JISAYA 57:2 - Tanou Moonsoi Timugon

² Makaalap ilo ra kaansayan am tumangus ra ralalom ru lobong.

JISAYA 57:2 ပူးပေါင်းရင်းမြစ်များ

KASAUKAN 17:1

Paat umur ri Abram siam ngoopor am siam ngambilor, minintalang Tuhan riso am indagu, “Aku noyo i Aki Kapuuno' Ondo' Maayo Kaga' Kuasa'. Gagaya' no Raki' am kasalok no mambaal ra kasagaan Kuno.

2 TUNUNG RU BANSA' ISRAIL 16:14

Linobong io giu' ra kalabangan bulur batu ondo' pinahat noyo riso giu' ra Bandar Daut. Baangkai nano linatakan ra apa' pampagamis ra akanon am ondo' mangaamis owou ra kalo poyo linobong. Apui pinaangan ondo' maayo kaga' koson mangurumat riso.

AYUP 3:17

Giu' ra ralalom ru lobong, ulun malaat lumonggo' mambaal ra malaat, am ulun mangngandoi ondo' naagui mapaabus ra bagui.

MAZMUR 37:37

Urioo' min noyo ulun ra moonsoi am ondo' motopot no; ulun ondo' masaga' ra pababansayan makaalap ra papag;

MAMPATANOU 12:7

Inan takau masauk saguli' ra kaau ra tana' ti. Painawo ru kaayagan takau sumaguli' ri Aki Kapuuno' ondo' nangani' ritakau.

JISAYA 14:18

Ngaangai' raja' ru bansa'-bansa' ra nakasail linobong ralalom kaansukan giu' ra lobong galama',

JISAYA 26:7

Ralan ondo' binayaan ru ulun moonsoi no mabanis, sabap ra Okou, Tuhan, kinabanis Mu ginio risilo.

JIRIMIA 6:16

Indagu Tuhan ra ulun Nano, “Bigor kano giu' ra lilisangon ru ralan am ilai' noyo toojo! Kuati' noyo ralan-ralan ra galing i, am ati kia ra ralan ondo' moonsoi kaga'. Mopongo raginio baya' no ra ralan raginio, okou pana maayag am moonsoi.” Kaa' konilo, “Kalo, marara' akai maya' ra ralan no!”

YEHEZKIEL 32:25

Liminangan i Ilam nabaya' risilo ondo' minatoi ralalom pangayawan, liniputan ru lobong-lobong ru saujor nano. Ngaangai' no minatoi ralalom pangayawan. Bulintok naayag, nampatabual ilo mampalalaa' ra gino ngai' ru ulun, kaa' raino minatoi ilo am nansaan ra uyu' nababaya' ra ulun ondo' minatoi ralalom pangayawan.

DANIL 12:13

Okou Danil, musiti' gumagaya' saboi ra pupus. Matoi kou, kaa' maayag saguli' koson mangapu ra tangguang muno ra orou pupus.”

MATIUS 25:21

‘Moonsoi,’ ragu ru tuan ni, ‘Okou ulipon ra moonsoi ondo' malansanan, sabap ra okou maalap ra intopot ra sanganu, malansan aku niayuk rirun ra masuang. Ayan no simpung raki' ralalom kaansayan.’

LUKAS 1:6

Kaayagan ru mansawo ti mapabansuk ra guang ri Aki Kapuuno'. Ilo karuruo gumagaya' toojo ra ngaangai' susuban am ukum ru Tuhan.

LUKAS 16:22

Patoi i Lajarus am inibit ru malaikat ra kinamatuaan nali, i Abragam, giu' ra suruga'. Ulun langkaya' no pana minatoi am linobong.

LUKAS 2:29

“Tuhan, sinugut Mu noyo bantu' Muli raino. Polosoo' noyo ulipon Muti mugar mabaya' ra kaansayan.

LUKAS 7:50

Kaa' indagu i Jisus ra ruandu' no, “Pangintapatan muno namayag rirun. Uli' no mabaya' ra kaansayan!”

2 KORINTUS 5:1

Makapandai akai ra amon ru inayanan takau ra tana' ti pusoon boo, ioginio inan takau, makaayanan takau niayuk ra suruga'. Am ayanan raginio mantilayun ondo' binaal ri Aki Kapuuno' galama' am sala' ka ulun.

2 KORINTUS 5:8

Ginio nai ra kalo malaa' akai am masaga' akai niayuk manatang ra inan ti, maa' raginio makapasimpung akai ra Tuhan.

PILIPI 1:23

Karuo-ruo ti mampakabunduk ra guang kutu. Masaga' aku niayuk mangiruan ra painawo kutu am makasimpung ri Kristus, sabap ra ginio noyo moonsoi no.

PINAINTALANG 14:13

Korongog ku boo bolos intor ra limbowon mindagu, “Tulisi' noyo gitio: Pakaansuk noyo ilo ondo' intor raino matoi sabap ra mampaugar ra kandoi ru Tuhan.” Taam Ambiluo ri Aki Kapuuno', “Motopot. Ilo ti patanguson intor ra kaimbalaan, am aniin ilo ra ampos sabap ra kandoi nilono ra Tuhan.”