KAINGKUALAN 33:16 - Tanou Moonsoi Timugon

¹⁶ Ati kulaan ulun bokon makapandai ra maansayan Kou ra ulun Muno am aku, amon ru kalo maya' Kou ramon? Saang Muno ra tatanga' mai mapasusuai ramon intor ra bansa' bokon ra tana' ti.”

KAINGKUALAN 33:16 ပူးပေါင်းရင်းမြစ်များ

2 SAMUIL 7:23

Giti ra titikop ru tana' ti, kolondo' bansa' ra bokon koson ra Israil, ondo' binayag Mu noyo intor ra pangulipanan, am niayuk mapasauk risilo ra ulun Muno galama'. Binaal maayo am makaimuag no, ondo' binaal Muno risilo napatulai noyo ra inggalan Muno ra titikop ru tana' ti. Napagiru' Kou ra bansa'-bansa' ra bokon am dewa-dewa nilono paat ra ulun Muno jumalai mangayou, ulun ondo' binayag Muno intor ra Misir koson masauk ra ulun Muno galama'.

1 RAJA'-RAJA' 8:53

Nampili' Kou risilo intor ra ngaangai' bansa' koson masauk ra ulun Muno galama'; ginio noyo ragu Muno risilo mansail ra ulipon Muno i Musa, paat ra Okou nagibit ra kinamatuaan maili miningkual intor ra Misir.”

MAZMUR 147:20

Kalo baalon No koson raginio ra bansa' ra bokon; kalo makaulig ilo ra ukum Nano. Omporo' noyo Tuhan!

KAINGKUALAN 34:10

Indagu Tuhan ri Musa, “Raino mambaal Aku rondo' nabantuan ra ulun ru Israil. Gino ra saang min, mambaal Aku ra baal mangaayo, ondo' kalo igondo' baalo' ra gino ngai' ru bansa' no ra titikop ru tana' ti. Makito ru ngaangai' bansa' ondo' maalap kabaal ru Aku, Tuhan, sabap ra baalin Ku akau ra baal mangaayo.

KAINGKUALAN 34:9

Kono, “Tuhan, amon ru totopot Kou maansayan raki', kitaakon Tokou maya' ramon. Bambalingatan ulun ragitilo, kaa' ampuno' noyo kalaatan am niayuk tula mai, am apuo' akai koson ra ulun Muno galama'.”

KAINGKUALAN 8:22

Kalo mapatiu' Aku ra tampilon Gosyin intok inayanan ru ulun Kuno. Kolondo' bulongor ra giu' no. Mambaal Aku ra baal ragitio maa' raginio makapandai kou ra Aku, Tuhan, makakuasa' ra pagun ti.

IMAMAT 20:24

Kaa' binantu' Ku noyo ra manaak ramuyun ra pagun ondo' langkaya' am malabung no. Masauk pagun no longgom min. Aku noyo Tuhan i Aki Kapuuno' min ondo' napatuliar ramuyun intor ra bansa'-bansa' ra bokon.

IMAMAT 20:26

Musiti' kau matulai am masauk ra longgom Kuno ayuk, sabap ra Aku noyo Tuhan am matulai Aku. Napatuliar Aku noyo ramuyun intor ra bansa'-bansa' ra bokon, maa' raginio masauk kau ra longgom Kuno ayuk.

UNTABAN 14:14

mambala' ilo ra baal raginio ra mamagun ru tana' ragitio, am nokorongog ilo noyo ra Okou, Tuhan, mabaya' ramon. Naining nilo ra minintalang Kou paat ra muog gaun Muno ra rasawat mai, am ra mugar Kou giu' ra saang mai ralalom lugu' ru gaun paat ra matawang, am ralalom lugu' ru apui paat ra rondom.

UNTABAN 23:9

Intor ra tampak ru gunung makito ku ilo, intor rasawat ru bulur magilong aku risilo. Ilo rondo' bansa' ondo' naayag nagirondo', nakapandai ilo, binarakat ilo nasailan intor ra bansa' ra bokon.

MATIUS 1:23

“Maapang ralaa ti am maganak io ra sangulun anak ungkuyon am inggalanin anak ti ri Imanuil.” (Sumugut ra ragu ru ulun ru Ibrani, Imanuil arati' no, “I Aki Kapuuno' mabaya' ritakau.”)

2 KORINTUS 6:17

Sabap raginio, Inggalur kano ra ulun ondo' kalo makaulig ri Aki Kapuuno', am niayuk tuliar kau risilo. Pai' kau pangambong ra atan ayuk majamol, am apuon takamin.

SAGULION 4:34

Igondo' kia mokoondo' rondo' tuhan ondo' baani mangalap rondo' ulun intor ra bansa' ra bokon am saukon ulun raginio ra ulun nano galama', koson ondo' binaal ru Tuhan i Aki Kapuuno' min tayar min giu' ra Misir? Giu' ra talupak ru mato min galama' namakai Io ra kuasa' am kaikangan Nano ondo' maayo; maparatong Io ra maruol tumapik am pangayawan, mambaal ra kaimuagan am makaimuag, am niayuk mangkinibit ra baal makalalaa' masauk.

SAGULION 4:7

“Kolondo' bansa' ra ati pana, kabalu' pana bansa' maayo, ondo' makatuhan ondo' mamaar kaga' paat makapakuan risilo koson ra Tuhan i Aki Kapuuno' takau mamaar ritakau. Tumaam Io ra sasanggilan takau mampiau makiindangan.