Matong aku ra intok pagitatanaman kuno, alii ra ambai am uoton kuno, manimung aku ra mur am apa' pampagamis ra akanon kuno; mangkan aku ra ruu' ru maningot am tambaloi nano, manginum aku ra gatas am wain kuno. Pangakan kau, rangan ku ngai', am panginum kau saboi kau magauk ra laai.
Giti ra Bulur Sion, Tuhan Ondo' Maayo' Kaga' Kuasa' mangatang ra pagakanan maayo koson mampaakan ra ngaangai' bansa' ra tana' ti. Pasulungon No akanon ra mangaamis am wain ra pinili'.
Tambiag ra masigo pana mangurumat Raki', taani am susuit unta mongompor Raki' bulintok ra Aku mampatilis ra timug ru sungoi-sungoi boborok no giu' ra tana' kaagisan, koson mapainum ra ulun pinili' Kuno.
Bulintok ra Tuhan maningganai ra ulun Nano mugar ra tana' kaagisan, kalo paason ilo. Paingkualon No timug intor ra bulur batu no risilo; lapakon No bulur batu, am timug pana tumampusis.
Masalok Aku maningganai ramuyun am mamasug ramuyun giu' ra tana' mapua'; Aku magalung ramuyun maa' raginio maligag kau am maikang. Akau koson ra taman ondo' maulian ra timug no, koson ra taur ru timug ondo' kalo igondo' mapua'.
Paat ra orou kaampusan ru pangiantakan i, ioginio orou maatang toojo, bigor i Jisus am indagu ra mosongou, “Osoi ayuk paason, polosoo' io no matong Raki' am manginum.