KOLOSI 1:10 - Tanou Moonsoi Timugon

¹⁰ Kon raginio boo ra maayag kau sumugut ra kasagaan Nano am makapapabansuk ra guang Nano, ioginio kaayagan min magibit ra nansalinut baal moonsoi am mulu' poyo makaintutun kau ri Aki Kapuuno'.

KOLOSI 1:10 ပူးပေါင်းရင်းမြစ်များ

AMSAL 16:7

Amon ru mangansuk kau ra guang ru Tuhan, ngaangai' pantula' masauk min ra rangan.

JISAYA 53:11

Mopongo maimbolo', maansukan io saguli'; makapandai io ra kaimbalaan nano mokoonong toojo. Ulipon Kuno, ondo' gumagaya' am ondo' iowon Kuno, Magiba' ra ukuman ru ulun masuang; am sabap io, Aku mangampun risilo.

DANIL 12:4

Kon ru malaikat no raki', “Raino, okou Danil, puruno' am saapi' ra meterai kitab no, saboi ra orou pupus. Masuang ulun kuminam makarati' ra baal ondo' tatanga' masauk, kaa' pirot nilono kolondo' onong.”

MIKA 4:5

Moonong bansa' sumamba am gumagaya' ra dewa nilo galama', kaa' itakau sumamba am gumagaya' ra Tuhan, i Aki Kapuuno' takau ra sabuoi-buoi no.

ABAKUK 2:14

Kaa' koson ra raat ondo' nototop ra timug, koson raginio noyo ra tana' ti pana mososok ra ulun ondo' makaulig ra Tuhan am kuasa' Nano.

JUANIS 15:16

Pai' ru akau nampili' Raki', kaa' Aku noyo nampili' ramuyun am inaru' takamin mongoi ra ati-ati ayuk am manangkawa' ra maawas, am kawa' mino tumilayun. Atan ayuk kitaakon min ralalom ru inggalan Kuno, aniin kau ri Ama'.

JUANIS 15:8

I Ama' katulayon ra akau manangkawa' ra maawas; gitio noyo ra akau mauligan ra maamaya' Kuno.

JUANIS 17:3

Gitio noyo kaayagan motopot am mantilayun; ra makaulig ilo Rirun, i Aki Kapuuno' ondo' motopot, am poyo i Jisus Kristus ondo' sinusub Mutu.

ROMA 1:13

Pabukat kau ngaangai', masaga' aku makapandai kau ra ingkula' noyo aku pangatang mongoi ramuyun, kaa' masalok mokoondo' ayuk mongompong raki'. Moogot aku magibit ra ulun ra intok mino mangintopot ri Kristus, mogondo' ra ulun sala' ka Jaudi ra intok ra bokon.

ROMA 4:12

I Abragam niayuk koson ra ama' ru ngaangai' ulun sinunatan, sala' ka ra sunat nilo ayuk, kaa' niayuk ra pangintapatan nilai ti mogondo' ra pangintapatan ri Abragam ra io kalo poyo sinunatan.

ROMA 6:4

Paat ra itakau riniu', ginio noyo koson ra itakau pana linobong mabaya' Riso am magapu ra pinatayan Nali. Maa' raginio, mogondo' ri Kristus binayag intor ra kapatayan ralalom ru kuasa' matulai ri Ama', koson niayuk itakau makaili' ra kaayagan bagu.

2 KORINTUS 2:14

Kaa' maringkuanang aku ri Aki Kapuuno'! Masalok Io maningganai ramon koson mokoowot ra kamanangan, sabap ra pasimpungan mai ri Kristus. Magibit Io ramon mampabala' ra tanou ri Kristus ra ati ayuk pana, am tanou raginio koson ra owou maamis.

2 KORINTUS 4:6

Minindagu i Aki Kapuuno', “Kasauk noyo sinda ra kalandaman.” I Aki Kapuuno' niayuk ondo' mampakasinda ra guang mai, koson makaintutun akai toojo ra katulayan Nano ondo' simininda ra bulos ri Kristus.

2 KORINTUS 5:9

Kaa' ondo' kasaa' toojo, masaga' akai ayuk mampakatasu' ra guang Nano, iou pana soroi akai ra inan mai ra tana' ti, kapoam giu' ra ayanan ru Tuhan.

