KASAUKAN 4:14 - Tanou Moonsoi Timugon

¹⁴ Paugaron Mu aku ra tana' ti, am intor ra saang Muno. Masauk aku boo ra sangulun tumanggau ondo' kolondo' intok ra tana' ti am potoyon aku ru osoi ayuk makatuum raki'.”

KASAUKAN 4:14 ပူးပေါင်းရင်းမြစ်များ

KASAUKAN 3:24

Giu' boo ra tampilon sirangon ru Taman no, Tuhan i Aki Kapuuno' napaayan ra kirub am rondo' ilang makaapui ondo' lumibut ra ngaangai' intok koson mantamung ra puun ondo' mangani' ra bayag. Ginio ra kolondo' sangulun pana makasubol am makainggaar ra puun raginio.

KASAUKAN 4:13

Indagu boo i Kain ra Tuhan, “Ukuman ti maagat nai kaga', kalo makasaan aku.

2 SAMUIL 14:7

Raino, ngaangai' ru sasambaloi kuno mantula' raki', am mansika' maa' raginio pataakon ku anak kuli ondo' namatoi no risilo. Masaga' ilo mangukum riso ra ukuman matoi sabap ra namatoi io noyo ra pabukat nano. Amon ru pataakon ku anak raginio, aku kolondo' boo anak. Mamuso ilo ra kalansanan kuno ra rondo' no ayuk am kalo manatang ra sangulun anak ungkuyon ra ralaki kuli koson manunggul ra papag nano.”

MAZMUR 109:10

Polosoon noyo ngaangai' anak nano masauk ra makikitaak ondo' kolondo' ayanan, am inanjung intor ra baloi nilo ra napuut no.

MAZMUR 109:12

Polosoon noyo kolondo' ulun gumonsoi riso, kapoam motogom ra ngaangai' anak ondo' tinatang nano.

MAZMUR 143:7

Taamo' aku mataki', iou Tuhan, malawo guang kuno. Pai' pansibuni intor raki', maa' raginio kalo masauk aku koson ra ulun nakatuun noyo ra intok kapatayan.

AMSAL 14:32

Ulun malaat matoi sabap ra kalaatan nilo galama'; ulun moonsoi masindungan sabap ra kabanisan ru guang nilo.

AMSAL 28:1

Ulun malaat masimbul kabalu' pana kolondo' ulun mangilou risilo, kaa' ulun mabanis guang baani koson ra singa'.

JISAYA 8:22

kapoam manginduku' ra ragana', kolondo' atan-atan makito ondo' ak am kapaganan am kalandaman am niayuk kasilukan ondo' kumapit. Patirin ilo ra intok molondom kaga'.

JIRIMIA 52:3

Siminangit kaga' Tuhan ra mamagun ru Jirusalim am Jiuda saboi pinagiru' No ilo am kalo boo nanindung risilo. Giminuor Raja' Jidikia ra Raja' Nibukadnijar intor ra Babilonia.

GOSIA 13:3

Ginio ra lumiot ilo koson ra gaun mapulak kapoam bolobou paat ra susuab ti. Masauk ilo koson ra apol ondo' siabin ru angin intor ra intok pangagikan ra gandum, am koson ra lisun ondo' miningkual intor ra intok no.

IMAMAT 26:17

Manggal Aku ramuyun saboi kalaan kau ru pantula'. Kuasaan kau ru ulun ondo' masisang ramuyun, am malaa' kau kaga' saboi magiru' kau kabalu' pana kolondo' ulun mangilou ramuyun.

IMAMAT 26:36

“Mangkinibit Aku ramuyun ondo' pinatiran giu' pagun ru bokon malaa' kaga', saboi bolos ru raun ondo' siniob ru angin pana mangkinibit ramuyun magiru'. Magiru' kau saboi ilain ayuk ilowon ru pantula' ralalom pangayawan, am maratu' kau kabalu' pana kolondo' pantula' mamaar ramuyun.

UNTABAN 35:19

Pabukat mamaar ru ulun ra minatoi no pinalansanan mapaugar ra ukuman matoi no. Paat ra pabukat raginio makatuum ra namatoi no, musiti' io mamatoi ra ulun no.

UNTABAN 35:21

kapoam linuntug io, ulun no mamatoi am musiti' ukumin ra matoi. Pabukat mamaar ru ulun minatoi no pinalansanan mapaugar ra ukuman matoi ra mamatoi no. Paat ra pabukat raginio makatuum ra mamatoi no, musiti' io mamatoi ra ulun no.

UNTABAN 35:27

am amon ru natuum io am pinatoi ru pabukat ru ulun ondo' minatoi noyo, pinambalos raginio sala' ka pamatayan.

MATIUS 25:41

“Mindagu boo raja' no ra ulun-ulun ru kait i: ‘Pagiru' kano intor Raki', akau ulun inulas ri Aki Kapuuno'! Ayan kau ra ralalom apui ra mantilayun ondo' inaru' ra Tingganai ru riwato am malaikat-malaikat nano.

MATIUS 25:46

Akau ti ukumin ra ukum mantilayun, kaa' ulun motopot mokoowot ra kaayagan mantilayun.”

SAGULION 28:64

Pantutuliaron kau ru Tuhan ra gino ngai' ru bansa'-bansa' ra titikop ru tana' ti. Giu' no mangandoi kau ra tuhan-tuhan ondo' binaal intor ra tataun am batu, tuhan-tuhan ondo' kalo igondo' kau samba kapoam sinamba ru kinamatuaan min.

SAGULION 28:65

Ra gino ngai' ru bansa'-bansa', kalo makaalap kau ra kamiaan am kolondo' intok ondo' maalap min kasabit ra akau tatangan; Tuhan mangkinibit ramuyun magalabo, malawo guang am malaa'.

2 TISALONIKA 1:9

Ukumin ilo ra kapatayan mantilayun, pasuayon ilo intor ra Tuhan am intor ra kuasa' matulai Nano.