JISAYA 5:26 - Tanou Moonsoi Timugon

²⁶ Ilai' Tuhan manaak ra pulanu ra bansa' ondo' maalur. Sisiukon No mampiau risilo intor ra pompor ru tana' ti am mataki' ilo matong!

JISAYA 5:26 ပူးပေါင်းရင်းမြစ်များ

JAKARIA 10:8

Piawon Ku ulun Kuno, timungon Ku ilo. Bayagon Ku ilo, am ilo kasuangon koson ragili.

JISAYA 7:18

Bulintok raginio Tuhan no magisisiuk koson rondo' tatandu' mampiau ra saujor ru Misir ondo' matong koson ra sampanon ru bulongor intor ra pompor ru sungoi Nil, am saujor ru Asyur ondo' matong koson ra sampanon ru sapuon intor ra pagun nilo.

JISAYA 18:3

Rongogo' noyo, alii ra ngaangai' namagun ra tana' ti! Inaani' min noyo bandira' ondo' paundokon giu' ra munung ru gunung-gunung! Inaani' min noyo bujung no samputin!

SAGULION 28:49

Maparatong Tuhan ra rondo' bansa' intor ra pompor ru tana' koson gumula' ramuyun, bansa' ondo' ragu nano kalo maratian min. Koson ra kanui, manumbit ilo ramuyun.

JISAYA 11:12

Bilaron ru Tuhan bandira' koson mapabala' ra ngaangai' bansa' ra Io tatanga' manimung saguli' ra mamagun ru Israil am Jiuda ondo' nakapantutuliar ra titikop ru tana' ti am magibit risilo muli'.

MALIAKI 1:11

Urumaton Aku ru bansa'-bansa' ra titikop ru tana' ti. Solobon nilo kaminyan giu' ra ngaangai' intok koson mangurumat Raki', am mampataak ilo ra taak simbalui ondo' maaya' pataakon. Ilo ngaangai' mangurumat Raki'!

ABAKUK 1:8

Kuda ru ulun Babilonia maribok poyo intor ra ampunguon am masangit poyo intor ra taani ondo' maitilan. Pulalai ru saujor mangkuda ru Babilonia matong intor ra pagun-pagun maalur; kuda nilo mokobolos ra kukurutuk. Pulalai saujor mangkuda matong mamulunsar koson ra susuit kanui manimpar ra ondo' akanon.

JOIL 2:7

Gapu' mamulunsar koson ra ulun tutumula', am mangkiwa' ra timbok koson ra saujor. Ngaangai' gapu' marayus jumalai ra sumuku', ra kalo mangulau ra sukuan

SULABOI 4:19

Ulun ondo' mangilou ramon maribok poyo intor ra susuit kanui. Nangilou ilo ramon giu' ra bulur-bulur, am magawang ramon giu' ra tana' kaagisan.

JIRIMIA 51:27

“Pangani' ra pulanu koson mangayou! Samputi' bujung maa' raginio morongog ru bansa'-bansa'! Potomposo' bansa'-bansa' koson mangayou ra Babilonia! Susubo' pamarintaan ru Ararat, Mini am Askinas mangayou. Lantiko' sangulun pagawai saujor koson maningganai ra pangayawan no. Susubo' noyo kuda ondo' masuang koson ra gapu' sampanon!

JIRIMIA 5:15

Ulun kau ru Israil, tatanga' Tuhan mamparatong ra rondo' bansa' intor ra pagun maalur koson mamulunsar ramuyun. Bansa' no maikang kaga' am soroi noyo intor ra galing i poyo. Kalo maratian min ragu nilono.

JIRIMIA 4:13

Ilai' pantula' matong koson ra gaun. Kurita' kuda nano koson ra bagiu' puting beliung, am kuda nano maribok poyo intor ra susuit kanui. Nalumpa' takau ru karaat! Maluus takau!

JISAYA 39:3

Kopongo raginio Nabi Jisaya minuma' ra Raja' Gijkia am pangkuot, “Ati intor ru ngaangai' ulun ti, am atan ragu nilo?” Taam Raja' Gijkia, “Intor ilo ra Babilonia, pagun ondo' maalur kaga'.”

JISAYA 30:16

Kaa' mangatang kau koson magiru' intor ra pantula' am kumura' ra kuda ondo' maribok. Sotopot no akau musiti' no magiru'! Indoson min kuda mino maribok, kaa' ulun mangingilou ramuyun no poyo maribok!

JISAYA 13:5

Minatong ilo intor ra pagun ra mangaalur, pompor ru tana' ti. Sabap ra sangit Nano, Tuhan matong koson mamuso ra titikop ru tana' ti.

JISAYA 13:2

Paundoko' noyo bandira' ru mangayou giu' ra rasawat ru bulur ondo' malimparang! Pampiau no ra saujor. Painsawato' longon muno koson rondo' pulanu risilo mongoi pamulunsar giu' ra kulobon-kulobon garabang ru bandar ondo' malilimbau no.

MAZMUR 72:8

Karajaan nano liminangka' intor ra raat mongoi ra raat, intor ra sungoi Iprat saboi ra pompor ru tana'.

MAZMUR 60:4

Ginonggon Mu tana' ti suku' nalapak; punaa' noyo nangapilang no sabap ra tana' ti mauyog.

JISAYA 10:3

Atan baalon min bulintok ri Aki Kapuuno' mangukum ramuyun ra tauli no? Atan baalon min paat ra Io mamparatong ra karaat intor ra pagun ondo' maalur? Osoi kia pakiindanganan min? Ati papasibunian min ra rapu' kalangkayaan mino?

JISAYA 13:3

Tuhan nampiau ra saujor-saujor pinili' Nano. Mangaikang ilo, mintopot guang, am kalansanan Nano. Kandoi nilono intor ra Tuhan koson mangukum ra ulun ondo' natiu' ra sangit Nano.

JISAYA 13:4

Rongogo' noyo nginonsol giu' ra rasawat ru gunung, koson masuang ulun natitimung. Rongogo' noyo kumuliasou-asou ngaangai' bansa' am pamarintaan-pamarintaan ra natitimung. Tuhan Ondo' Maayo Kaga' kuasa' mampatampos ra saujor mangayou.

JISAYA 31:9

Raja' nilono magiru' ra malaa', am nasuangan tingganai ru saujor nilono malaa' kaga' saboi bandira' ru pangayawan tinatang nilo.” Tuhan minindagu – Tuhan ondo' sambaan am urumaton am monolob ra taak simbalui giu' ra Jirusalim.

YEHEZKIEL 38:17

Okou noyo ondo' sinabit Kuno ragili, paat ra Aku minindagu pinabala' galing ra nabi-nabi Kuno giu' ra Israil, ra paat tauli no manusub Aku ra sangulun koson mamulunsar ra Israil.” Tuhan Raja' minindagu noyo.