MATIUS 5:22 - Tanou Moonsoi Timugon

²² Kaa' raino ti balain takamin: Osoi ayuk pana sumangit ra pabukat nano, io ti ibiton ra saang ru akim; am osoi ayuk pana magulas ra pabukat nano, io ti ibiton ra Majlis Ugama; am osoi ayuk pana mampiau ra pabukat nano ra ‘malaat’, io ti pasubolon ra naraka.

MATIUS 5:22 ပူးပေါင်းရင်းမြစ်များ

KASAUKAN 37:4

Pakaliman pagaka'-pagaka' nano ra motogom poyo ama' nilono ri Jusup ka ilo, kasisangin nilo kaga' i Jusup saboi kalo mindagu ilo riso ra bobonsoi.

KASAUKAN 37:8

Pangkuot pagaka'-pagaka' nano, “Mampaguang kou kia sumauk ra raja' am mamarinta ramon ngaangai'?” Ginio ra liminanja' sisang nilo ri Jusup sabap ra inupi nano am ra atan ondo' pinabala' no intor ra inupi nano.

2 SAMUIL 16:7

Nagulas i Simii riso am indagu, “Ugar! Ugar! Mamamatoi! Ulun malaat!

2 SAMUIL 6:20

Kopongo raginio, paat ra Raja' Daut nakauli' koson mamujak ra sasambaloi nano, tuum i Mikgal riso. Kon ri Mikgal, “Paat ra orou raiti' totopot raja' ru Israil nambaal ra inan nano urumaton kaga'! Nagibabaang raja' koson ra ulun sasambungon ondo' kalo mapandai mauyu' ra saang ru ulipon-ulipon ruandu' ru pagawai-pagawai istana!”

1 RAJA'-RAJA' 21:4

Uli' Raja' Agab ra guang pansagulian am siminangit sabap ra ragu ri Nabot no. Luya' Raja' Agab ra intok kaalangan, tumingkuang ra timbok am marara' mangakan.

2 TUNUNG RU BANSA' ISRAIL 16:10

Siminangit kaga' Raja' Asa ra nabi no saboi nabi no inaput. Paat raginio noyo Raja' Asa tumalimpuun mangimbolo' ra kukula' ngaulun.

2 TUNUNG RU BANSA' ISRAIL 19:5

Raja' Josapat nampalantik ra akim-akim giu' ra moonong bandar ondo' mokoondo' ra kubu giu' ra Jiuda.

NIGIMIA 5:8

am indagu aku, “Mingkotog akai toojo mamuli' ra ulun ru Jaudi ondo' nantalan kalalaat ra inan nilo ra ulun bansa' ra bokon. Kaa' raino akau pinai boo ondo' mampajajal risilo mantalan ra inan nilo ramuyun, alika akau niayuk ulun ru Jaudi!” Tingganai-tingganai no nongkokoror ayuk, am kalo timinaam ra atan pana.

MAZMUR 109:3

Bulunsaron nilo aku ra ragu-ragu makasisang, am manguu' raki' ra kolondo' kaayatan.

MAZMUR 14:1

Ra tingganai santimungan maririmbai. Mazmur ri Daut. Ulun budu mindagu ralalom ru guang, “Kolondo' i Aki Kapuuno'.” Ngaangai' ilo malaat am masaga' ilo mambaal ra malaat; Kolondo' sangulun pana mambaal ra moonsoi.

MAZMUR 25:3

Kalaan kalo malimanan ru ulun ondo' mangintopot Rirun, kaa' malimanan ru ulun ondo' mataki' manggal Rirun.

MAZMUR 35:19

Pai' polosoo' pantula' ra maabau-abau no, ondo' magasab ra naalaan kuno! Pai' polosoo' ulun ondo' masisang raki' ra kolondo' sasaban, maansukan ra kangilukan kuno!

MAZMUR 37:8

Pai' sangit kapoam malasu' guang; baal raginio mangkinibit ayuk mulas ra inan galama'.