2 KORINTUS 9:8

Kalo lumonggo' i Aki Kapuuno' mambarakat ramuyun, maa' raginio akau galama' masalok maukapan am malabaan kau niayuk koson makapangani' ra osoi ayuk makakaatangan raginio.

IPISUS 1:17

Makiasi' aku ri Aki Kapuuno', Ama' ra kolondo' pogondo', ioginio Ama' ru Tuhan takau i Jisus Kristus, maa' raginio mangani' ramuyun ra Ambiluo Nano. Io no mampasauk ramuyun mapintar am niayuk paintalangon No ramuyun osoi Io koson totopot kau makaulig Riso.

IPISUS 2:10

I Aki Kapuuno' noyo nambaal ritakau, am sabap ra pasimpungan takau ri Kristus Jisus, nangatang Io ra kiralan ru kaayagan takau koson mambaal ra moonsoi. Gitio ondo' tinampos no kalalair ra pabaalin ritakau.

IPISUS 4:1

Ginio sabap ra aku ti ondo' inaput sabap ra mangandoi ra Tuhan, makitaak toojo ramuyun ra kaayag kano maya' ra atan ondo' inaru' noyo ri Aki Kapuuno' paat ra Io nampiau ramuyun.

IPISUS 4:13

Koson raginio ra pangintapatan am kapandayan takau ngaangai' ra Anak ri Aki Kapuuno' no mogondo' ayuk. Masauk takau ra ulun maikang pangintapatan, ondo' buoi-kabuoi, makatilu ra paliso ri Kristus.

IPISUS 5:10

Pirot kano maguyum ra atan ondo' mampakatasu' ra guang ru Tuhan.

IPISUS 5:15

Ginio ra ilai' min toojo ati kulaan baal ru kaayagan mino. Pai' kau koson ra ulun bungas, kaa' kapintar kano.

IPISUS 5:2

Kaayag kano sumugut ra togom, mogondo' ri Kristus nonogom noyo ritakau ra Io nampataak ra painawo Nano sabap ra itakau. Nasauk Io koson ra taak simbalui ra maamis owou ondo' mampakatasu' ra guang ri Aki Kapuuno'.

PILIPI 1:11

Intor raginio, kaayagan mino mauli' ra baal topot-topot moonsoi ondo' kondoyon ri Jisus Kristus, am bagu raginio katulayon am omporon boo i Aki Kapuuno'.

PILIPI 1:27

Raino ondo' maatang toojo, kaayag kano sumugut ra Tanou Moonsoi ri Kristus. Maa' raginio, maampon ru moongoi takamin kailai' kapoam kalo, morongog takamin niayuk ra mingkotog kau poyo koson rondo' ayuk pangintapatan am niayuk rondo' guang min. Maa' raginio, makakau' kau mampabala' ra pangintapatan ondo' inimpuun ra Tanou Moonsoi no.

PILIPI 4:18

Am raino suang ru pinataak min raki' i, mauli' poyo toojo intor ra kaukapan kuno. Am ngaangai' no pinasuku' noyo raki' ri Ipaproditus. Ondo' pinataak mino raginio, mogondo' ra taak maamis owou, am koson ayuk ra taak simbalui pataakon ri Aki Kapuuno' ondo' mampakatasu' ra guang Nano.

KOLOSI 2:19

Ilo kalo boo mampaguut ra pangilaan motopot ra osoi i Kristus. I Kristus noyo ondo' maningganai ra inan, ioginio pasimpungan ulun Kristian, am maya' ra paningganayan nano, ilo pogondoon guang am mulu' poyo kaayagan nilo tumilu ra kasagaan ri Aki Kapuuno'. Gitio mogondo' ra inan takati ondo' tingganayon ru ulu am pasimpungon ru parangaban, tumuu'.

KOLOSI 2:6

Inapu min noyo i Jisus Kristus koson ra Tuhan min. Ginio ra kaayag kano sumimpung mabaya' Riso.

