KAINGKUALAN 29:38 - Tanou Moonsoi Timugon

³⁸ “Moonong orou saboi ra mantilayun, musiti' kou mapataak ruo ngainan anak domba makaumur sambilor koson taak simbalui ra rasawat ru altar no.

KAINGKUALAN 29:38 ပူးပေါင်းရင်းမြစ်များ

KASAUKAN 22:7

indagu i Isak, “Ama'!” Taam i Abragam, “Atan kia lagang?” Pangkuot i Isak, “Nakito tokou nagibit ra pampaang am luton, kaa' ati kia anak domba ondo' simbaluyon?”

1 TUNUNG RU BANSA' ISRAIL 16:40

Moonong susuab ti am mamai' ti musiti' ilo mampataak ra taak simbalui koson mapabansuk ra guang ru Tuhan, giu' ra rasawat ru altar, sumugut ra Taurat ondo' tinaakan ru Tuhan ra ulun ru Israil.

2 TUNUNG RU BANSA' ISRAIL 13:11

Moonong susuab ti am mai' ti mampataak ilo ra kaminyan, am niayuk bibiag koson ra taak simbalui koson mapabansuk ra guang ru Tuhan. Mampataak ilo ra ruti' pasulungon giu' ra rasawat ru mija' ondo' pinatimpok noyo, am moonong rondom mansikit ilo ra lampung-lampung ra tampakan ra lampung mas. Binaal mai susuban ru Tuhan, kaa' inimpayan min Io.

2 TUNUNG RU BANSA' ISRAIL 2:3

Nangator Raja' Salomo ra tanou ra Raja' Giram intor ra Tirus, “Pakimagamung raki' ra pantalanan koson ra okou nakimagamung ra pantalanan ra ama' kuli, Raja' Daut. Nantalan kou riso ra tataun sidar paat ra io nambaal ra istana nali.

2 TUNUNG RU BANSA' ISRAIL 2:4

Masaga' aku mambaal ra rondo' baloi sambayangan koson mangurumat ra Tuhan, i Aki Kapuuno' kuno. Baloi no masauk ra intok matulai, intok ru mamagun am aku galama' sumamba ra Tuhan am monolob ra kaminyan ondo' maamis owou; giu' no aku am mamagun kuno magail mampataak ra ruti' ondo' mapasau am niayuk taak simbalui koson mapabansuk ra guang ru Tuhan ra moonong susuab ti am mai' ti, paat ra orou-orou Sabat, paat ra pangiantakan ru Sila' Bagu, am paat ra pangiantakan ra bokon no. Aku am mamagun kuno masaga' mangurumat ra Tuhan, i Aki Kapuuno' mai. Namarinta Io ra ulun ru Israil am nambaal raginio ra sabubuoi no.

2 TUNUNG RU BANSA' ISRAIL 29:7

Inangaban nilo Baloi ru Tuhan am linasaan lampung ra giu' no. Kalo boo nonolob ilo ra kaminyan, kapoam mampataak ra taak simbalui koson mapabansuk ra guang ru Tuhan giu' ra Baloi ru Tuhan, ri Aki Kapuuno' ondo' sambaan ru ulun ru Israil.

2 TUNUNG RU BANSA' ISRAIL 31:3

Intor ra bibiag tinambiag nano galama', Raja' Gijkia nangani' ra bibiag ondo' makapakuan ra tayar ru taak simbalui koson mapabansuk ra guang ru Tuhan ondo' pinataak paat ra moonong susuab ti am mamai' ti, paat ra orou Sabat, Pangiantakan ra Sila' Bagu, am niayuk paat ra pangiantakan-pangiantakan ra bokon ondo' inaru' giu' ra ralalom ru Ukum ru Tuhan.

2 TUNUNG RU BANSA' ISRAIL 8:13

Nampataak io ra taak simbalui koson mapabansuk ra guang ru Tuhan sumugut ra kaulayan ru Ukum ri Musa ra moonong pangiantakan ondo' inaru': orou Sabat, Pangiantakan ra Sila' Bagu, am talu poyo pangiantakan ru kabilaran, iono Pangiantakan ra Ruti' Kalo Linatakan ra Ragi, Pangiantakan Mangkumos am Pangiantakan Mangkalukub ra Raun.

IJRA 3:3

Kabalu' pana raginio malaa' ilo ra mamagun ru pagun raginio, kaa' binaal nilo saguli' altar no giu' ra intok kasaa' nali. Kopongo raginio timinalimpuun ilo nampataak ra taak simbalui koson mapabansuk ra guang ru Tuhan, paat ra susuab ti am mamai' ti.

