KOLOSI 3:4 - Tanou Moonsoi Timugon

⁴ Ginio nai ra i Kristus noyo puun ru kaayagan bagu mino. Am paat ra Io paintalangon saguli', makapasimpung kau Riso ra katulayan Nano.

KOLOSI 3:4 ပူးပေါင်းရင်းမြစ်များ

MAZMUR 17:15

Magilong aku Rirun sabap ra kolondo' sala kuno; bulintok ra aku makarat, ratangan Muno makaantak ra guang kuno.

MAZMUR 73:24

Mangila' Kou raki' ralalom ru bilin, am apuon Mu aku ra urumat.

MATIUS 13:43

Baal ru ulun motopot pana makito boo ru ngaangai' koson ra silau ru mato ru orou giu' ra Tana' Bagu ri Aki Kapuuno', Ama' nilono. Rongogo' am karaa' min!”

LUKAS 17:30

Koson niayuk raginio orou ru Anak ru Ulun paintalangon.

JUANIS 11:25

Indagu i Jisus, “Aku noyo mampakaayag ra ulun minatoi am manaak ra kaayagan. Osoi ayuk mangintopot Raki', kabalu' pana matoi ulun no, maayag Io saguli'.

JUANIS 14:3

Mopongo Ku intok min, sumaguli' Aku mongoi pangalap ramuyun, maa' raginio mabaya' kau Raki' ra intok Kuno.

JUANIS 14:6

Taam i Jisus riso, “Aku noyo ralan, katapatan am kaayagan. Kolondo' sangulun pana mokoongoi ri Ama', amon ru kalo mansail io Raki'.

JUANIS 17:24

“Ama', masaga' Aku ilo ondo' pinataak Muli Raki', mabaya' Raki' ra ati ayuk intok Kuno. Maa' raginio makatutun ilo ra Okou mampatulai Raki', sabap ra motogom Kou no Raki' ra tana' ti kalo poyo biningkal.

JUANIS 20:31

Kaa' ngaangai' ti tinulisan noyo, maa' raginio mangintopot kau ri Jisus noyo Mamamayag ondo' sinusub ri Aki Kapuuno' i, ioginio Anak ri Aki Kapuuno'. Sabap ra pangintapatan mino Riso, mokoowot kau ra kaayagan motopot.

RINALATAN 3:15

Akau namatoi Riso, Io ondo' manaak ra kaayagan motopot ra ngaangai' ulun. Kaa' binayag Io saguli' ri Aki Kapuuno' intor ra kapatayan am akai noyo sasi' ra baal raginio.

ROMA 8:18

Intor raginio mangintopot aku ra ngaangai' kaimbalaan ondo' malimanan takau raino kalo sama' pogondoon ra katulayan ondo' paintalangon ri Aki Kapuuno' ritakau ra maagu no.

ROMA 8:19

Ra ngaangai' ondo' pinasauk ri Aki Kapuuno' maginaa ra guang moondom paat ri Aki Kapuuno' mampatalang osoi anak Nano.

1 KORINTUS 1:7

saboi kalo matatakan kau ra atan ayuk pana taak intor ri Aki Kapuuno', buoi min maginaa ra ratangan saguli' ru Tuhan takau, i Jisus Kristus.

1 KORINTUS 15:43

Paat ra io lobongon, baal ru inan no mapasa' am malawo; kaa' paat ra bayagon saguli', baal ru inan no moonsoi am maikang.

2 KORINTUS 4:17

Kapaganan ra kalo maaja' ondo' mailian mai ra sangkinolor ti, magibit ramon ra katulayan mantilayun ondo' maayo poyo toojo intor ra ngaangai' ru kapaganan mai ti.

GALATIA 2:20

Ondo' maayag raino ti sala' ka aku, kaa' i Kristus ondo' soroi ralalom kaayagan kuno. Sauk ru kaayagan kuno raino ti intor ra pangintapatan kuno ra Anak ri Aki Kapuuno' ondo' motogom raki' am nampataak ra painawo Nano sabap ra aku.

PILIPI 3:21

Sabap ra paat ra ratangan saguli' Nano, inan takati ondo' malawo am mapuso ti, kulawon No sumauk ra baguon mogondo' koson Riso. Mabaal No ginio sabap ra Io mokoondo' ra kuasa' ondo' mapatinduku' ra ngaangai' no Riso.