MAZMUR 49:10

koson minggalur ra kapatayan, maa' raginio makaalap io ra kaayagan ra sabuoi-buoi no.

MAZMUR 69:4

Naagui aku nampiau ra makiindangan, am bambalangan kuno maruol. Mato kuno mapari' maginaa ra pangindanganan Muno.

MAZMUR 7:4

Iou Tuhan, i Aki Kapuuno' kuno, amon ru igondo' aku mambaal ra malaat, amon ru simbaalin ku rangan kuno, kapoam potoyon ku pantula' ra kolondo' sasaban,

MAZMUR 92:6

Iou Tuhan, maatang kaga' binaal Muno! Malandom toojo pangkaraan Muno!

AMSAL 14:16

Ulun mapintar kalo maajag-ajag am minggalur ra kalaatan, kaa' ulun sasambungon maajag-ajag am mamatas ra kalo mangkara' pagulu.

AMSAL 18:6

Amon ru ulun sasambungon mapatabual ra pantataaman, ilo no makilamba'.

JIRIMIA 17:11

Koson ra susuit nangamut ra talu' ondo' sala' ka io tangan, koson raginio noyo ulun ondo' kalo mabanis guang mokoowot ra rapu'. Paat ra umur lakat poyo mamulok matatakan io ra ngaangai' rapu' nano. Paat ra pupus ru bayag nano mainono' ra io ulun ondo' sasambungon kaga'.

SULABOI 3:52

“Linandak aku koson ra susuit ru pantula' ondo' masisang raki' ra kolondo' sasaban.

DANIL 3:13

Pokorongog ra baal raginio sangit raja' am nanusub maa' raginio katalu-talu ngaulun no ibiton muma' riso.

DANIL 3:19

Bulintok raginio Raja' Nibukadnijar siminangit kaga' ri Sadrak, Misak am i Abidnigo saboi malia' bulos nano. Ginio ra nanusub raja' ra ulun-ulun nano mampalasu' ra rapuan intulu' poyo lasu' intor ra kaindalaman.

OBAJA 1:10

“Nantakou kau am namatoi ra pabukat min, papag ri Jakub. Ginio ra pusoon kau am asabin ru ulun ra kolondo' pupus.

OBAJA 1:12

Akau sotopot no kalo maansukan sabap ra karaat ondo' nakalumpa' ra pabukat min giu' ra Jiuda. Akau sotopot no kalo maansukan paat ra orou ilo mapuso. Akau sotopot no kalo makakurit risilo paat ra ilo mapagon.

MATIUS 10:17

Ilalai' min, sabap ra mokoondo' ulun mamparakop am magibit ramuyun giu' ra makama, am loposon kau giu' ra baloi sambayangan nilo.

MATIUS 10:28

Pai' kano kalaa' risilo ondo' makapamatoi ramuyun, kaa' ondo' kolondo' kuasa' mampasubol ramuyun ra naraka. Kaa' kalaa' kano ri Aki Kapuuno' ondo' makapamatoi ramuyun am makakuasa' mampasubol ramuyun ra naraka.

MATIUS 12:24

Paat ra ulun-ulun ru Parisi nokorongog ragitio, taam ilo, “Mampagiru' Io ra riwato sabap ra inanian Io ra kuasa' ri Biiljibul, Tingganai ru riwato no.”

MATIUS 17:5

Tatanga' ri Pitrus mindagu, ratong gaun ondo' makabinusasal no nangulumput risilo, am bolos intor ra gaun no mindagu, “Gitio noyo Anak Kuno ondo' tagamin Kuno, mapakatasu' Io ra guang Kuno. Rongogo' min Io no!”

MATIUS 18:21

Paat ra sangarawan ratong i Pitrus ri Jisus am pangkuot, “Tuhan, amon ru rangan kuno makatula raki', saboi ingkula' aku mangampun riso? Saboi intulu' kia?”

MATIUS 18:35

Pupus ra tunung, indagu poyo i Jisus, “I Ama' ra suruga' mambaal niayuk ramuyun koson raginio amon ru kalo masaga' kau mangampun ra rangan mino.”