IJRA 3:5

Suai raginio, inaru' nilo noyo mampataak ra taak simbalui koson mapabansuk ra guang ru Tuhan am niayuk taak simbalui ondo' pataakon paat ra Pangiantakan Sila' Bagu, am paat ra ngaangai' pangiantakan ra bokon ondo' paugaron koson sumamba ra Tuhan. Ilo niayuk mampataak ra taak ayuk toojo ra Tuhan.

KAINGKUALAN 40:29

am giu' no, ra saang ru tabir no, pabantaa' no altar panalaban ra taak simbalui. Rasawat ru altar no papataak io ra taak simbalui koson mapabansuk ra guang ru Tuhan, am taak simbalui koson maringkuanang ra Tuhan, koson ra nanusuban ru Tuhan.

YEHEZKIEL 46:13

Indagu Tuhan, “Moonong orou ra susuab ti, sanginan anak domba ondo' umur sambilor am kalo najamaran musiti' pataakon koson ra taak simbalui koson mapabansuk ra guang ru Tuhan.

YEHEZKIEL 46:15

Anak domba, unor-unor am umau jaitun no musiti' pataakon ra Tuhan ra moonong susuab ti koson ra sabubuoi no.”

DANIL 12:11

“Intor poyo ra taak simbalui orou-orou no linanggaan, iono intor ra ‘Karaat Ondo' Moporos’ no, 1,290 ngoorou mansail.

DANIL 9:21

Liliwa' aku makiasi', i Gabriil ondo' nakito kuno ralalom ru pinaintalang kuno ondo' ragili, nansiab minongoi raki'. Paat raginio noyo inaru' koson mampataak ra taak simbalui ra mamai' ti.

DANIL 9:27

Mambaal raja' no ra nabantuan ondo' mapiot ra masuang ulun buoi tulu' ngambilor. Malintanga' paat no, langgain ru raja' ngaangai' taak simbalui am pataakon. Rondo' ondo' sabiton ra ‘Karaat Ondo' Moporos’ pabantaan boo giu' ra Baloi ru Tuhan, am magulayun ra giu' no saboi ra ulun ondo' napabanta' no makatuum ra kapusaan ondo' inaru' noyo ri Aki Kapuuno' riso.”

IMAMAT 3:5

Imam-imam musiti' monolob ra ngaangai' no pabayaan ra taak simbalui ra bokon no ra rasawat ru altar. Owou ru taak ra akanon no mapabansuk ra guang ru Tuhan.

IMAMAT 6:9

maa' raginio manaak ri Arun am anak-anak nano ra aturan ragitio intor ra taak simbalui koson mapabansuk ra guang ru Tuhan. Taak raginio musiti' patatangon ra rasawat ru altar buoi sorondom, am apui no musiti' marayus ayuk mapaang.

IMAMAT 9:17

Pataako' no taak simbalui koson paringkuanangan, am alap ra sogonggom tapung am solobo' no ginio giu' ra rasawat ru altar. Taak simbalui ti iono paruangon ra taak simbalui koson mapabansuk ra guang ru Tuhan, ondo' pataakon ra moonong orou.

UNTABAN 29:6

Ngaangai' ru taak simbalui no paruangon ra taak simbalui koson mapabansuk ra guang ru Tuhan, ondo' pataakon pabayaan ra taak simbalui koson paringkuanangan, paat ra orou kasaa' ra moonong sila', am niayuk paruangon ra taak simbalui ra moonong orou ondo' pataakon pabayaan ra taak simbalui koson paringkuanangan am taak simbalui wain. Owou ru taak akanon ti mapabansuk ra guang ru Tuhan.

JUANIS 1:29

Io suabon ragili, nakito ri Juanis i Jisus minatong riso, am indagu io, “Ilai' min, gitio noyo Anak Domba ri Aki Kapuuno' ondo' mamuso ra tula ru ulun ru tana' ti!

IBRANI 7:27

Moonong orou Tingganai Maayo Imam ra bokon mampataak ra taak simbalui sabap ra tula ru ulun am tula nilo galama', kaa' i Jisus sala' ka koson raginio. Igondo' ayuk nampataak Io ra kaayagan Nano galama' am ginio sama' ra sabuoi-buoi no.

1 PITRUS 1:19

kaa' ondo' mologo toojo no, ioginio raraa' ri Kristus. Io sinauk ra rondo' taak, mogondo' ra anak domba simbaluyon ondo' kolondo' noyo kalaatan kapoam sala.