PINAINTALANG 13:12 - Tanou Moonsoi Timugon

¹² Ngaangai' kuasa' ru bibiag masigo kasaa' no pinaugar no ra saang nano. Ngaangai' minayan ra tana' ti jajalin no sumamba ra bibiag masigo kasaa' no, ondo' pilat makapatoi i kaa' napali' noyo.

PINAINTALANG 13:12 ပူးပေါင်းရင်းမြစ်များ

PINAINTALANG 19:20

Bibiag masigo no pana narakop nabaya' ra migiangku ra nabi no ondo' nakapambaal ra kaimuagan ra saang ru maayag masigo no. (Intor ra kaimuagan raginio namparuung io ra ulun ondo' tinatanduan ra saap ru bibiag masigo no am ilo ondo' siminamba ra sinungkalalaing no poyo.) Bibiag masigo no am migiangku ra nabi no pinatiran ra tasik ru apui ondo' naratok ra balirang mapaang.

PINAINTALANG 14:11

Mantilayun buun ru lisun ru apui ondo' mangimbolo' ra ulun-ulun no. Ilo ondo' sumamba ra bibiag masigo no am sinungkalalaing nano, am ondo' tinatatanduan ra inggalan ru bibiag masigo no, imboloon ilo orou-rondom ra kalo lalanggain!”

PINAINTALANG 14:9

Kopongo malaikat karuo no sunu' malaikat katalu ondo' minindagu ra bolos mosongou, “Osoi ayuk sumamba ra bibiag masigo no mabaya' ra sinungkalalaing nano am tinatanduan ra rabas kapoam kalindu' nano; ilo no ukumin toojo ri Aki Kapuuno' – mogondo' ra ulun jajalin gauko' ra wain mabisa'.

2 TISALONIKA 2:4

Makimantula' am makiompor io ra ngaangai' ondo' rokoon tuhan kapoam atan ayuk ondo' sambaan ru ulun, saboi sumubol am manturung io ra Baloi Tuhan am migiangku ra io rokoon i Aki Kapuuno'.

PINAINTALANG 13:2

Bibiag masigo ondo' nakito kuno, baal nano koson ra rimau am kalayam nano koson ra kalayam ru baawang am kabang nano koson ra kabang ru singa'. Tambuakal ni nangani' ra ikang nano galama' ra bibiag masigo no am takhta nano am kuasa' ra maayo.

PINAINTALANG 13:8

Ngaangai' ulun ondo' mayan ra tana' ti sumamba riso. Kaa' mokoondo' niayuk ondo' kalo sumamba riso, ioginio ilo ondo' inggalan nilono tinulisan noyo ra kitab ru Ulun Mokoowot ra Kaayagan Motopot paat ra tana' ti kalo poyo biningkal. Kitab no ampu' ru Anak Domba ondo' pinatoi ru ulun.

PINAINTALANG 16:2

Ugar malaikat kasaa' no am pasasaro' no suang ru sangkir nano ra tana' ti. Salula' boo talipos ondo' makalalaa' am maruol kaga' ra inan ru ngaangai' ulun ondo' tinatanduan ra saap ru bibiag masigo no am ilo ondo' siminamba ra sinungkalalaing nano.

PINAINTALANG 17:8

Bibiag masigo ondo' nakito muni, naayag ra galing i, kaa' raino kalo boo. Kalo boo mabuoi am mingkual io intor ra intok ru ulun namagatoi no am pusoon. Ulun-ulun ru tana' no ondo' inggalan nilo kalo tinulisan ra kitab ru Ulun Mokoowot ra Kaayagan Motopot ra kalo poyo tana' ti biningkal, makatigog ilo makakito ra bibiag masigo no. Bibiag masigo no naayag ra galing i; raino kalo boo, kaa' sumalula' io poyo saguli'.

PINAINTALANG 20:4

Kakito ku boo kurisi'-kurisi' turungan ru raja', am ulun-ulun ondo' nanturung inanian ra kuasa' mangukum. Nakito ku niayuk ambiluo ru ulun-ulun ondo' iningguluan sabap ra nangani' ilo ra kaintutunan intor i Jisus am nampatanou ra pambalaan ri Aki Kapuuno'. Ulun-ulun no kalo siminamba ra bibiag masigo kapoam sinungkalalaing no am kalo igondo' tinatanduan ra saap ru bibiag masigo no ra rabas am kalindu' nilono. Ilo naayag saguli' am namarinta ilo koson ra raja' mababaya' ri Kristus buoi saribu ngambilor.