MATIUS 23:15

“Aibui boo ramuyun, mangingila' ra Ukum ri Musa am ulun ru Parisi! Maabau-abau kau! Lumaup kau ra raat am mongoi ra ati ayuk pagun koson mampasauk ra sangulun ayuk pana mangintopot ra pangilaan min ti. Kaa' paat ra io masauk ra maamaya' min, io pana pasubolon ra naraka koson ramuyun sabap ra malaat io ka akau.

MATIUS 23:33

Akau ngaangai' ti ulun malaat! Sayat kau ru kukuo! Akau ukumin mongoi ra naraka am kolondo' pagiruan min

MATIUS 25:41

“Mindagu boo raja' no ra ulun-ulun ru kait i: ‘Pagiru' kano intor Raki', akau ulun inulas ri Aki Kapuuno'! Ayan kau ra ralalom apui ra mantilayun ondo' inaru' ra Tingganai ru riwato am malaikat-malaikat nano.

MATIUS 26:59

Tingganai-tingganai imam Jaudi am ngaangai' Majlis Ugama no maguyum toojo ra sasi' koson mangkinam mamparuung ri Jisus, maa' raginio maalap nilo boo Io kapatoi.

MATIUS 3:17

Maining boo bolos intor ra limbowon minindagu, “Gitio noyo Anak Kutu ondo' tagamin Kuno. Maansayan Aku Riso.”

MATIUS 5:34

Kaa' raino ti balain takamin: Pai' kau pagibot! Pai' kau pagibot ra limbowon no alapon min ra sasi', sabap ra limbowon no kurisi' turungan ri Aki Kapuuno',

MATIUS 5:44

Kaa' raino ti balain takamin: Tagami' noyo pantula' mino am pakiasi' kano koson ra ulun ondo' mangimbolo' ramuyun,

MARKUS 14:55

Tingganai imam Jaudi am ngaangai' Majlis Ugama mirot toojo maguyum ra kaintutunan ondo' mampasala ri Jisus maa' raginio maukuman nilo Io ra potoyon. Kaa' kolondo' rondo' naalap nilo.

MARKUS 15:1

Ra iosuabon, tingganai imam Jaudi, tingganai ru ulun ru Jaudi, mangingila' ra Ukum ri Musa am ulun Majlis Ugama ra bokon, nagindibok nansusunur. Rantayo' nilo i Jisus, paumaa' am pataaki' nilo Io ra gabenor Pilatus.

LUKAS 12:5

Tuluin takamin osoi kalaanin. Kalaa' kano ri Aki Kapuuno' sabap ra mopongo mamatoi, makakuasa' poyo mamatir ra ambiluo ru ulun ra naraka! Balain takamin toojo, kalaa' kano Riso!

LUKAS 22:66

Io suabon, tingganai ru ulun ru Jaudi, tingganai imam Jaudi am mangingila' ra ukum ri Musa no timinimung ra Majlis Ugama, am paumaa' boo i Jisus risilo.

JUANIS 11:47

Ginio ra ulun ru Parisi am tingganai imam Jaudi miting ra Majlis Ugama. Konilo, “Atan nua' baalon takau? Ilai', masuang kaimuagan binaal ru ulun ti!

JUANIS 15:25

Maa' raginio masugut ondo' tinulisan ra Ukum nilo, ‘Masisang ilo Raki' kabalu' pana kolondo' sasaban.’

JUANIS 7:20

Taam ulun masuang no, “Mantuyang Kou! Osoi masaga' mamatoi Rirun?”

JUANIS 8:48

Taam ilo Riso, “Motopot ragu mai ra Okou ti noyo ulun ru Samaria ondo' sinubol ru riwato.”

