MATIUS 5:10 - Tanou Moonsoi Timugon

¹⁰ Pakaansuk noyo ulun ondo' kasisangin sabap ra mambaal ayuk ra kasagaan ri Aki Kapuuno', sabap ra ilo noyo ulun ri Aki Kapuuno'.

MATIUS 5:10 ပူးပေါင်းရင်းမြစ်များ

MAZMUR 37:12

Ulun malaat maguguum tumula' ra ulun moonsoi am masisang magilong risilo.

JISAYA 66:5

Rongogo' noyo ragu ru Tuhan, akau ngai' ondo' malaa' am gumagaya' Riso: “Sabap ra akau gumagaya' Raki', santayaran intor ra bansa' mino galama' masisang am mangimpai ramuyun. Magasab ilo ramuyun am mindagu, ‘Polosoon noyo Tuhan mapaintalang ra katulayan Nano am mamayag ramuyun, maa' raginio makakito akai ra akau maansukan.’ Kaa' ilo galama' tauyuon.

MATIUS 10:23

Paat ra akau imboloon ra rondo' pekan, pagiru' no ra pekan ra bokon. Mindagu Aku ramuyun: Ra kalo poyo masuku' min ngaangai' pekan ru Israil, Anak ru Ulun rumatong noyo.

MATIUS 19:14

Indagu i Jisus ra maamaya'-maamaya' Nano, “Polosoo' min lalaing-lalaing no muma' Raki'! Pai' min ingai' ilo sabap ra ulun koson ragitio noyo masauk ra ulun ri Aki Kapuuno'.”

MATIUS 25:34

Raja' ti boo mindagu ra ulun ra pamiris Nano: ‘Akau ondo' binarakat ru Ama' Kuno, ayan kano ra pamarintaan ondo' inaru' ramuyun intor ra tana' ti biningkal.

MATIUS 5:3

“Pakaansuk noyo ulun ondo' makapandai ra ilo masuang tula, sabap ra ilo no ulun ri Aki Kapuuno'.

MARKUS 10:14

Pakakito i Jisus, sangit Io am indagu ra maamaya' Nano, “Polosoo' noyo lalaing-lalaing no matong Raki'! Pai' min ingai' ilo, sabap ra ulun koson ra lalaing-lalaing ti noyo masauk ra ulun ri Aki Kapuuno'.

MARKUS 10:30

am paat ra raino ti ulun no maaru' makaalap maatus poyo ruli'. Maruangan poyo ayanan, pinongkotob ra ungkuyon kapoam ruandu', ina', lalaing-lalaing nano, lanau am umo nano am maimbolo' niayuk. Ra orou tauli no makaalap ulun no ra kaayagan motopot am mantilayun.

LUKAS 21:12

Kaa' io kalo poyo masauk ngaangai' no, rokopon am imboloon kau. Pataakin am uwin kau giu' ra baloi sambayangan, am aputon poyo ra lamin pangaputan. Ibiton kau ra saang ru raja' am niayuk tingganai sabap ra mangintopot kau Raki'.

LUKAS 22:29

Koson niayuk ra Aku inanian ru Ama' Kuno ra kuasa' mamarinta, Aku pana mangani' ramuyun ra kuasa' raginio.

LUKAS 6:20

Tantangi' ri Jisus ngaangai' maamaya' Nano am indagu, “Pakaansuk kano, ondo' musikin, sabap ra akau noyo ulun ri Aki Kapuuno'.

LUKAS 6:22

“Pakaansuk kano ondo' kasisangin, kalo apuon, asabin am raguon ra ulun malaat sabap ra mangintopot kau ra Anak ru Ulun!

JUANIS 15:20

Karaa' min rinagu Kuli; ‘Sangulun ulipon kalo maatang intor ra tuan nano.’ Amon ru nangimbolo' ilo Raki', mangimbolo' ilo niayuk ramuyun. Amon ru ragu Kuli sinugut nilo, ragu mino pana gagayaan nilo.

RINALATAN 5:40

Piawo' nilo saguli' rasul-rasul no, am palapasi' boo am inggalari' ilo manabit ra inggalan ri Jisus. Kopongo ragili pinalabus ilo.

RINALATAN 8:1

I Saulus niayuk nangiou ra namatayan ri Stipanus. Orou ragili niayuk pasimpungan ulun Kristian ra Jirusalim inimbolo' ra maaja'. Ngaangai' ulun nangintopot nantutuliar pagiru' ra Judia am niayuk Samaria, kaa' rasul-rasul ayuk kalo.

2 KORINTUS 4:17

Kapaganan ra kalo maaja' ondo' mailian mai ra sangkinolor ti, magibit ramon ra katulayan mantilayun ondo' maayo poyo toojo intor ra ngaangai' ru kapaganan mai ti.

PILIPI 1:28

Pakakau' kano; pai' kalaa' risilo ondo' mangimbolo' ramuyun. Intor ra ginio mampakito kau ra ilo ti maala am akau makagula', sabap ri Aki Kapuuno' galama' intor ru indangan minti.

2 TIMOTIUS 2:12

Amon ru tumaan takau, makapamarinta takau niayuk mabaya' Riso. Amon ru magali' takau Riso, Io pana magali' ritakau.

2 TIMOTIUS 3:11

Okou nakakito noyo ra ati kulaan ru kaimbalaan am kapaganan kuli. Nakaintutun kou no ra ngaangai' atan ondo' nasauk giu' ra Antiokia, giu' ra Ikonium, giu' ra Listra am ngaangai' ru kaimbalaan kuli. Kaa' binayag aku ru Tuhan intor ra ngaangai' raginio.

JAKUBUS 1:12

Pakaansuk noyo ulun ondo' tumaan paat ra io makatiu' ra pangkinaman. Sabap ra amon ru magula' no ra io kinamin, makaapu io ra ampos no, ioginio, kaayagan ondo' binantu' ri Aki Kapuuno' ra ulun ondo' motogom Riso.

JAKUBUS 5:11

Ilo no piawon takau ra ulun makaansuk sabap ra kinataan ru guang nilai i. Norongog min noyo ati kulaan guang pantataan ri Ayup, am nakapandai kano pupus ru inatang ru Tuhan koson riso. Sabap ra Tuhan no maluoi makaasi' am maayo toojo guang.

1 JUANIS 3:12

Pai' takau tiluo' paliso ri Kain. Nakaaya' io ra Tingganai ru riwato am namatoi io ra boborok nano galama' ondo' ininggalanan ri Abil. Kua potoyo' ri Kain boborok nali? Sabap ra ondo' binaal nali kalo motopot kaa' ondo' binaal ru boborok nali motopot.

PINAINTALANG 2:10

Pai' kano kalaa' ra kaimbalaan ondo' malimanan min ra maagu no. Karaa'! Tingganai ru riwato no mangkinam ramuyun. Mangkinibit io ra kukula' intor ramuyun pasubolon ra pangaputan am mopor ngoorou buoi ru kapaganan mino. Gagaya' ayuk toojo Raki' saboi ra potoyon kau pana, am aniin takamin ra kaayagan mantilayun koson ra ampos ru kamanangan mino.