JUANIS 4:14 - Tanou Moonsoi Timugon

¹⁴ kaa' osoi ayuk manginum ra timug ondo' taakin Kuno, ulun no kalo igondo' boo paason. Sabap ra timug ondo' taakin Kuno koson ra taur bubuluak ondo' mangani' ra kaayagan motopot am mantilayun.”

JUANIS 4:14 ပူးပေါင်းရင်းမြစ်များ

JUANIS 6:35

Indagu poyo i Jisus risilo, “Aku noyo ruti' ondo' mampakaayag. Osoi ayuk matong Raki', kalo boo maitilan, am osoi ayuk mangintopot Raki', kalo boo paason.

JISAYA 49:10

Kalo paason kapoam maitilan ilo, am kalo malasuan ilo giu' ra tana' kaagisan. Sabap ra Aku, motogom risilo, mangaak risilo, am mangitang risilo ra taur-taur ru timug.

PINAINTALANG 7:16

Am kalo boo maitilan kapoam pinaason ilo; am kalo boo malinsu ilo ru mato ru orou kapoam lasu'.

JUANIS 11:26

Ulun ondo' maayag am mangintopot Raki', kalo mantilayun io matoi. Mangintopot kou kia ragitio?”

JUANIS 6:58

Gitio noyo ruti' ondo' timinuun intor ra suruga'; Io ti sala' ka koson ra ruti' ondo' inakan ru kinamatuaan mini, ondo' minatoi niayuk. Kaa' ulun ondo' mangakan ra ruti' ti maayag ra mantilayun.”

1 JUANIS 5:20

Nakapandai takau ra minatong noyo Anak ri Aki Kapuuno' am nangani' ritakau ra kaintutunan koson makaulig takau ri Aki Kapuuno'. Maayag takau sumimpung ri Aki Kapuuno' am niayuk i Jisus Kristus. Io noyo i Aki Kapuuno' ondo' motopot, am gitio noyo kaayagan motopot am mantilayun.

2 KORINTUS 1:22

Koson ragitio noyo itakau tinatanduan ri Aki Kapuuno' ra Io tatangan; pinataak No Ambiluo Nano ra guang takau koson mapakalansan ra mangani' Io ritakau ra ngaangai' ondo' binantu' Nali.

ROMA 6:23

Sabap ra tula no mangkinibit ra kapatayan, kaa' taak ri Aki Kapuuno' no kaayagan motopot am mantilayun mababaya' ri Kristus Jisus, Tuhan takau.

1 PITRUS 1:22

Sabap ra gumagaya' kau ra pangilaan ri Aki Kapuuno' ti noyo, migimpasau kano, saboi mokoponogom kau boo ra pabukat min ra Kristian. Intor raginio, tagami' noyo rondo' am bokon mabaya' ra guang mapasau.

JUANIS 10:10

Mantatakou matong mongoi pantakou, mamatoi am mampalunsai. Kaa' aku minatong koson ilo ondo' mangkirongog Raki' mokoowot ra kaayagan, io no kaayagan ondo' malabaan.

IPISUS 4:30

Pai' noyo pangiluko' Ambiluo ri Aki Kapuuno' no, sabap ra Io sumoroi ramuyun noyo tinatanduan kau ri Aki Kapuuno' ra akau ti Io no tatangan. Ambiluo raginio noyo ondo' mapakalansan ramuyun ra matong niayuk orou pampalabusan ramuyun ri Aki Kapuuno'.

ROMA 5:21

Intor raginio, koson niayuk ra tula nangkinibit ra ngaangai' ulun matoi, kataawan ri Aki Kapuuno' pana mangkinibit ritakau mobonsoi saguli' Riso, saboi mokoowot takau ra kaayagan motopot am mantilayun sabap ri Jisus Kristus, Tuhan takau.

MATIUS 25:46

Akau ti ukumin ra ukum mantilayun, kaa' ulun motopot mokoowot ra kaayagan mantilayun.”

JISAYA 55:1

Mindagu Tuhan, “Ibok kano ngaangai' ondo' pinaason, inum kano ra timug pinasulung. Ratong kano ondo' kolondo' ruit, apuo' noyo gandum kalo kilagain, am akano' noyo! Anggur am gatas pinasulung, apuo' ayuk ra kalo kilagain.

JISAYA 58:11

Masalok Aku maningganai ramuyun am mamasug ramuyun giu' ra tana' mapua'; Aku magalung ramuyun maa' raginio maligag kau am maikang. Akau koson ra taman ondo' maulian ra timug no, koson ra taur ru timug ondo' kalo igondo' mapua'.

JIRIMIA 2:13

sabap ra ulun Kuno nambaal ra ruo tula: nangiruan ilo Raki', puun ru timug ra mapakaayag ra ulun, am nangkali ilo ra kulam ondo' lawasan am kalo mototop ra timug.”

JIRIMIA 31:25

Paikangon Ku ilo ondo' maagui, am basugon ilo ondo' malawo sabap ra naitilan.

YEHEZKIEL 47:9

Ati ayuk tilisan ru timug no, giu' no niayuk mokoondo' ra ngaangai' salinut ru bibiag am papait. Timug no mampasauk ra timug giu' ra Raat Matoi mapalo, am ati ayuk tilisan ru timug no, giu' no mokoondo' ra kaayagan.

MATIUS 5:6

Pakaansuk noyo ulun ondo' maguyum ra kasagaan ri Aki Kapuuno', sabap ra basugon ilo ri Aki Kapuuno'.

JUANIS 4:10

Taam i Jisus, “Amon ru nakapandai kou ra taak ri Aki Kapuuno' am osoi makitaak rirun ra inumon, maaru' makitaak kou po Riso am mangani' Io rirun ra timug ondo' mampakaayag.”

JUANIS 4:11

Indagu ruandu' i Riso, “Tuan, tulubong ti malandom kaga' am kolondo' susuuk Muno. Ati kaalapan Muno ra timug mampakaayag no?

JUANIS 4:13

Taam i Jisus, “Osoi ayuk manginum ra timug ragitio, paason poyo,

JUANIS 4:36

Raino ulun mangkumos no nokoowot ra ampos am ampos raginio magibit ra kaayagan motopot am mantilayun. Ginio ra ulun ondo' manias am ondo' mangkumos no mabaya' boo maansukan.

JUANIS 6:27

Pai' kano paguyum ra akanon ondo' mataki' malaat. Kaa' paguyum kano ra akanon ondo' tumaan, ioginio mangani' ra kaayagan motopot am mantilayun. Anak ru Ulun noyo mangani' ramuyun ra akanon ragitio, sabap ra i Aki Kapuuno' noyo galama' nangiou Riso.”

JUANIS 7:37

Paat ra orou kaampusan ru pangiantakan i, ioginio orou maatang toojo, bigor i Jisus am indagu ra mosongou, “Osoi ayuk paason, polosoo' io no matong Raki' am manginum.

PINAINTALANG 7:17

Sabap ra Anak Domba ondo' soroi ra tatanga' ru takhta no magalung risilo am maningganai risilo mongoi ra taur ru timug ondo' mampakaayag. Am i Aki Kapuuno' mamiir ra lomou ru tangi' intor ra mato nilai no.”

IMAMAT 11:36

Kaa' taur ru timug am tulubong kalo majamol, kabalu' pana ondo' ngaangai' ra bokon no majamol paat ra matiu' ra baangkai no.