JISAYA 1:7 - Tanou Moonsoi Timugon

⁷ Pagun mino pinuso noyo am bandar-bandar mino nakai' noyo solobo'. Mato mino galama' nakakito, ulun bansa' suai nampagaau ra tana' am ngaangai' no pinuso nilo.

JISAYA 1:7 ပူးပေါင်းရင်းမြစ်များ

2 TUNUNG RU BANSA' ISRAIL 28:5

Sabap ra makatula Raja' Agas, Tuhan, i Aki Kapuuno' nano nompoloso ra raja' ru Siria nangala riso am nagibit ra masuang mamagun ru Jiuda minongoi ra Damsyik koson ra ulun rinakop. Nompoloso niayuk Tuhan ra raja' ru Israil, iono Raja' Pika anak ri Rimalia, nangala ra Raja' Agas am namatoi ra 120,000 ngaulun saujor ru Jiuda ondo' mangapanggol, ralalom ru songorou. Tuhan, i Aki Kapuuno' ru kinamatuaan nilo, nompoloso ra baal raginio nasauk sabap ra mamagun ru Jiuda nangiruan noyo Riso.

MAZMUR 107:34

Sinauk No tana' ra malabung no ra limayak mapua', kinibit ru kalaatan ru ulun ondo' namagun ra giu' no.

MAZMUR 107:39

Amon ulun ri Aki Kapuuno' kalaan am asabin ra inulipon kaga' am niayuk imboloon.

MAZMUR 109:11

Polosoon noyo mansisika' ra utang no mangalap ra rapu' nano, am ampos ru kandoi nano gaawon ru ulun bokon.

JISAYA 1:8

Jirusalim ayuk natatang. Bandar no pana linibungan am kolondo' lulu' koson ra sulap nakapagayantanga' ra umo ru anggur kapoam pantau ra umo ru baliburan.

JISAYA 3:8

Jirusalim naratu' noyo! Jiuda pana napuut! Nansalinut raguon am binaal nilono manggal ayuk ra Tuhan. Kalo boo moopot nilo magasab ri Aki Kapuuno'.

JISAYA 34:9

Sungoi-sungoi giu' ra Idom makulau masauk ra tiir am tana' no masauk ra bilirang. Titikop ru pagun no mosolob koson ra tiir.

JISAYA 49:19

Pagun muno ondo' mapua' am masiluk, ragino nasauk mapisok kaga' ra ilo ondo' makaguang mayan no. Am ulun-ulun ondo' makaguang mamatoi rirun, minugar noyo maalur intor rirun.

JISAYA 5:17

Nakaayantanga' ra napuutan ru bandar, anak ru domba mongkotop ra sakot am anak ru kambing mokoowot ra limayak ondo' makasakot malabung.

JISAYA 5:9

Makaining aku ra Tuhan Ondo' Maayo Kaga' Kuasa' mindagu, “Ngaangai' baloi ondo' maayo am moonsoi ti kalo ayanin am kolondo' mangayan.

JISAYA 6:11

Mangkuot aku, “Kula' buoi ru kasaukan koson ragitio, iou Tuhan?” Taam Io, “Saboi bandar-bandar mapuut, magagai am kolondo' namagun, baloi-baloi kalo boo ayanin, tana' naliung-liung am niayuk mapua'.

JISAYA 60:15

Okou kalo tatangon am kalo boo kasisangin, am kalo polosoon koson ra bandar ondo' nokoloso am masiluk. Saukon Tokou ra urumaton am maantak, intok kaansukan ra sabuoi-buoi no.

JISAYA 62:8

Tuhan nambantu' am nampator, am suguton ginio maya' ra kuasa' Nano. “Gandum mino kalo boo akanon ru pantula' mino, am wain binaal min intor ra kapaganan mino, kalo boo inumon ru ulun bansa' suai.

JISAYA 64:10

Bandar-bandar Muno ra matulai masauk koson ra tana' kaagisan. Jirusalim masauk ra naluyuan am nasisiluk ayuk

JISAYA 9:18

Sabap ra Tuhan Ondo' Maayo Kaga' Kuasa' siminangit toojo, ukuman Nano koson ra apui ondo' nonolob ra titikop ru pagun no am niayuk namagun nano. Moonong ulun mangkara' ayuk ra kaatangan ru inan nano galama'.

