am indagu, “Tuan, apit kau poyo ra baloi kuno. Makapambagu' kau ra kalayam am makakaalangan kau. Susuab no, rumondom kau sukal am rayusin min boo pangkiralanan min.” Kaa' taam ilo, “Kalo pana, mombolong akai ayuk ragiti padang ru bandar ti.”
Paat ra suabon no, rondomo' anii' ri Abragam i Agar ra akanon am rondo' kantungan ru kungkung sinuangan ra timug. Paibaa' no anak no ri Agar am paugaro' no ruandu' no. Ongoi boo i Agar ra tana' kaagisan ru Birsyiba.
Ginio ra pagibot no ragiti ra saang ri Aki Kapuuno' ra kalo mamparuung kou raki', anak-anak kuno kapoam papag kuno. Koson raki' minonsoi rirun, koonsoi niayuk raki' am tana' inayanan muti.”
Paat ra suabon no, rinondom ri Abragam nampalapak ra luton koson ponolob ra taak simbalui am pobongkoso' no ra kaladai nano. Ugar io nabaya' ri Isak am karuo ngaulun ulipon nano ra intok ondo' rinagu ri Aki Kapuuno' riso i.
Katawang ra susuab no, pintor alok i Laban ra akupu-akupu nano am anak-anak ruandu' nano am pambarakat poyo risilo, am ugar boo i Laban saguli' ra baloi nali.
Paat orou raginio mangalawo ulun ru Israil ra nangaitilan sabap ra Raja' Saul nagibot koson ragitio, “Kaulas noyo ulun ondo' mangakan ra atan pana ra orou raiti', ra kalo poyo mansuli' aku ra pantula'.” Ginio ra kolondo' sangulun pana ondo' nangakan buoi ru orou raginio.
Taam i Daut, “Nakapandai ama' muno ra motogom kou kaga' raki'. Ginio ra kalo nambala' ama' muno rirun ra atan ondo' inatang nano, maa' raginio kalo mangiluk guang muno. Magibot aku ralalom inggalan ru Tuhan ondo' naayag ra sotopot no kaayagan kutu matikapulir ra kapatayan!”
Pangkuot i Daut riso, “Masaga' kou kia magibit ramon ra intok ru ulun raginilo?” Taam io, “Masaga' aku. Kaa' musiti' kou magibot ralalom inggalan ri Aki Kapuuno' ra kalo mamatoi kou raki' kapoam mapataak raki' ra tuan kuli.”