KASAUKAN 24:27 - Tanou Moonsoi Timugon

²⁷ Indagu io, “Koompor noyo Tuhan i Aki Kapuuno' ru tuan kuli i Abragam totopot nampaguut ra bantu' Nano ra tuan kuli i Abragam. Inibit aku ru Tuhan parampuso' ra pabukat ru tuan kuli.”

KASAUKAN 24:27 ပူးပေါင်းရင်းမြစ်များ

KASAUKAN 13:8

Indagu i Abram ri Lot, “Ito ti mabukat, kalo moonsoi amon ru mansasangor ulun-ulun muno am ulun-ulun kuno.

KASAUKAN 14:20

Koompor noyo i Aki Kapuuno' Ondo' Masawat Kaga' no, ondo' nanaak rirun ra kamanangan intor ra pantula'-pantula' muno.” Tayari' boo ri Abram i Milkisidik sampiopor intor ra ngaangai' kuliamos ra inalap am inibit nali saguli'.

KASAUKAN 24:12

Pakiasi' io, “Tuhan i Aki Kapuuno' ru tuan kuno i Abragam, indangano' aku maa' ra indangan Muno makaampos baalon kuno orou raiti' am guuto' toojo bantu' Muno ra tuan kuno.

KASAUKAN 24:21

Mangimansa' ulipon ri Abragam ra ralaa no ra kalo minindagu ra atan pana. Masaga' io makapandai koson mangintutun ra inanian io kia ru Tuhan ra kasugutan.

KASAUKAN 24:4

Musiti' kou sumaguli' ra pagun naganakan raki' i am panambili' ra anduon ri Isak anak ungkuyon kutu intor ra gino ngai' ru pabukat kuno ayuk poyo.”

KASAUKAN 24:42

“Paat ra aku nakasaboi ra tulubong ra orou raiti', pakiasi' aku, ‘Tuhan i Aki Kapuuno' ru tuan kuli i Abragam, Indangano' aku manugut ra atan ayuk baalon kutu.’

KASAUKAN 24:48

Igulatur aku boo samba ra Tuhan am pongompor aku Riso, i Aki Kapuuno' ri Abragam tuan kuli. Inindangan No aku narampus ragiti, intok ru pabukat ru tuan kuli saboi nakatuum aku ra ralaa ti koson anduon ru anak nano.

KASAUKAN 32:10

Kalo maaya' aku mangapu ra ngaangai' togom am gagaya' Muno ondo' pinakito Muno raki', ulipon Mutu. Susukur kutu ayuk inibit ku liminaup ra Sungoi Jordan, kaa' raino siminaguli' aku ra ruo ngampulalayan ti.

KASAUKAN 32:11

Makiasi' aku toojo Rirun ra bayagon Mu aku intor maayo kuno i Isau. Malaa' aku ra maaru' matong io pampaluus ramon ngaangai', niayuk ruandu' am lalaing.

KASAUKAN 9:26

Koompor noyo Tuhan i Aki Kapuuno' ri Siim! Masauk i Kanaan ra uliponon ri Siim!

2 SAMUIL 18:28

Golok i Agimaas koson manabi' ra raja', am igulatur am indagu, “Koompor noyo Tuhan, i Aki Kapuuno' muno. Nangani' io noyo rirun ra kamanangan ra ulun ondo' giminuor rirun!”

MAZMUR 100:5

Tuhan no moonsoi; Tagamin No ulun Nano am gagayaan No ilo ra sabuoi-buoi no.

MAZMUR 68:19

Magaloi Io ra intok masawat, magibit ra ulun masuang ondo' rinakop mababaya' Riso, am mangapu ra taak intor ra ulun mangalaat. Tuhan i Aki Kapuuno' mayan ra giu'.

MAZMUR 98:3

Suguton No bantu' Nano ra ulun ru Israil, ulun Nano ralalom ru katagaman am gagaya' Nano risilo. Ngaangai' bansa' ra titikop ru tana' ti nakakito noyo ra kamanangan ri Aki Kapuuno' takau.