JISAYA 9:5

Sangulun anak inanak ra tayar takau! Sangulun anak ungkuyon pinataak ritakau! Masauk Io ra tingganai takau. Pampiawan Riso no “Mamiminson ra mapintar”, “Aki Kapuuno' ra Matulai”, “Ama' ra Mantilayun”, “Raja' Pababansayan”.

JIRIMIA 2:15

Pantula' nano mansangal koson ra singa', am nampasauk ra tana' nano kolondo' tutuu' am masiluk; bandar-bandar nangaurus, am kolondo' ulun minayan.

JIRIMIA 4:7

Koson ra singa' mingkual intor ra pansibunian nano, koon raginio noyo ra i mampaluus ra bansa'-bansa' minintor noyo. Matong io koson mamuso ra Jiuda. Bandar-bandar Jiuda masauk ra intok nangapuut, am kalo ayanin ru ulun.

JIRIMIA 44:6

Ginio sabap no ra sangit am lasu' ru guang Kuno nakalumpa' ra bandar-bandar Jiuda am ralan-ralan giu' ra Jirusalim. Solobon Ku ngaangai' no saboi masauk ra nalunsai am intok ondo' makalalaa' saboi raino.

JIRIMIA 6:8

Alii ra Mamagun ru Jirusalim, polosoo' noyo kapaganan no masauk ra pampakaraan ramuyun! Amon ru kalo lioon min pampakaraan raginio, iruanin Takamin; kulawon Ku bandar min masauk ra tana' kaagisan ondo' kalo ayanin ru ulun.”

JIRIMIA 7:34

Pagun ti masauk ra intok kolondo' atan pana tutuu'. Bolos maansukan am maansayan, am niayuk maansukan ra paguguatan giu' ra bandar-bandar Jiuda am giu' ra ralan-ralan ru Jirusalim langgain Ku.

SULABOI 5:2

Rapu' tungkuson mai ginaau ru ulun ra bokon; ulun bansa' ra bokon tatanga' mayan ra baloi mai.

YEHEZKIEL 25:4

Ginio ra polosoon Ku akau kalaan ru bansa'-bansa' intor ra tana' kaagisan tampilon ra sirangon. Mampabigor ra kim giu' ra pagun min am mamagun ra giu' no. Akanon nilo kikinawa' am manginum ra gatas ru bibiag tinambiag min.

YEHEZKIEL 30:12

Lasakin Ku Sungoi Nil am pataakon Misir ra ralalom kuasa' ru ulun malaat. Ulun bansa' ru bokon mamuso ra titikop pagun no. Aku, Tuhan nakaindagu noyo.”

GOSIA 7:9

Kalo nakaliman ilo ra binaal ragitio nampalawo risilo. Pupus ru bayag nilo mamaar noyo, kaa' kalo nakapandai ilo.

GOSIA 8:7

Paat ra ulun Kuno mampatias ra angin, mangkumos ilo ra bagiu'. Umo ru gandum ondo' kalo sumilou kolondo' ampos ru akanon. Kaa' amon ru umo no sumilou niayuk, ulun bansa' ra bokon mangai' ra gandum nano.

IMAMAT 26:33

Porotongon Ku pangayawan giu' ra pagun mino, am mantutuliar kau giu' ra pagun ru ulun bokon. Makai' kalunsai bandar mino am mokoloso pagun mino.

IMAMAT 26:34

Paat raginio, liliwa' kau soroi ralalom pamatiran giu' ra pagun ru pantula' mino, tana' ra kalo polosoon min makatangus no paat min inayanan, mokoloso boo am makatangus.

MIKA 5:11

Pusoon Ku jimat mino am inggion Ku ngaangai' ulun mapandai mangilong min.

MIKA 6:13

Ginio ra nakatalimpuun aku noyo mampalamba' am mamuso ramuyun sabap ru tula min.

SAGULION 28:33

Talingaawon ru bansa' ru bokon ngaangai' ampos ru tatanom ondo' piniratan min toojo. Akau galama' kalo mangapu ra rondo' pana, kaa' pangimbalaan ondo' mararayus am baal kalaatan.

SAGULION 28:43

“Ulun bansa' ru bokon ondo' minayan ra pagun mino lumanja' makakuasa', kaa' akau lumanja' lumiot kuasa'.

SAGULION 29:23

Umo mino masauk ra mapua' am kolondo' onong sabap ra natauban ru bilirang am usi'. Kalo matanaman tana' raginio, am kalo tuwin ru sakot giu' no. Masauk tana' mino koson ra bandar Sodom, Gomora, Adma am Jiboim ondo' pinuso ru Tuhan paat Io siminangit kaga'.