KASAUKAN 17:10 - Tanou Moonsoi Timugon10 Okou am moonong ungkuyon ru papag muno musiti' sunatin. အခန်းကိုကြည့်ပါ။ |
Ulun ondo' kalo sinunatan kalo makaakan ra akanon no. Amon ru makaminayan ramuyun ulun bansa' ru bokon am moogot mangiantak ra Paska koson mangurumat ra Tuhan, pagulu galing musiti' min sunatin ngaangai' ungkuyon ralalom tayar ru sasambaloi ru ulun no. Tauli boo karaan io ra ulun ru Israil toojo am makaaya' ra pangiantakan no.
Nangani' niayuk i Aki Kapuuno' ri Abragam ra kaulayan ru sunat koson rondo' tatandu' ru bantu' i. Ginio ra sunati' ri Abragam anak nali i Isak ra io makaumur saminggu' ayuk poyo; am sunati' boo ri Isak anak nali i Jakub am poyo sunati' boo ri Jakub anak no ra ungkuyon ondo' mopor am ruo ngaulun; ilo i am kinamatuaan ru bansa' takau.
Sotopot no itakau noyo ondo' makaulig ri Aki Kapuuno' sala' ka ilo, sabap ra itakau ti ondo' sumamba ri Aki Kapuuno' maya' ra indangan ru Ambiluo Nano galama'. Am itakau niayuk maringkuanang sabap ra nakasimpung noyo ri Jisus Kristus. Intor raginio kalo boo malansan takau ra kaulayan ondo' binaal ayuk ru ulun.
Paat ulun ru Israil nangiruan ra Misir, ngaangai' ungkuyon nilo sinunatan noyo. Kaa' buoi apat ngoopor ngambilor pangkiralanan nilo giu' ra tana' kaagisan, kolondo' sangulun pana ra anak ungkuyon nilo nasunatan. Paat ra pupus ru apat ngoopor ngambilor raginio, ngaangai' ungkuyon ru Israil ondo' sama' umur koson mangayou paat ilo nangiruan ra Misir, minatoi sabap kalo giminagaya' ilo ra Tuhan. Nagibot Tuhan ra kalo pakitonon ilo ra tana' ondo' moonsoi am malabung, ondo' binantu' Nano ra kinamatuaan nilai.