KAINGKUALAN 18:10

Indagu io, “Omporo' noyo Tuhan ondo' namayag ramuyun intor ra raja' am ulun ru Misir. Omporo' noyo Tuhan ondo' namayag ra ulun Nano intor ra uliponon!

KAINGKUALAN 2:11

Paat ri Musa nasukor noyo, ingkual io koson mongoi pagilong ra ulun ru Ibrani ondo' rondo' bansa' riso. Nakito no ati kulaan ilo jinajalan mangandoi ra maagat. Nakito niayuk ri Musa ra napalamba' sangulun Misir ra sangulun Ibrani ondo' rondo' bansa' ri Musa galama'.

KAINGKUALAN 2:13

Suabon ragili ongoi poyo i Musa ra giu' no, kakito no boo ruo ngaulun Ibrani mansangor. Kuati' ri Musa ulun ondo' makasala no, “Kua lambaa' mu ulun ondo' mogondo' ra bansa' muno galama'?”

KAINGKUALAN 34:6

Pansail boo Tuhan ra saang ri Musa am indagu, “Aku Tuhan i Aki Kapuuno' ondo' napanu' ra asi' am kimasi'; kalo mataki' Aku sumangit, mapakito Aku ra togom am gagaya' ondo' maayo.

AMSAL 3:6

Karaa' noyo Tuhan ralalom nansalinut baalon muno, am manulu' Io rirun ra ralan ru kaayagan moonsoi.

AMSAL 8:20

Mugar aku ra ralan kabanisan ru guang, am maya' ra ralan katimpakan.

MIKA 7:20

Mampakito Kou ra gagaya' Muno am togom Muno ondo' mantilayun ra ngaangai' ulun Muno, papag ri Abragam am Jakub, koson ondo' binantu' Muli ra kinamatuaan mai ra galing i.

LUKAS 1:68

“Omporo' takau no i Aki Kapuuno', Tuhan ru ulun ru Israil, sabap ra minatong Io mangindangan am mampalabus ra ulun Nano.

JUANIS 1:17

Pinabala' galing ra nabi Musa, pinataak ri Aki Kapuuno' ritakau Ukum ri Musa, kaa' ralalom inggalan ri Jisus Kristus, pinakito ri Aki Kapuuno' ritakau togom am pampagagayaan Nano.

IPISUS 1:3

Paringkuanang takano ri Aki Kapuuno', io no Ama' ru Tuhan takau i Jisus Kristus. Sabap ra ralalom pasimpungan takau ri Kristus, nangani' Io no ritakau ra nansalinut barakat ralalom ru Ambiluo Nano ondo' intor ra suruga'.

1 TIMOTIUS 1:17

Io Raja' ra mantilayun, kalo mapuso am poyo kalo maalap kakito, Io no rorondo' ayuk i Aki Kapuuno'. Urumato' am omporo' takau i Aki Kapuuno' ra sabuoi-buoi no. Amin.

RUT 4:14

Ruandu'-ruandu' ra giu' no mindagu ri Naomi, “Koompor noyo Tuhan! Orou raiti', nanaak io rirun sangulun akupu ondo' nagalung rirun. Gama' ru mauligan kaga' anak no giu' ra Israil ra tauli no.

1 SAMUIL 25:32

I Daut pana mindagu boo riso, “Koompor noyo Tuhan, i Aki Kapuuno' ru ulun ru Israil, ondo' nanusub noyo rirun mongoi raki' ra orou raiti'!

1 SAMUIL 25:39

Pokorongog i Daut ra minatoi noyo i Nabal, indagu io, “Koompor noyo Tuhan! Binalasan No noyo i Nabal sabap ra pagasaban nali raki'. Nanginggalar noyo Tuhan no raki', ulipon Nati intor ra mambaal ra kalaatan. Tuhan galama' nangukum noyo ri Nabal sabap ra kalaatan nano.” Kopongo raginio nangator i Daut ra ulun mongoi ri Abigail koson manambili' riso masauk ra andu' nano.