RINALATAN 17:18

Mokoondo' mangingila' ra pangilaan ru Ipikuros am Stoikos nakimantaam riso, konilo, “Atan nua' raguon ru naupa' ti?” Kaa' bokon i poyo minindagu, “Mampatanou io po lair intor ra dewa ru ulun bansa' ru bokon.” Rinagu nilo ginio sabap ra nambala' i Paulus ra i Jisus ti naayag saguli' intor ra kapatayan.

RINALATAN 22:30

Tingganai maayo ru saujor Roma no masaga' toojo mintutun ra kua ulun ru Jaudi manguu' ri Paulus. Ginio ra iosuabon, piawo' no tingganai-tingganai imam Jaudi am niayuk ngaangai' ulun ru Majlis Ugama i timinimung. Ginio ra bugalo' nilo pinamangkil ri Paulus i am ibito' io boo paumaa' risilo.

RINALATAN 23:1

Tantangi' boo ri Paulus ngaangai' ulun ru Majlis Ugama i am indagu, “Pabukat kau ngaangai'! Polos ra orou raiti', bolos ru guang kuno mambala' raki' ra kaayagan kuno kolondo' sala ra pagilangan ri Aki Kapuuno'.”

RINALATAN 24:20

Kapoam polosoon ayuk pana ilo ondo' mokoondo' noyo ragiti mambala' ra atan kia kalaatan kuno ondo' natuum nilo paat ra aku binisara' giu' ra Majlis Ugama i.

RINALATAN 4:15

Susubo' nilo ruo ngaulun rasul no miningkual ra lamin Majlis Ugama no, am pansusunur ilo boo.

RINALATAN 5:21

Rasul-rasul no giminagaya' ra bilin ru malaikat i. Riminondom ilo minongoi ra Baloi Tuhan no am timinalimpuun ilo mangila'. Tingganai Maayo Imam Jaudi am maamaya' nano nampiau ra ngaangai' tingganai ru ulun ru Jaudi matong ra miting ru Majlis Ugama. Panusub ilo boo koson ibiton rasul-rasul no intor ra lamin pangaputan paumaan risilo.

RINALATAN 5:27

Ibito' nilo rasul-rasul no paumaan ra Majlis Ugama. Indagu Tingganai Maayo Imam Jaudi no, kono,

RINALATAN 6:12

Nanusuk ilo niayuk ra ulun masuang, tingganai ru ulun ru Jaudi am poyo mangingila' ra Ukum ri Musa, saboi ongoyon nilo rokopo' i Stipanus koson bisaraan giu' ra Majlis Ugama.

RINALATAN 6:15

Ponontong boo ngaangai' ulun ondo' minongoi ra Majlis Ugama i ri Stipanus. Am kakito nilo ra bulos nali koson ra malaikat.

RINALATAN 7:37

I Musa ti noyo minindagu ra bansa' ru Israil ra, ‘Manusub poyo i Aki Kapuuno' ra sangulun nabi intor ra bansa' min galama', koson niayuk ra Io nanusub raki'.’

ROMA 12:10

Raino mabubukat kau sabap ri Kristus, pontotogom kano ra rondo' am bokon. Pirot kano pagugurumat ra rondo' am bokon.

1 KORINTUS 6:10

ondo' mantakou, makalit, gagaukon, manimbaal ra ragu ra ulun bokon, am poyo ulun mampagaau – ngaangai' ulun raginio kalo masauk ra ulun ri Aki Kapuuno'.

1 KORINTUS 6:6

Kaa' pinoloso min ayuk ulun Kristian mantatagi' ra rondo' am bokon giu' ra makama, am ulun sala' ka Kristian no boo manalasai risilo.

SAGULION 15:11

Gino ngai' ru ulun ru Israil, masalok mokoondo' kukula' ngaulun musikin am ondo' gumogot makiindangan. Ginio ra manusub aku ramuyun maa' raginio mataau guang risilo.”

SAGULION 16:18

“Lantiko' noyo tingganai-tingganai ru bansa' am pagawai-pagawai ra bokon giu' ra moonong bandar ondo' pataakon ramuyun ru Tuhan i Aki Kapuuno' min. Ngaangai' ulun musiti' mangakim ra mamagun ra matimpok.

