JUANIS 21:15 - Tanou Moonsoi Timugon

¹⁵ Pakaakan ilo, pangkuot boo i Jisus ri Simon Pitrus, “Simon anak ri Juanis, motogom kou po kia Raki' ka ilo ti?” Taam i Simon Pitrus, “Iou Tuhan, nakapandai Kou ra motogom aku Rirun.” Kon ri Jisus riso, “Alungi' noyo anak-anak ru domba Kuno.”

JUANIS 21:15 ပူးပေါင်းရင်းမြစ်များ

KASAUKAN 33:13

Taam i Jakub, “Aka', nakapandai kono ra lalaing-lalaing ti mangalawo, am mangkara' aku poyo ra domba am ngaangai' ru bibiag ondo' lakat poyo tumiti'. Amon ru ulisokon ugar no kabalu' pana songorou ayuk, mamagatoi ilo ngaangai'.

2 SAMUIL 7:20

Atan poyo ondo' maalap ku karagu Rirun! Makapandai Kou ra ngaangai' no intor ra ulipon Muti.

2 RAJA'-RAJA' 20:3

“Karaa' noyo, iou Tuhan, ra nangandoi aku Rirun ra gumagaya' am totopot, am ra masalok aku mirot koson mambaal ra kasagaan Muno.” Raja' no pana nantangi' ra mangiluk.

JISAYA 40:11

Alungin No ulun Nano koson ra sangulun magagalung; timungon No am kubibilon No anak-anak ru domba, am ralalom kinolomoi, aakon No indung-indung ru domba.

JIRIMIA 23:4

Lantikon Ku panguasa' koson magalung risilo. Ulun Kuno kalo boo malaa' kapoam monontol; Aku pana kalo boo mangukum risilo. Aku, Tuhan nakaindagu noyo.”

JIRIMIA 3:15

Mangani' Aku ramuyun ra tingganai-tingganai ondo' gumagaya' Raki'. Maningganai ilo ramuyun ra kapintaran am pangaratian.

YEHEZKIEL 34:23

Pasaukon Ku sangulun ra raja' koson ri Daut, ulipon Kuno, koson masauk ra rorondo' magagalung risilo, am magalung io risilo.

YEHEZKIEL 46:24

Indagu ungkuyon no raki', “Gitio noyo rapuan-rapuan intok pantanakan ru ulun mangandoi ra Baloi ru Tuhan ra taak simbalui ondo' pataakon ru mamagun.”

MATIUS 10:37

“Osoi ayuk motogom poyo ra ama' am ina' nano ka Aku kalo sama' io masauk ra maamaya' Kuno. Koson niayuk ra osoi ayuk motogom poyo ra anak ungkuyon kapoam anak ruandu' nano ka Aku kalo sama' io masauk ra maamaya' Kuno.

MATIUS 16:17

“Pakaansuk no Simon, anak ri Juanis!” kon ri Jisus, “sabap ra katapatan ragitio sala' ka intor ra ulun, kaa' gitio pinabala' rirun ri Ama' Kuno giu' ra suruga'.

MATIUS 18:10

“Ilalai'! Pai' kau pagasab ra ulun ondo' mangintopot Raki' koson ra lalaing. Balain takamin: Malaikat ondo' magalung risilo ti masalok maining ru Ama' Kuno giu' ra suruga'. [

MATIUS 26:33

Kon ri Pitrus ri Jisus, “Iou pana ngaangai' ra bokon no manatang Rirun, kaa' aku kalo.”

MATIUS 26:35

Taam i Pitrus, “Ati kulaan mindagu aku ra kalo nakaulig Rirun? Matoi aku pana marumar ayuk Rirun.” Ngaangai' maamaya' ra bokon pana minindagu koson ragino.

MARKUS 14:29

Indagu i Pitrus, “Polosoon noyo ngaangai' ilo manatang Rirun, kaa' aku ti kalo.”

LUKAS 12:32

“Pai' kau kalaa', kabalu' pana kalo masuang kau, sabap ra i Ama' min masaga' mangani' ramuyun ra barakat ru pamarintaan Nano.

LUKAS 22:32

Kaa' nakiasi' Aku noyo ra pangintapatan muno kalo malawo. Ra okou sumaguli' Raki', okou tupo niayuk mampaikang ra pangintapatan ru pabukat-pabukat muno.”

JUANIS 1:42

Ibito' no boo i Simon ri Jisus. Tantangi' ri Jisus i Simon, am indagu, “Inggalan muno i Simon anak ri Juanis, kaa' piawon kou poyo ri Kaipas.” (Kaipas nogondo' ra Pitrus, arati' nano ‘bulur batu’.)

JUANIS 13:37

Pangkuot poyo i Pitrus, “Tuhan, kua pai' aku pakaaya' raino? Nakatampos aku noyo mampataak ra painawo kuno koson Okou.”

JUANIS 16:27

sabap ri Ama' galama' motogom ramuyun. Motogom Io ramuyun sabap ra motogom kau Raki' am mangintopot kau ra minatong Aku intor Riso.

