KASAUKAN 4:10 - Tanou Moonsoi Timugon

¹⁰ Indagu boo Tuhan, “Kua kia baalo' mu baal makalalaa' ti? Raraa' ru boborok muno nampalaa Raki' intor ra tana', koson ra bolos ondo' mampalaa makitaak ra pakimasian.

KASAUKAN 4:10 ပူးပေါင်းရင်းမြစ်များ

KASAUKAN 18:20

Indagu boo Tuhan ri Abragam, “Makapanguwan ra maagat kaga' ra bandar Sodom am bandar Gomora am tula nilono maayo kaga'.

KASAUKAN 3:13

Pangkuot Tuhan i Aki Kapuuno' ra ruandu' no, “Kua guat baalo' mu ginii?” Taam io, “Rinuung aku ru kukuo saboi inakan ku kawa' no.”

KASAUKAN 9:5

Amon sangungulun ondo' mamatoi ra ulun, ukumin Ku io ra matoi. Ukumin Ku ra potoyon atan ayuk bibiag ondo' mamatoi ra ulun.

2 RAJA'-RAJA' 9:26

‘Rondom i nakakito Aku ra namatayan ri Nabot am anak-anak nano. Raino bantuon Ku ra mangukum Aku rirun ragiti, ra tana' ragitio niayuk.’ Ginio ra alapo' baangkai ru Raja' Joram, am patiri' ra tana' ondo' ragili longgom ri Nabot, maa' raginio masugut ukuman ri Aki Kapuuno' no riso.”

2 TUNUNG RU BANSA' ISRAIL 28:9

Sangulun nabi ru Tuhan ininggalanan ri Odid minayan giu' ra bandar Samaria. Nakauma' io ra saujor ru Israil ondo' siminaguli' nagibit ra ulun rinakop intor ra Jiuda. Paat ra saujor-saujor sumubol ra bandar, kon ri Odid risilo, “Tuhan, i Aki Kapuuno' ru kinamatuaan min, siminangit ra mamagun ru Jiuda. Ginio boo ra nompoloso io ramuyun nangala risilo. Kaa' nokorongog Io noyo ra mapara' laat min namatoi risilo.

AYUP 16:18

Okou tana' ti, kalaatan raki' pai' sibunio'. Pai' pongkororo' golok kuno makitaak ra katimpakan.

AYUP 24:12

Giu' ra bandar morongog tangi' ru ulun ondo' napilatan, am ulun ondo' matipamukat, kaa' kalo rinongog ri Aki Kapuuno' pakiasian nilo.

MAZMUR 50:21

Ginio noyo baalon mino, kaa' mongkoror Aku ayuk, pangkaraan min koson Aku niayuk ramuyun. Kaa' raino mansiwou Aku ramuyun, am saukon Ku baal raginio maalap min intopoto'.

MAZMUR 72:14

Raja' mamayag risilo intor ra pangimbalaan am pampatayan; kaayagan nilo mokologo toojo riso.

MAZMUR 9:12

Koompor kono Tuhan ondo' namarinta ra Sion! Potonowo' noyo binaal Nano ra moonong bansa'!

MAZMUR 9:13

Mangkara' i Aki Kapuuno' risilo ondo' naimbolo'; kalo malilianan No tangi' nilono, ukumin No ulun ondo' mangimbolo' risilo no.

KAINGKUALAN 3:7

Indagu boo Tuhan, “Nakito Ku noyo kaimbalaan ru bansa' Kuno giu' ra Misir. Naining Ku noyo ilo naguros makilabus intor ra ulun-ulun nangulipon no. Sotopot no nakatutun Aku noyo ra ngaangai' kaimbalaan nilo.

JISAYA 5:7

Israil no umo ru anggur ru Tuhan Ondo' Maayo Kaga' Kuasa'; ulun ru Jiuda no puun ru anggur ondo' tinanom Nano. Malansan Io risilo mambaal ra moonsoi, kaa' baalon nilono mampatoi. Malansan Io risilo mambaal ra motopot, kaa' ondo' maining no bolos ru ilo ondo' makitaak ra katimpakan.

UNTABAN 35:33

Baal raginio mapajamol ra tana' intok ayanan mino. Pamatayan mapajamol ra tana' mino, am kolondo' ralan ra bokon ondo' makapasau ra tana' no ondo' ayuk am kapatayan ru ulun mamatoi no galama'.

RINALATAN 5:3

Indagu i Pitrus riso, “Ananias, kua polosoo' mu Tingganai ru riwato mangkinibit rirun magabau ra Ambiluo ri Aki Kapuuno', ra inalap mu santayaran ra ruit ru tana' tinalan muli?

RINALATAN 5:9

Indagu i Pitrus riso, “Kua pampakat kau mansawo nangkinam ra Ambiluo ru Tuhan? Ilai'! Ulun ondo' nompolobong ra ralaki muli nakasaguli' noyo. Okou po paingkualon nilo.”

SAGULION 21:1

“Amon mapandayan sangulun pinatoi giu' ra padang, giu' ra tana' ondo' pataakon ramuyun ru Tuhan i Aki Kapuuno' min, am kalo makapandai kau osoi namatoi ra ulun no,

IBRANI 11:4

Sabap ra pangintapatan noyo, i Abil nampataak ri Aki Kapuuno' ra taak simbalui ondo' moonsoi poyo intor ra taak ri Kain. Sabap ra pangintapatan nali iniou io ri Aki Kapuuno' koson sangulun motopot, sabap ra taak nali napabansuk ra guang ri Aki Kapuuno'. Kabalu' pana lair noyo io minatoi, kaa' lakat poyo migigila' takau ra tiluan ru pangintapatan nali.

IBRANI 12:24

Mininggaar kau ri Jisus ondo' nampasauk ra nabantuan nakabagu ti, am pinatayan Nali magibit ritakau mobonsoi ri Aki Kapuuno', sala' ka koson ra pinatayan ri Abil ra galing i ondo' makimambalos.

JAKUBUS 5:4

Kalo nampagaji' kau ra ulun ondo' nanantab ra bilor mino. Rongogo' noyo tangi' ru nangkausan nilai ti! Bobolos ru nanantab no naining noyo ri Aki Kapuuno' Ondo' Maayo Kaga' Kuasa'.

JOSUA 7:19

Indagu i Josua riso, “Okou anak kuno, raguo' noyo ra motopot ra saang ru Tuhan i Aki Kapuuno' ru Israil am pangiou noyo. Raino pambala' raki' ra atan binaal muno. Pai' bunio' baal raginio intor raki'.”

1 SAMUIL 13:11

kaa' nangkuot i Samuil, “Atan kia binaal mu noyo?” Taam Raja' Saul, “Nakakito aku ra mamagun tumalimpuun noyo mangiruan raki', am okou kalio minatong ra paat ondo' inaru' muli. Mulu' poyo ra timinimung noyo ulun ru Palistin giu' ra Mikmas.