MALIAKI 2:7 - Tanou Moonsoi Timugon

⁷ Imam-imam musiti' toojo mangila' ra atan ondo' motopot intor ri Aki Kapuuno'. Mamagun musiti' matong ra imam-imam koson makapandai ra kasagaan Kuno sabap ilo ulun sinusub ru Tuhan Ondo' Maayo Kaga' Kuasa'.

MALIAKI 2:7 ပူးပေါင်းရင်းမြစ်များ

IMAMAT 10:11

Musiti' min ilaan ulun ru Israil ra ngaangai' ukum ondo' tinaakan Ku noyo ramuyun ondo' pinabala' galing ri Musa.”

SAGULION 21:5

Imam-imam ru bansa' ru Liwi niayuk musiti' mongoi ra giu' no, sabap musiti' ilo mangakim ra moonong baal ondo' makalabit ra kalaatan. Nampili' noyo Tuhan i Aki Kapuuno' min risilo koson mangandoi ayuk Riso am koson mambarakat ra ulun sabap ra inggalan Nano.

2 KORINTUS 5:20

Koson ra ulun sinusub ri Kristus mampasaboi akai ra tanou ti am i Aki Kapuuno' galama' mindagu ramuyun mansail ramon. Ginio ra makitaak akai toojo ra: Polosoo' noyo akau pobonsoyon ri Aki Kapuuno'.

1 TISALONIKA 4:8

Ginio nai ra osoi ayuk kalo mangapu ra pangilaan ti, sala' ka ulun ayuk ondo' kalo apuon nati, kaa' i Aki Kapuuno' galama', ondo' mangani' ra Ambiluo Nano ramuyun.

RINALATAN 16:17

Minaya' io ri Paulus am akai am nompogolok io, kono, “Ulun ragitilo noyo ulipon ri Aki Kapuuno' Ondo' Masawat Kaga'! Minatong ilo ragiti mambala' ramuyun ra ati kulaan akau bayagon ri Aki Kapuuno'!”

IJRA 7:10

Pinataak ri Ijra kaayagan nano koson mintutun ra Ukum ru Tuhan, nambaal raginio am niayuk nangila' ra ngaangai' inaru' am ukum nano ra bansa' ru Israil.

2 TUNUNG RU BANSA' ISRAIL 30:22

Nongompor Raja' Gijkia ra ulun ru Liwi ra katasikan nilo maningganai ra sambayang ra Tuhan. Kopongo tulu' ngoorou ilo nakasia' ra akanon ru pangiantakan am niayuk nampataak ra taak simbalui koson maringkuanang ra Tuhan, i Aki Kapuuno' nilo,

JUANIS 20:21

Indagu poyo i Jisus risilo, “Kaansayan ramuyun. Koson ri Ama' nanusub Raki', Aku pana manusub ramuyun.”

JUANIS 13:20

Balain takamin toojo: Osoi ayuk mangapu ra ulun sinusub Kuno, Aku pana apuon no. Am osoi ayuk mangapu Raki', apuon no niayuk Io ondo' nanusub Raki'.”

MALIAKI 3:1

Tumaam Tuhan Ondo' Maayo Kaga' Kuasa', “Atarin Ku ulun sinusub Kuno koson manampos ra ralan Kuno. Pulusat ru Tuhan ondo' uyumon min, matong ra Baloi ru Tuhan. Ulun sinusub Kuno ondo' inaanin min matong am mampatanou ra nabantuan Kuno.”

AGAI 1:13

Kopongo raginio nampasaboi i Agai ra ragu ru Tuhan risilo ra binantu' noyo ru Tuhan mabaya' risilo.

JIRIMIA 18:18

Kon boo ru ulun, “Ibok no paguguum takau manggal ri Jirimia sabap itakau galama' mokoondo' ra imam ondo' makapangani' ra pangilaan, ulun mapintar makapangani' ra bilin, am nabi ondo' makapampasaboi ra tanou ri Aki Kapuuno' masalok soroi. Ibok no ibito' takau panguwan ri Jirimia, am lumonggo' mangkirongog ra ragu-ragu nano!”

JIRIMIA 15:19

Taam boo Tuhan, “Amon ru sumaguli' kou, apuon Tokou. Masauk kou poyo ra ulipon Kuno. Amon ru mampatanou kou ra tanou ondo' mokoonong am sala' ka ondo' kolondo' ampos, masauk kou saguli' ra nabi Kuno. Ulun matong poyo rirun, am okou kalo pana mongoi risilo.

JISAYA 44:26

Kaa' bulintok ra ulipon Kuno manala', paat ra aku manusub ra ulipon Kuno mapabala' ra inatangan Kuno, baalon Ku panalaan am pangatangan no. Mindagu Aku ra Jirusalim no ayanin saguli' am bandar-bandar ru Jiuda baalon saguli', Bandar-bandar no tumirong intor ra napuutan.

SAGULION 24:8

Paat ra akau marualan ra maruol ru kungkung ondo' makalalaa', baalo' ra matanda' atan ondo' panusuban ramuyun ru imam bansa' ru Liwi. Bayaa' noyo panuluan-panuluan ondo' pinataakan ku noyo risilo.

