MAZMUR 51:6 - Tanou Moonsoi Timugon

⁶ Natulaan aku Rirun – Okou ayuk, am nambaal aku ra baal-baal ondo' karaan Mu ra malaat. Motopot nangakiman Muno raki'; natimpok noyo ra Okou nangukum raki'.

MAZMUR 51:6 ပူးပေါင်းရင်းမြစ်များ

2 SAMUIL 12:13

Kon ru Raja' Daut ri Natan, “Sotopot no natulaan aku noyo ra Tuhan.” Taam i Natan, “Nangampun noyo Tuhan no rirun, am kalo matoi kou.

2 RAJA'-RAJA' 20:3

“Karaa' noyo, iou Tuhan, ra nangandoi aku Rirun ra gumagaya' am totopot, am ra masalok aku mirot koson mambaal ra kasagaan Muno.” Raja' no pana nantangi' ra mangiluk.

1 TUNUNG RU BANSA' ISRAIL 29:17

Nakapandai aku ra mangkinam Kou ra guang ru moonong ulun am Okou galama' masaga' ra ulun ondo' mapasau guang nano. Mabaya' ra kabanisan am kasagaan ru guang, pataakon ku ngaangai' ti Rirun. Nakainono' aku noyo ra ulun Muno ondo' natimung ragiti nagibit ra taak nilo Rirun ra guang maansukan.

AYUP 32:8

Kaa' sotopot no Ambiluo ri Aki Kapuuno' Ondo' Maayo Kaga' kuasa' ondo' mangani' ra kapintaran ra ulun.

AYUP 38:36

Osoi kia mambala' ra susuit ibis ra Sungoi Nil mampaliur? Osoi kia ondo' mambala' ra manuk tandaa' ra rumasam?

MAZMUR 125:4

Iou Tuhan, koonsoi no ra ulun moonsoi, ra ulun ondo' sumugut ra panusuban Muno.

MAZMUR 15:2

Ulun ondo' naayag ra kolondo' ruruko am moonsoi binaal nano, mabanis guang am mindagu ra motopot,

MAZMUR 26:2

Pangimumui no raki', iou Tuhan, am kinami' aku no, imonolo' toojo guangon kuno am pangkaraan kuno.

MAZMUR 32:5

Iowon ku boo tula kuno Rirun; kalo alion ku nasalaan ondo' binaal kuli. Nalantas noyo guang kuno koson mangiou ra tula kuli Rirun, am ampunon Mu ngaangai' nasalaan kuno.

MAZMUR 41:5

Mindagu aku, “Iou Tuhan, natulaan aku Rirun; pakaasi' no raki' am babaso' aku no!”

MAZMUR 5:9

Iou Tuhan, masuang kaga' pantula' kuno; ilaa' aku mambaal ra kasagaan Muno, am tului' aku ra ralan ondo' musiti' no mauma' kuno.

AMSAL 2:21

Ulun ondo' sumugut ra kasagaan ri Aki Kapuuno', ioginio ulun ondo' mabanis guang maayag geu'ra ondo' binantu' ri Aki Kapuuno'.

AMSAL 2:6

Tuhan noyo manaak ra kapintaran. Katutunan am karatian Io namuun.

JIRIMIA 12:1

“Iou Tuhan, amon ru pabalaan ku baal kutu Rirun, maaru' matutunan toojo ra Okou noyo ondo' motopot. Kaa' musiti' aku mangkuot Rirun intor ra katimpakan. Kua kia ra ulun malaat langkaya'? Kua kia ra ulun ondo' kalo mabanis guang makabanang?

JIRIMIA 31:33

Gitio noyo nabantuan bagu ondo' baalon Kuno ra ulun ru Israil: Buliin Ku ukum Kuno ra ralalom ru guang nilo, am tulisin ginio ra guang nilo. Masauk Aku ri Aki Kapuuno' nilo, am masauk ilo ra ulun Kuno.

JIRIMIA 32:40

Mambaal Aku ra nabantuan ondo' mantilayun risilo. Kalo lumonggo' Aku mambaal ra moonsoi risilo. Mangkinibit Aku risilo malaa' am mangurumat Raki' ra sotopot ru guang maa' raginio kalo mangiruan ilo Raki'.

JIRIMIA 5:3

Sotopot no gogoton ru Tuhan gagaya'. Lambaan No akau, kaa' kalo lioon min. Popolon No akau, kaa' marara' kau mangapu ra pangilaan. Mokotog guang min am marara' tumalikur intor ra tula.

LUKAS 11:39

Kaa' indagu Tuhan riso, “Akau ulun-ulun ru Parisi! Mampaliung kau ra ralimbou ru galas am piring mino, kaa' ralalom ru guang mino masuang puka' am kalaatan.

ROMA 7:22

Maansukan guang kuno ra ukum intor ri Aki Kapuuno'.

2 KORINTUS 1:12

Maringkuanang akai toojo sabap ra bolos ru guang mai maminson ramon ra kiralan ru kaayagan mai ra tana' ti, mulu' poyo pabukatan mai ti ramuyun, masalok mabanis am matanda'. Ginio mabaal mai ralalom ru kuasa' ri Aki Kapuuno' am asi' Nano galama', am sala' ka mansail ra kapintaran ru ulun.

JAKUBUS 4:8

Inggaari' noyo i Aki Kapuuno', am i Aki Kapuuno' pana minggaar ramuyun. Ulun kau ra makatula, langgai' min noyo baal ra malaat. Ulun kau ra maginduo guang, kapasawo' noyo guang mino!

1 PITRUS 3:4

Kaa' kataluran ondo' sotopot no, ioginio guang min, ra makapaliso kau ra molomoi am guang pantataan. Gitio nai boo ondo' mantilayun no am mokologo toojo ra pagilangan ri Aki Kapuuno'.

1 SAMUIL 16:7

Kaa' indagu Tuhan ri Samuil, “Pai' ilai' sawat ru inan nano kapoam kinaindon ru bulos nano; sala' ka io pinili' Kuno. Kalo magilong Aku ra ulun koson ra ulun magilong. Ulun magilong ra bulos kaa' Aku magilong ra guang.”