi Timugon

³ Narimbai ilo ra rimbai ru nabi Musa, ulipon ri Aki Kapuuno' no, ondo' mongompor ra Anak Domba no, “Tuhan, i Aki Kapuuno' Maayo Kaga' Kuasa', mumpara' boo gayo am bonsoi ru binaal Muno! Raja' ru ngaangai' bansa', mumpara' boo banis am topot ru binaal Muno!

PINAINTALANG 15:3 ပူးပေါင်းရင်းမြစ်များ

KASAUKAN 17:1

Paat umur ri Abram siam ngoopor am siam ngambilor, minintalang Tuhan riso am indagu, “Aku noyo i Aki Kapuuno' Ondo' Maayo Kaga' Kuasa'. Gagaya' no Raki' am kasalok no mambaal ra kasagaan Kuno.

1 TUNUNG RU BANSA' ISRAIL 6:49

I Arun am papag nano pinangandoi monolob ra kaminyan, am mampataak ra taak simbalui ondo' solobon giu' ra rasawat ru altar. Ilo niayuk pinangandoi mampaugar ra ngaangai' upacara sambayang giu' ra Lamin Matulai Kaga' am mampataak ra taak-taak simbalui maa' raginio i Aki Kapuuno' mangampun ra tula ru ulun ru Israil. Ngaangai' ru kandoi no binaal nilo sumugut ra nanuluan ondo' tinaakan ri Musa, ulipon ri Aki Kapuuno'.

2 TUNUNG RU BANSA' ISRAIL 24:6

Ginio ra pampiau Raja' Joas ri Joyada, tingganai nilo am pangkuot, “Kua rirun kalo nanusub ra ulun ru Liwi mongoi ra mamagun ru Jiuda am Jirusalim koson manimung ra cukai ondo' pinaugar ri Musa, ulipon ru Tuhan no ra tayar ru Kim ru Tuhan?”

NIGIMIA 9:14

Nangila' Kou risilo mangiantak ra orou Sabat ondo' mapasau no, am ondo' pinabala' galing ra ulipon Muno i Musa, nangani' Kou risilo ra ukum Muno.

AYUP 36:24

Magail i Aki Kapuuno' omporon sabap ra binaal Nano; okou niayuk musiti' mongompor Riso.

AYUP 5:9

Kalo makarati' takau ra binaal maayo ri Aki Kapuuno', am kaimuagan Nano kalo mauntob.

MAZMUR 100:5

Tuhan no moonsoi; Tagamin No ulun Nano am gagayaan No ilo ra sabuoi-buoi no.

MAZMUR 105:5

Akau papag ri Abragam, ulipon Nano, am papag ri Jakub, ulun pinili' Nano, karaa' noyo kaimuagan binaal ri Aki Kapuuno', pai' liliani' ragu kapatasan ra pinataak Nano.

MAZMUR 111:2

Makaimuag toojo atan ondo' binaal ru Tuhan; ngaangai' ulun ondo' maansayan ra atan ondo' binaal Nano imansain no toojo.

MAZMUR 111:7

Tuhan matimpok am mampagagaya' ra atan ondo' baalon Nano; nansalinut panusuban Nano maintopot.

MAZMUR 139:14

Mongompor aku Rirun sabap ra moonsoi am makaimuag toojo namangunan Muno raki'. Nansalinut binaal Muno makaimuag kaga'. Natutunan ku noyo toojo.

MAZMUR 145:17

Matimpok toojo atan ayuk pana baalon ru Tuhan, am makaasi' Io ra atan ayuk pana baalon Nano.

MAZMUR 145:6

Pabalaan ru ulun binaal Muno ra makaimuag, am pabalaan ku katulayan Muno.

MAZMUR 18:30

Manaak Kou raki' ra kaikangan koson mapakala ra pantula' kuno; am kuasa' ondo' kalo maanggal ru pantula'.

MAZMUR 78:12

Ra saang ru kinamatuaan nilai, napatalang i Aki Kapuuno' ra baal kaimuagan giu' ra tana' marata' ru Joan ra pagun ru Misir.

MAZMUR 92:5

Binaal Muno, iou Tuhan, makabansuk raki'; marimbai aku maansukan ra binaal Muno.

MAZMUR 99:4

Okou Raja' ondo' maikang, tinogom Mu ukum; pinabigor Mu katimpakan giu' ra Israil, pinaugar Mu ukum am katimpakan.

JISAYA 33:22

Nansalinut kuliamos ru kapal nilono kolondo' pakuan. Layar kalo maalap kabilar. Ngaangai' kinalangkayaan ru saujor pantula' no gaawon takau, am suang nano masuang kaga' saboi ulun kalo makalulu' pana matayaran. Tuhan galama' masauk ra raja' takau. Mamarinta Io am mangampin ritakau.

JISAYA 45:21

Pabalaa' atan suang ru guang muno am niayuk inono'-inono' no, iou, polosoo' ilo mansunur. Osoi kia napatanou ra baal raginio am napabala' intor ra galing i? Sala' kia ka Aku, Tuhan? Kolondo' tuhan-tuhan ra bokon, ondo' ak am Aku. Aku noyo i Aki Kapuuno' ondo' matimpok am mamamayag, kolondo' noyo bokon ondo' ak am Aku!

DANIL 6:20

Paat ra maar matawang, sukal raja' am agou-agou minongoi ra luang batu ru singa' no.

DANIL 9:11

Ngaangai' ulun ru Israil minanggal ra ukum Muno am marara' rumongog Rirun. Makatula akai noyo Rirun, ginio ra nangukum Kou ramon ra pagulasan ondo' tinulisan ralalom ru Ukum ri Musa, ulipon Muno.