1 TISALONIKA 4:6

Intor ra baal ragitio, pai' kano pambaal ra kasalaan kapoam mamparuung ra pabukat min ra Kristian. Sabap ra nakapansawai akai noyo toojo ramuyun ragili ra Tuhan noyo ondo' mangukum ra ngaangai' baal koson raginio.

TITUS 3:2

Ragui' ilo no ra pai' pangalimut kapoam pakimansangor, kaa' masalok masamba am molomoi ra ngaangai' ulun.

IBRANI 12:25

Ilalai' noyo ra kasalok kano mangkirongog Riso ondo' mindagu. Sabap ra ilo ondo' kalo nangkirongog Riso ondo' nampasaboi ra bala' ri Aki Kapuuno' ra tana' ti, kalo noyo nakapagiru' ilo. Mulu' piboo ritakau, ra kalo makapagiru' takau amon ru kalo mangkirongog Riso ondo' minindagu intor ra suruga'.

IBRANI 5:9

Ginio ra kalupus Io pinasauk ra mamamayag ra kolondo' sala, nasauk Io boo ra puun ru pamayagan mantilayun ra ngaangai' ulun ondo' gumagaya' Riso.

JAKUBUS 2:20

Bungas kou nai toojo! Makitulu' kou piboo kia ra kolondo' noyo onong ru pangintapatan, amon ru kolondo' baal ra moonsoi?

JAKUBUS 3:6

Rila' ti mogondo' ra apui. Ralalom ru inan takau, io no puun ru laat am mampakasalula' ra kalaatan nano ra ngaangai' ru kaayagan takau. Kinalaat nano intor noyo ra naraka, am makapampakalaat io poyo ra ngaangai' ru kaayagan takau.

1 PITRUS 2:23

Paat ra Io inasaban, kalo niayuk nambalos Io pagasab. Paat ra Io sinindualan, kalo noyo nompololob Io risilo. Kaa' liminansan Io ayuk ri Aki Kapuuno', Akim ondo' mabanis guang no.

1 PITRUS 3:9

Pai' min noyo balasi' kalaatan ru ulun ra kalaatan niayuk, kapoam unjaka' ra unjaka' niayuk; kaa' sotopot no kitaaki' min ilo ra barakat. Sabap ra binarakat kano ri Aki Kapuuno' paat ra Io nampiau ramuyun.

1 JUANIS 2:9

Ulun ondo' mindagu ra soroi io ralalom ru binusasal kaa' masisang io ra pabukat nano, arati' no soroi io ra kalandaman saboi raino.

1 JUANIS 3:10

Gitio ra kalo nogondo' anak ri Aki Kapuuno' am anak ru Tingganai ru riwato. Osoi kalo mambaal ra motopot, kapoam kalo motogom ra pabukat-pabukat nano, io ti sala' ka anak ri Aki Kapuuno'.

1 JUANIS 5:16

Amon ru makakito kau ra osoi ayuk pabukat min mambaal ra tula ondo' kalo magibit ra kapatayan, pakiasi' kano ri Aki Kapuuno' maa' raginio bayagon boo ulun no ri Aki Kapuuno', ioginio ulun ondo' tula nilono kalo magibit ra kapatayan. Kaa' mokoondo' niayuk tula ondo' magibit ra kapatayan, am kalo mindagu aku ra musiti' kau makiasi' ri Aki Kapuuno' koson raginio.

JUDAS 1:9

Kaa' Tingganai ru malaikat, i Maikol galama', kalo noyo igondo' pakakau' nambaal koson raginio. Paat ra io am Tingganai ru riwato no nagaau ra baangkai ri nabi Musa i, kalo noyo nakakau' i Maikol ti nagibot riso ra ragu magasab. Minindagu io ayuk ra, “Tuhan galama' mangukum rirun!”

PINAINTALANG 20:14

Patayan am Nabalu pinatiran ra tasik ru apui. (Tasik ru apui ti ioginio kapatayan ra kainduo.)