MATIUS 25:41 - Tanou Moonsoi Timugon

⁴¹ “Mindagu boo raja' no ra ulun-ulun ru kait i: ‘Pagiru' kano intor Raki', akau ulun inulas ri Aki Kapuuno'! Ayan kau ra ralalom apui ra mantilayun ondo' inaru' ra Tingganai ru riwato am malaikat-malaikat nano.

MATIUS 25:41 ပူးပေါင်းရင်းမြစ်များ

MAZMUR 119:115

Akau ulun malaat, inggalur kau raki'. Gumagaya' aku ra panusuban ri Aki Kapuuno' kuno.

MAZMUR 119:21

Sawayon Muno ulun ondo' malilimbau; am magulas ra ulun ondo' kalo gumagaya' ra panusuban Muno.

MAZMUR 139:19

Iou Aki Kapuuno', potoyo' noyo ulun malaat, am painggaluro' noyo ulun-ulun mangalaat intor raki'!

MAZMUR 6:8

Mato kuno majapul am minangkut ra taatangi', ngaangai' no intor ra kinibit ru pantula'-pantula' kuno.

JISAYA 66:24

Bulintok ra ilo muli', makito nilo baangkai-baangkai ru ulun ondo' giminuor Raki'. Ulor mangakan ra baangkai nilono kalo matoi, am apui monolob risilo no kalo malasa'. Pagilayan raginio makalalaa' kaga' ra ngaangai' ulun.”

JIRIMIA 17:5

Indagu Tuhan, “Mangukum Aku ra osoi ayuk ondo' mangiruan Raki', am ondo' malansan ra ulun am niayuk malansan ayuk ra ikang ru ulun ondo' mapandai matoi.

MATIUS 13:40

Koson ra alab no timungon am suruin ra apui, koson niayuk ra Orou Pupus ra tauli no.

MATIUS 13:42

Ilo ngaangai' ti patirin ra apui. Giu' no pasalangis am sakuritot ayuk boo ripon nilono sabap ra maruol kaga'.

MATIUS 13:50

Ilo pana mamatir boo ra ulun malaat no ra ralalom ru apui. Giu' no mantangi' ilo am manguritot ripon nilono.”

MATIUS 18:8

“Amon ru kalindu' kapoam kalayam mangkinibit rirun ra tula, pungguo' am patiri'! Moonsoi makaliman kou ra kaayagan ri Aki Kapuuno' ra sakalinduan kapoam sangkalayaman ayuk, intor ra karuruo kalindu' am kalayam ti mangkinibit rirun patirin ra apui naraka.

MATIUS 25:42

Sabap ra paat ra Aku naitilan am pinaason kalo pinaakan kapoam pinainum min Aku.

MATIUS 25:46

Akau ti ukumin ra ukum mantilayun, kaa' ulun motopot mokoowot ra kaayagan mantilayun.”

MATIUS 3:12

Mampaguut Io ra tapan am mangatap Io. Bilor ti paulion No ra kulapa', kaa' ondo' apol patirin ra apui ondo' kalo malaalasa'.”

MATIUS 4:10

Taam i Jisus, “Pagiru' no, okou Tingganai ru riwato. Mokoondo' tinulisan ra Buuk Kitab, ‘Sambaa' ayuk Tuhan, i Aki Kapuuno' muno, am pangandoi kou ayuk Riso!’ ”

MATIUS 5:22

Kaa' raino ti balain takamin: Osoi ayuk pana sumangit ra pabukat nano, io ti ibiton ra saang ru akim; am osoi ayuk pana magulas ra pabukat nano, io ti ibiton ra Majlis Ugama; am osoi ayuk pana mampiau ra pabukat nano ra ‘malaat’, io ti pasubolon ra naraka.

MATIUS 7:23

Kaa' tumaam Aku risilo, ‘Kalo nakaulig Aku ramuyun! Pagiru' kano intor Raki', akau ulun malaat!’ ”

LUKAS 13:27

Kaa' indagu saguli' tuan no, ‘Kalo makapandai aku ati intor min. Pagiru' kau intor raki', akau ngaangai' ondo' mambaal ra kalaatan!’

LUKAS 16:24

Golok io, ‘Aki Abragam! Pakaasi' no raki'! Susubo' i Lajarus mompososop ra tutulu' nano ra timug pampasalui ra rila' kutu, sabap ra maimbolo' aku toojo ralalom ru apui ti!’

JUANIS 8:44

Tingganai ru riwato no ama' min am maayo guang min gumagaya' ra kasagaan nano. Naintaran ra galing i, mamamatoi io ayuk am kalo igondo' giminagaya' ra katapatan, sabap ra kolondo' katapatan riso. Paat ra io magabau, maya' io ayuk ra paliso nano, sabap ra io no maabau-abau, am puun io ru ngaangai' abau.

2 TISALONIKA 1:7

Am poyo mangani' Io ra katasuan ramuyun ondo' raino ti imboloon, mogondo' niayuk ramon. Gitio saukon Nano paat ra Tuhan Jisus mintalang intor ra suruga' mabaya' ra malaikat mangaikang Nano,

2 TISALONIKA 1:9

Ukumin ilo ra kapatayan mantilayun, pasuayon ilo intor ra Tuhan am intor ra kuasa' matulai Nano.

IBRANI 6:8

Kaa' amon ru sakot am kusingan boo patuwon no, tana' no kolondo' onong am ibatin lair ri Aki Kapuuno' koson ra pusoon solobo'.

2 PITRUS 2:4

Malaikat-malaikat ondo' nambaal ra tula no pana kalo pinoloso ri Aki Kapuuno', kaa' inukuman No, am pinatiran ra naraka. Binangkil ilo ra intok molondom suku' Orou Pangakiman.

1 JUANIS 3:10

Gitio ra kalo nogondo' anak ri Aki Kapuuno' am anak ru Tingganai ru riwato. Osoi kalo mambaal ra motopot, kapoam kalo motogom ra pabukat-pabukat nano, io ti sala' ka anak ri Aki Kapuuno'.