GALATIA 4:14

Kabalu' pana maruol kuli rondo' pangkinaman toojo ra pangkaraan min, kalo nagasab kapoam nanginggalar kau raki'. Kaa' inuma' min aku koson akau manguma' ra malaikat ri Aki Kapuuno'. Inapu min aku koson akau mangapu ri Kristus Jisus.

JISAYA 42:19

Mokoondo' poyo kia ulun nobolou poyo ra bokon ka ulipon Kuno, kapoam barat poyo ka ulun sinusub Kuno?

UNTABAN 27:21

I Josua musiti' makitaak ra panuluan intor ra Imam Iliajar, am i Iliajar musiti' mangkuot ra kasagaan Kuno ra mamakai ra Urim am Tumim. Kon ragitio noyo ralan ra makapanaak i Iliajar ra panuluan ri Josua am ra ngaangai' ulun ru Israil ralalom ru ngaangai' baal ondo' umaan nilo.”

1 SAMUIL 2:17

Koon raginio noyo karuruo anak ri Ili no makatula ra maayo ra pagilangan ru Tuhan, sabap ra magasab ilo ra taak simbalui no ra tayar ru Tuhan.

2 TUNUNG RU BANSA' ISRAIL 31:4

Suai raginio, raja' niayuk nanusub ra mamagun ru Jirusalim mangani' ra taak-taak ondo' inaru' ra tayar ru imam-imam am ulun-ulun ru Liwi, maa' raginio ngaangai' ru guang nilo mangkara' ayuk ra susuban ru Ukum ru Tuhan.

IJRA 7:25

“Musiti' okou, Ijra, manampakuan ra kapintaran ondo' pinataak ri Aki Kapuuno' rirun. Lantiko' tingganai-tingganai am akim-akim maa' raginio maningganai ra mamagun giu' ra Iprat Kalasaan, ondo' maayag sumugut ra Ukum ri Aki Kapuuno' muno. Musiti' okou mangila' ra Ukum no ra ngaangai' ulun ondo' kalo poyo nakapandai raginio.

AMSAL 5:2

maa' raginio mapandayan mu am mindagu koson ra ulun ondo' mapintar.

JIRIMIA 2:8

Kalo nangkuot imam-imam, ‘Ati boo Tuhan?’ Imam-imam Kuno pana kalo nakaulig Raki'. Panguasa'-panguasa' giminuor Raki'; nabi-nabi minindagu ralalom inggalan ru Baal am sinamba sinungkalalaing ondo' kolondo' onong.”

YEHEZKIEL 7:26

Karaat am tanou malaat matong kalo lulumonggo'. Paat raginio makitaak kau ra nabi-nabi koson mambala' ra pinaintalang, kaa' papalo min ayuk. Imam-imam kolondo' atan-atan pailaan ra ulun, am ulun matutuo nakayaan ra bilin.

DANIL 11:33

Tingganai ru mamagun ondo' mapintar mangindangan ra masuang ulun mokoowot ra pangaratian, kaa' koson kukula' buoi raino ti kukula' ngaulun risilo matoi giu' ra intok pampatayan kapoam solobon saboi matoi. Mokoondo' poyo takawin am saukon ra ulun rinakop.

GOSIA 4:6

Ulun Kuno mapuso sabap ra marara' ilo mangiou Raki'. Akau, imam-imam, kalo mampalio Raki' am nangimpai ra pangilaan Kuno. Ginio ra Aku pana mangimpai ramuyun am kalo mangiou ra anak-anak mino koson ra imam Kuno.

JIPANYA 3:4

Nabi-nabi ru bandar no kalo malansanan am kalo maintopot; imam-imam nampajamol ra atan ondo' pakayon ra tayar ru Tuhan ayuk am napatimpurok ra ukum ri Aki Kapuuno' koson ra kaatangan nilo galama'.

2 RAJA'-RAJA' 16:11

Binaal ri Uria rondo' altar koson raginio, am pinongo no ra kalo poyo siminaguli' Raja' Agas.

2 RAJA'-RAJA' 16:16

Binaal ri Uria nanusuban ru Raja' Agas.

MAMPATANOU 5:5

Pai' polosoo' ragu muno mangkinibit rirun makatula saboi iowon mu kalalaat ra imam ra okou nasala makimabantu'. Kua nua' napasingkual kou ra sangit ri Aki Kapuuno' rirun suku' namuso Io ra ngaangai' kandoi muli?

YEHEZKIEL 22:26

Minanggal imam-imam ra ukum Kuno am kalo mangurumat ra atan ondo' mapasau ra tayar Kuno. Kalo pansalaan nilo atan ondo' mapasau am atan ondo' kalo mapasau. Kalo nangila' ilo ra nansala' ondo' iowon am ondo' inggalarin. Kalo lioon nilo orou Sabat. Kinibit ru ginio ulun ru Israil kalo mangurumat Raki'.

JAKARIA 7:3

Sinusub ilo niayuk mangkuot ra imam-imam am nabi-nabi, “Lakat poyo kia akai musiti' manulaboi ra kapusaan ru Baloi ru Tuhan ra mampali ra moonong sila' kalimo, koson ondo' binaal mai ra bibilor buoi no?”