JISAYA 5:13 - Tanou Moonsoi Timugon

¹³ Patirin kau koson ra ulun rinakop. Ngaangai' tingganai matoi maitilan am mamagun matoi pinaason.

JISAYA 5:13 ပူးပေါင်းရင်းမြစ်များ

GOSIA 4:6

Ulun Kuno mapuso sabap ra marara' ilo mangiou Raki'. Akau, imam-imam, kalo mampalio Raki' am nangimpai ra pangilaan Kuno. Ginio ra Aku pana mangimpai ramuyun am kalo mangiou ra anak-anak mino koson ra imam Kuno.

JISAYA 1:3

Sapi' makaulig ra nomolonggom riso no, am kaladai pana makatanda' ra intok papaakanan riso ru nomolonggom riso no, kaa' ulun Kuno Israil kalo makatutun. Totopot kalo makarati' ilo.”

JISAYA 27:11

Bulintok raan ru puun no mapua' am mapandak, raan-raan no umungon ru ruandu'-ruandu' koson saukon ra luton. Sabap ra bansa' raginio kolondo' atan-atan pangaratian, i Aki Kapuuno' Namangun risilo kalo malubatan kapoam monogom risilo.

ROMA 1:28

Sabap ra ulun marara' mangiou ra katapatan ri Aki Kapuuno', pinoloso No pamaguangan nilo lumaat, saboi baalon nilo majaka'.

JISAYA 1:7

Pagun mino pinuso noyo am bandar-bandar mino nakai' noyo solobo'. Mato mino galama' nakakito, ulun bansa' suai nampagaau ra tana' am ngaangai' no pinuso nilo.

2 PITRUS 3:5

Ilo ti sumingon mangimpai ra minimpuun ra bala' ri Aki Kapuuno' noyo limbowon am tana' ti nasauk ra galing i. Sinauk No tana' ti intor ra timug am nagayantanga' poyo ra timug;

SULABOI 4:9

Maimbolo' ilo am matoi ra inuton, sabap totopot kolondo' akanon. Ulun ondo' matoi giu' ra intok pangayawan, moonsoi poyo intor ra ulun ondo' matoi ra maitilan.

JIRIMIA 14:18

Paat ra aku minongoi ra padang, nakakito aku ra baangkai pinatoi ra pangayawan. Paat ra aku minongoi ra bandar, nakakito aku ra ulun matikapatoi ra naitilan. Nabi am imam nampaugar ra kandoi ra kalo mangarati' ra atan ondo' baalon.”

JIRIMIA 14:3

Nanusub ulun langkaya' ra ulipon-ulipon maguyum ra timug; minongoi ilo ra tulubong-tulubong kaa' kolondo' boo timug; siminaguli' ilo ra rarapu' kolondo' suang. Mabaya' ra nasindualan guang am kolondo' kalansanan nauyu' ilo am sinilian bulos.

JIRIMIA 8:7

Susuit kanawai pana makapandai ra paat ulian nano; susuit maningkuluuk, susuit tuntuayan am susuit murai niayuk makapandai ra paat bandingan ra intok. Kaa' akau, ulun Kuno, kalo makapandai ra ukum ondo' pinataak Kuno ramuyun.

LUKAS 19:44

Mamagun muno potoyon am kolondo' rondo' batu pana posoroyon ra intok nano am lunsayon kou. Gitio masauk sabap ra kalo natutunan mu ra minatong noyo i Aki Kapuuno' mamayag rirun!”

AMOS 8:13

Paat ra orou raginio ra tauli no, ungkuyon am ruandu' ondo' mamulok pana malausan sabap ra paason.

2 RAJA'-RAJA' 17:6

iono paat ra bilor kasiam ra pamarintaan ru Raja' Gosia, raja' ru Asyur nangala ra Samaria. Inibit no ulun ru Israil giu' ra Asyur koson ra ulun rinakop. Santayaran ra ulun ru Israil no pinaayan no giu' ra bandar Galag, santayaran no giu' ra kiing ru Sungoi Gabor giu' ra libung ru Gojan, am santayaran poyo giu' ra bandar-bandar ru pagun Madai.

JISAYA 3:1

Sotopot no, Tuhan Ondo' Maayo Kaga' Kuasa' no mangalap intor ra Jirusalim am Jiuda nansalinut inula' ra akanon am inumon am niayuk ngaangai' ulun ra lansanin nilono,

JISAYA 3:3

buayoi tutumula' am ulun makainggalan maayo, ulun pulitik, ulun mapandai kaga' ra sihir am mapandai kaga' mangilong.

JISAYA 23:9

Tuhan Ondo' Maayo Kaga' Kuasa' nangatang noyo raginio, maa' raginio malanggaan No limbau nilono ondo' masalok mamanggo ra baalon nilono, am niayuk magasab ra ulun ondo' makainggalan maayo.

JISAYA 44:19

Ilo ondo' nambaal ra sinungkalalaing no kalo nakapangkara' ra mindagu, “Santayaran ra tataun no suruin ku; apui no pantutunu ku ra ruti' am pamanggangan ku ra kual, am akanon. Tataun ra suwo no saukon ku ra sinungkalalaing. Ilai' noyo, sambaan kuno saputul tataun ayuk!”

JISAYA 49:21

Pansunuron mu boo guang, ‘Osoi kia naganak ra anak-anak no raki'? Sala' kia ka natatakan aku ra anak, am kalo boo maganak? Inibit aku ralalom pamatiran am ininggi' am tinatang misasangulun. Sabap raginio ati intor ru anak-anak no, am osoi kia mampasukor risilo no?’ ”

JISAYA 65:13

Sotopot no, ulun ra sumamba Raki' am gumagaya' Raki' makaalap ra masuang akanon am inumon, kaa' maitilan am paason kau. Maansukan ilo kaa' asabin kau.

YEHEZKIEL 7:12

Paat nano mamaar noyo toojo, orou nano mamaar noyo, paat mambali mantalan kolondo' boo arati', sabap ra ukuman ri Aki Kapuuno' lumumpa' ra moonong ulun.

AMSAL 10:21

Raguon ru ulun moonsoi, io rondo' barakat ru nasuangan ulun, kaa' ulun sasambungon matoi intor ra sambung nilo galama'.