GOSIA 14:9

Ulun ru Israil mamatir ra ngaangai' sinungkalalaing; iowon Ku pakiasian nilo am magalung risilo. Koson ra puun tataun sumansam ayuk sindungin Ku ilo; Aku noyo puun ru ngaangai' barakat nilo.”

MIKA 7:20

Mampakito Kou ra gagaya' Muno am togom Muno ondo' mantilayun ra ngaangai' ulun Muno, papag ri Abragam am Jakub, koson ondo' binantu' Muli ra kinamatuaan mai ra galing i.

JIPANYA 3:5

Kaa' Tuhan lakat poyo giu' ra bandar no. Magail Io mambaal ra motopot am kalo igondo' nambaal ra ondo' sala. Moonong susuab ti maaru' mangani' Io ra katimpakan ra ulun Nano. Kaa' ulun ondo' kalo makaulig ra katimpakan giu' ra bandar no magulayun mambaal ra malaat ra kalo makaulig ra mauyu'.

JAKARIA 9:9

Pakaansuk kano, akau mamagun ru Sion! Pagitapap kano, akau mamagun ru Jirusalim! Ilai', raja' min matong! Matong io ra katulayan am kamanangan, kaa' ra minggana' guang, matong io nangura' ra kaladai, am nangura' ra anak kaladai ondo' mamulok.

JUANIS 1:17

Pinabala' galing ra nabi Musa, pinataak ri Aki Kapuuno' ritakau Ukum ri Musa, kaa' ralalom inggalan ri Jisus Kristus, pinakito ri Aki Kapuuno' ritakau togom am pampagagayaan Nano.

SAGULION 31:30

I Musa pana mindagu ra ngaangai' rimbai ti liliwa' ulun ru Israil mangkirongog raginio.

SAGULION 32:3

Mongompor aku ra inggalan ru Tuhan, am ulun Nano mapatanou ra Kinaayo Nano.

SAGULION 34:5

Kopongo raginio i Musa, ulipon ru Tuhan no, minatoi giu' ra tana' ru Moab, koson ra ondo' rinagu noyo ru Tuhan.

1 TIMOTIUS 1:17

Io Raja' ra mantilayun, kalo mapuso am poyo kalo maalap kakito, Io no rorondo' ayuk i Aki Kapuuno'. Urumato' am omporo' takau i Aki Kapuuno' ra sabuoi-buoi no. Amin.

IBRANI 3:5

I Musa giminagaya' ri Aki Kapuuno' koson ra sangulun ulipon mangindangan ra ulun Nano, am nampabala' poyo ra atan ondo' raguon ri Aki Kapuuno' ra tauli no.

JOSUA 22:5

Tutuno' noyo ra akau giminagaya' ra ukum ondo' tinaakan ri Musa: Tagami' noyo Tuhan i Aki Kapuuno' min, baalo' noyo kasagaan Nano, gagayaa' parinta Nano, gagaya' no Riso, am pangandoi ayuk Riso ra sototopot ru guang am salibuor.”

PINAINTALANG 1:8

“Aku noyo talimpuun am Aku noyo pupus,” ragu ru Tuhan, i Aki Kapuuno' Ondo' Maayo Kaga' Kuasa', ondo' soroi raino, galing i am pupus no pana.

PINAINTALANG 11:17

Konilo, “O Tuhan, i Aki Kapuuno' Maayo Kaga' Kuasa', ondo' raino am galing i pana soroi! Maringkuanang akai Rirun sabap ra nampaintalang Kono ra kuasa' maayo Muno, am tumalimpuun noyo mamarinta!

PINAINTALANG 14:3

Giu' ra saang ru takhta, kaapat-apat ru ilo ondo' maayag am tingganai-tingganai no, minigor poyo 144,000 ngaulun no am marimbai ra rimbai nakabagu. Rimbai raginio kalo maalap kaigigila' ru osoi ayuk pana, kaa' maatus apat ngoopor am apat ngaribu ngaulun no ayuk sabap ra binayag ilo noyo ri Aki Kapuuno'.

PINAINTALANG 14:8

Kopongo malaikat kasaa' no sunu' poyo malaikat karuo ondo' minindagu, “Nalunsai io noyo! Bandar Babil ondo' maayo no nalunsai noyo! Mamagun nano mangkimait ra ngaangai' bansa' ra pansasawaan nilo, mogondo' ra ulun jajalin gauko' ra wain.”

PINAINTALANG 17:14

Tumula' ilo ra Anak Domba no. Kaa' Anak Domba no am ilo ondo' gumagaya' Riso no, ondo' piniau Nano am ondo' pinili' Nano, mangala ra raja'-raja' nano, sabap ra Io noyo Tuhan ru ngaangai' tuan am Raja' ru ngaangai' raja'.”

PINAINTALANG 19:16

Sukub Nano am ra paa Nano tinulisan ra inggalan koson ragitio, “Raja' ru ngaangai' raja' am Tuhan ru ngaangai' tuan”.

PINAINTALANG 19:2

Motopot am mabanis pangukuman Nano. Nakapangukum Io no ra ruandu' mantatalan ra inan nano ondo' nampakalayau ra ulun ru tana' ti ra pansasawaan nano. Nakapangukum Io noyo riso sabap ra namatoi io ra ulipon ri Aki Kapuuno'.”

PINAINTALANG 4:8

Moonong ru apat ilo ondo' maayag no mokoondo' onom kawo nilo sigagama', ondo' ralimbou am ralalom pana natitip ra mato. Orou-rondom kalo lumonggo' ilo marimbai: “Mapasau, mapasau, mapasau noyo Tuhan, i Aki Kapuuno' Maayo Kaga' Kuasa', ondo' galing i soroi, raino am pupus no pana soroi.”