KOLOSI 3:20

Anak kau ngai', moonsoi sumugut kau ra karuo matuo mino sabap ra gitio noyo paliso ru sangulun Kristian ondo' mampakatasu' ra guang ri Aki Kapuuno'.

KOLOSI 4:5

Kapintar kano paat ra akau lumatok ra ulun ondo' kalo mangintopot no. Kaluagan raginio alapon min mampakito risilo ra akau maamaya' ri Kristus.

1 TISALONIKA 2:12

Sinawai, sinimayo am kinimaitan takamin koson maayag kau sumugut ra kasagaan ri Aki Kapuuno', ondo' mampiau ramuyun makaliman ra Tana' Bagu ri Aki Kapuuno' am katulayan Nano.

1 TISALONIKA 4:1

Pabukat ku ngai', pupus no, nangani' akai no ramuyun ra tiluan moonsoi ra ati koson ru kaayagan ondo' mapabansuk ra guang ri Aki Kapuuno' am ginagaya' min noyo ginio. Kaa' raino, ralalom inggalan ri Tuhan Jisus, kitaakon am kimaitin takamin mirot poyo toojo mapabansuk ra guang ri Aki Kapuuno'.

2 TIMOTIUS 2:4

Sangulun saujor kalo sumiang io mambaal ra kaatangan nano galama' paat ra lakat poyo mangandoi ra saujor, sabap ra masaga' io mapabansuk ra tingganai nano.

TITUS 3:1

Pakaraa' noyo ulun muno ondo' mangintopot no ra gumagaya' ra tingganai am pamarinta no, koson masaga' toojo mambaal ra atan ayuk kandoi moonsoi.

TITUS 3:14

Ulun takau musiti' migigila' ati kulaan mambaal ra moonsoi. Ginio makapangindangan toojo ra ulun ondo' kolondo' kaukapan am mambaal ra kaayagan nilo pana makaampos.

IBRANI 11:5

Sabap ra pangintapatan noyo i Ginok kalo minatoi, kaa' kalo boo nakito io ru ulun, sabap ra kinayang io ri Aki Kapuuno' ra suruga'. Tinulisan noyo ra Buuk Kitab ra napabansuk io ra guang ri Aki Kapuuno' ra io kalo poyo kinayang ra suruga'.

IBRANI 13:16

Pai' kano pakalilian mambaal ra moonsoi am mangindangan ra rondo' am bokon, sabap raginio noyo koson ra taak simbalui ondo' mapabansuk ra guang ri Aki Kapuuno'.

IBRANI 13:21

Gama' ru mangani' Io ramuyun ra moonong baal moonsoi, koson makapambaal kau ra kasagaan Nano. Gama' ru ralalom ri Jisus Kristus noyo, mampasauk Io ra kasagaan Nano ralalom kaayagan takau. Musiti' takau mongompor ri Kristus ra sabuoi-buoi no! Amin.

2 PITRUS 1:8

Amon ru ngaangai' ru ginio ruangin ra kaayagan min, maaru' kapandayan min intor ri Jisus Kristus, Tuhan takau, sumingkot am mokoonong.

2 PITRUS 3:18

Kaa' pai' min noyo labusi' togom tinaakan ri Jisus Kristus, Tuhan am Mamamayag takau, am pakaulig poyo toojo Riso. Gama' ru omporon Io raino am ra sabuoi-buoi no. Amin.

1 JUANIS 3:22

Am atan ayuk kitaakon takau intor Riso makaapu takau, sabap ra gumagaya' takau ra susuban Nano am mambaal niayuk ra kaansukan ru guang Nano.

1 JUANIS 5:20

Nakapandai takau ra minatong noyo Anak ri Aki Kapuuno' am nangani' ritakau ra kaintutunan koson makaulig takau ri Aki Kapuuno'. Maayag takau sumimpung ri Aki Kapuuno' am niayuk i Jisus Kristus. Io noyo i Aki Kapuuno' ondo' motopot, am gitio noyo kaayagan motopot am mantilayun.

3 JUANIS 1:6

Togom muno tinunung nilo ra pasimpungan ulun Kristian giti ra intok mai galama'. Moonsoi indangano' ilo manunggul ra pangkiralanan nilono, maa' raginio maansukan i Aki Kapuuno'.