1 TISALONIKA 4:17

Itakau boo ondo' maayag ayuk poyo paat raginio kayangon maya' ra gaun mababaya' risilo, mongoi tuum ra Tuhan giu' ra limbowon. Itakau pana masimpung boo ra Tuhan ra sabuoi-buoi no

1 TIMOTIUS 6:14

suguto' noyo toojo ngaangai' panusuban ragitio mabaya' ra guang mapasau koson kolondo' makapanguu' rirun, suku' ra Orou ratangan ru Tuhan takau i Jisus Kristus.

2 TIMOTIUS 1:1

Aku i Paulus ondo' sinauk ri Aki Kapuuno' ra sangulun rasul ri Jisus Kristus, koson mampatanou ra kaayagan ondo' binantu' ri Aki Kapuuno', ioginio pasimpungan takau ri Jisus Kristus.

2 TIMOTIUS 4:8

Am raino, taak kamanangan maginaa noyo raki'. Tuhan ondo' mangakim ra motopot, mangani' raki' ra taak ti paat ra Orou Pupus no. Pai' ru aku ayuk ondo' mokoowot raginio, kaa' ngaangai' ulun ondo' magiginaa ra ratangan Nano.

TITUS 2:13

Raino ti magiginaa takau ra Orou Kalansanan takau, ioginio papaintalangan ru katulayan ru Tuhan ondo' Maayo Kaga' Kuasa', i Jisus Kristus, Mamamayag takau.

IBRANI 9:28

Koson niayuk i Kristus igondo' ayuk nampataak ra painawo Nano koson mamuso ra tula ru masuang ulun. Matong Io poyo ra kainduo, sala' ka koson mangampun ra tula, kaa' koson mampakaayag risilo ondo' maginaa Riso.

1 PITRUS 1:13

Sabap ra ngaangai' ondo' binaal ri Aki Kapuuno' no ramuyun, kasalok pororoo' pangkaraan min. Pagilalai' min noyo am poyo lansan kano toojo ra kataawan ri Aki Kapuuno' ramuyun paat ra papaintalangan ri Jisus Kristus.

1 PITRUS 5:4

Paat ra ratangan ru Tingganai Magagalung, makapangapu kau ra karaun matulai ondo' manguliat ra mantilayun.

1 JUANIS 2:28

Pabukat kau ngaangai', pagulayun kano simpung ri Jisus Kristus! Paat ra ratangan Nano, makakau' takau toojo muma' Riso, am kalo mansibuni sabap ra mauyu'.

1 JUANIS 3:2

Pabukat kau ngaangai' ondo' tagamin ku! Itakau raino ti anak ri Aki Kapuuno'. Kaa' kalo poyo natutunan toojo atan masauk ritakau ra tauli no. Kaa' nakapandai takau, paat i Jisus Kristus matong saguli', masauk takau koson Riso, sabap ra itakau makakito ra baal ru inan Nano toojo.

1 JUANIS 5:12

Osoi ayuk mokoondo' ra Anak, mokoondo' io poyo ra kaayagan ragitio. Kaa' osoi ayuk kolondo' ra Anak, kolondo' io poyo ra kaayagan ragitio.

JUDAS 1:24

Gama' ru i Aki Kapuuno' ondo' makakuasa' magalung ramuyun intor ra kinibit ru tula, am poyo mompoongoi ramuyun ra katulayan Nano mabaya' ra kaansukan ru guang,

PINAINTALANG 2:7

“Rongogo' am karaa' noyo atan kon ru Ambiluo ri Aki Kapuuno' ra pasimpungan ulun Kristian no! Osoi ayuk mangala ra kuasa' ru kalaatan paakanon Ku io ra kawa' intor ra puun ru mampakaayag ondo' tumuu' ra Pirdaus.”

PINAINTALANG 22:1

Malaikat no niayuk nanulu' raki' ra sungoi ondo' mampakaayag. Sungoi no manguliat koson ra kristal am mugar intor ra takhta ri Aki Kapuuno' am Anak Domba no ra tatanga' ralan ru bandar no. Sapapa'-mansapapa' ra kiing ru sungoi no, mokoondo' puun ru mampakaayag ondo' mangkawa' inggopor am ruo sambilor, ioginio igondo' sambulan. Raun nano alapon pamabas ra bansa'-bansa'.

PINAINTALANG 22:14

Pakaansuk noyo ilo ondo' mampupu' ra sukub nilono suku' mapasau, bagu no makaakan ilo ra kawa' intor ra puun ru mampakaayag am maya' ra umpasan sumubol ra bandar no.