JUANIS 21:12

Indagu i Jisus risilo, “Pagagakan takau.” Kolondo' sangulun pana intor ra maamaya' Nano nakakau' nangkuot Riso, “Osoi Kou?” sabap ra nakatutun ilo ra Io no Tuhan.

JUANIS 21:7

Indagu maamaya' tagamin ri Jisus i ri Pitrus, “Tuhan nai ginio.” Korongog ri Pitrus ginio, pambayang io boo (sabap ra inalus no bayang nali) am tapung ra timug.

JUANIS 8:42

Kon ri Jisus risilo, “Amon ru totopot i Aki Kapuuno' no Ama' min, tagamin min Aku, sabap ra minatong Aku intor ri Aki Kapuuno' am raino soroi Aku. Kalo minatong Aku maya' ra kasagaan Kuno galama', kaa' sinusub No Aku.

RINALATAN 20:28

Tumoojo kau am alungi' min niayuk ngaangai' ulun Kristian ondo' pinalansan ru Ambiluo ri Aki Kapuuno' no ramuyun. Alungi' min ilo toojo koson ra domba alungin toojo ru magagalung, sabap ra pinasauk ilo ri Aki Kapuuno' ra ulun Nano ralalom pinatayan ru Anak Nali galama'.

RINALATAN 20:29

Napandayan ku noyo ra pakaugar aku, mokoondo' ulun koson ra taani masangit mongoi simpung ramuyun am ulun ondo' inalungan mino gaawon intor ramuyun.

ROMA 14:1

Apuo' noyo ulun ondo' malawo pangintapatan am pai' noyo ansangi' io sabap ra pamaguangan galama' nano.

ROMA 15:1

Itakau ondo' maikang pangintopot, pirot takano pangindangan risilo ondo' malawo pangintapatan, am pai' takau pangkara' ra kaatangan galama' ayuk.

1 KORINTUS 8:11

Amon ru koson poyo raginio, kapandayan mino mangkinibit ra pabukat Kristian muno ondo' malawo pangintapatan makalayau boo. Kaa' sotopot no, minatoi i Kristus mamayag riso niayuk.

GALATIA 5:6

Paat ra itakau sumimpung ri Kristus, baal ra sunatin kia kapoam kalo, ginio kalo boo maatang. Ondo' maatang toojo, ioginio mangintopot ri Kristus, ondo' makito intor ra motogom takau ra rondo' am bokon.

IPISUS 4:14

Bagu no itakau kalo boo makapaliso koson ra lalaing, ondo' lilingganon ru kinulun am sisiabin ru angin, ioginio mangintopot ra mangingila' ondo' mapandai toojo mamparuung am mampalayau ra ulun.

IPISUS 6:24

Gama' ru i Aki Kapuuno' mambarakat ra ngaangai' ulun ondo' mantilayun monogom ri Jisus Kristus, Tuhan takau.

IBRANI 13:20

I Aki Kapuuno', ondo' puun ru pabansayan, namayag noyo saguli' ra Tuhan takau i Jisus intor ra kapatayan. I Jisus noyo koson ra Magagalung Maayo takau domba Nano. Pinatayan Nano noyo ondo' nangaru' Io ritakau ra nabantuan mantilayun.

IBRANI 4:13

Kolondo' atan-atan inangun ri Aki Kapuuno' makasibuni intor Riso, sabap ra ngaangai' maukab am makito Nano. Am ri Aki Kapuuno' niayuk musiti' takau mangakun ra ngaangai' ondo' binaal takau.

1 PITRUS 1:8

Motogom kau Riso, iou pana kalo poyo nakakito kau Riso. Mangintopot kau Riso, kabalu' ra kalo makakito kau Riso raino. Am maansukan kau kaga' mabaya' ra bansuk ondo' kalo noyo maalap karagu.

1 PITRUS 2:2

Mogondo' ra sangulun lalagang ondo' kakaanak ra masalok maguyum ayuk ra gatas, akau pana musiti' masalok maguyum ayuk ondo' mampaikang ra pangintapatan min. Maa' raginio mapiot pangintapatan min am bayagon kau.

1 PITRUS 2:25

Ragili, koson kau ra domba ondo' timinanggau, kaa' raino inibit kano sumaguli' koson maya' kau ra Magagalung am Mangngampin min.

1 JUANIS 4:19

Mokotogom takau sabap ra i Aki Kapuuno' nakapagulu motogom ritakau.

1 JUANIS 5:1

Ulun ondo' nangintopot ra i Jisus noyo Mamamayag ondo' sinusub ri Aki Kapuuno', io no anak ri Aki Kapuuno'. Ulun ondo' motogom ra sangulun ama', motogom niayuk ra anak nano.

PINAINTALANG 2:23

Potoyon Ku niayuk maamaya' nano, am ngaangai' boo ru pasimpungan ulun Kristian makatutun ra Aku noyo Io ondo' makapandai ra pangkaraan am guang ru sasangulun. Balasin takamin maya' ra binaal mino sigagama'.