JIRIMIA 7:13 - Tanou Moonsoi Timugon

¹³ Binaal min ngaangai' tula no; inda' pana ra ruruli' Aku minindagu ramuyun, kaa' marara' kau rumongog. Marara' kau tumaam paat ra Aku mampiau ramuyun.

JIRIMIA 7:13 ပူးပေါင်းရင်းမြစ်များ

AMSAL 1:24

Piawon takamin rumatong kaa' kalo mangkirongog kau. Kalo lioon min aku.

JISAYA 50:2

Kua kolondo' sangulun pana ulun Kuno tumaam, Paat ra Aku matong mampiau risilo? Mongkoror ilo ayuk kia sabap ra mampaguang kalo makakau' Aku mapalabus am mamayag risilo? Sotopot no, maya' ra panusuban Kuno raat masauk mapua', sungoi-sungoi saukon Ku ra tana' kaagisan saboi papait matoi am mongootong.

JISAYA 65:12

Malarom patayan mino sabap ra akau kalo tumaam bulintok ra Aku mampiau, am kalo mangkirongog kau bulintok ra Aku mindagu. Singonon min kalo gumagaya' Raki' am singonon min mambaal ra malaat.

JISAYA 66:4

Ginio ra palumpaan Ku karaat no risilo, ioginio karaat ra kalaanin nilo. Baal raginio masauk sabap ra bulintok ra Aku mampiau, kolondo' sangulun pana tumaam, am bulintok ra Aku mindagu, kolondo' sangulun pana mangkirongog. Masaga' ilo manggal Raki' am mambaal ra malaat.”

JIRIMIA 11:7

Paat ra Aku naningganai risilo miningkual intor ra Misir, totopot Aku mampakara' risilo maa' raginio gumagaya' Raki'. Saboi orou raiti' pana lakat Aku poyo mampakara' ra ulun Kuno intor ra baal raginio,

JIRIMIA 11:8

kaa' marara' ilo mangkirongog am marara' gumagaya'. Gino ayuk ilo bambalingatan am malaat koson ragili. Nanusub Aku no risilo gumagaya' ra nabantuan, kaa' marara' ilo. Ginio ra pinalumpa' Ku risilo ngaangai' ukuman ondo' sinabit ralalom ru nabantuan no.”

JIRIMIA 13:10

Bansa' ondo' malaat ti marara' gumagaya' Raki'. Lakat ilo poyo bambalingatan am malaat koson ragili. Sumambayang ilo am mangandoi ayuk ra tuhan-tuhan ra bokon. Ginio noyo sabap ra ilo masauk koson ra tapi' mariwa' ondo' kolondo' onong no.

JIRIMIA 13:11

Koson ra tapi' mariwa' naigot ra awak ru nantapi' no, koon raginio noyo kuayan Kuno ra ulun ru Israil am Jiuda maa' raginio maigot Raki'. Koon raginio boo ra ilo masauk ra ulun Kuno am mamparatong ra ompor am urumat ra inggalan Kuno. Kaa' marara' ilo gumagaya' Raki'.”

JIRIMIA 25:3

“Buoi ruo ngoopor am talu ngambilor, intor ra bilor koopor am talu ru Raja' Josia anak ungkuyon ru Raja' Amon namarinta giu' ra Jiuda saboi ra orou raiti', minindagu Tuhan raki' am kalo igondo' aku pakalilian mampasaboi ra atan ondo' rinagu Nano ramuyun. Kaa' akau kalo igondo' nampalio raginio.

JIRIMIA 26:5

Musiti' kau niayuk rumongog ra atan ondo' rinagu ru ulipon Kuno, iono nabi-nabi ondo' kalo langgain Ku manusub poongoyon ramuyun. Kaa' kalo igondo' kau rongog risilo.

JIRIMIA 29:19

Ngaangai' baal raginio masauk risilo sabap ra kalo sinugut nilo tanou Kuno ondo' pinasaboi Ku ra rinayus-rayus risilo pinabala' galing ra nabi-nabi, ulipon-ulipon Kuno. Marara' ilo mangkirongog ra tanou Kuno.

JIRIMIA 32:33

Nangiruan ilo Raki' kabalu' pana narayus Aku nangila' risilo, marara' ilo mangkirongog am marara' mangapu ra pangilaan.

JIRIMIA 35:14

Papag ri Jonadab giminagaya' ra susuban ri Jonadab maa' raginio kalo manginum ra wain. Saboi ra orou raiti' kolondo' sangulun pana risilo nanginum ra wain. Kabalu' pana rinayus Ku minindagu ramuyun, kaa' kalo ginagaya' min Aku.

JIRIMIA 35:15

Rinayus Ku nanusub ra ngaangai' ulipon Kuno, nabi-nabi mongoi ramuyun, am nanusub ilo ramuyun mangiruan ra binaal malaat am mambaal ra ondo' moonsoi. Nampakara' ilo ramuyun maa' raginio kalo sumamba kapoam mangandoi ayuk ra tuhan-tuhan ra bokon, maa' raginio marayusan min mayan ra pagun ondo' pinataak Kuno ramuyun am kinamatuaan min. Kaa' kalo riminongog kapoam nampalio kau Raki'.

JIRIMIA 35:17

Ginio ra raino Aku, Tuhan Ondo' Maayo Kaga' Kuasa', i Aki Kapuuno' ru Israil, mamparatong ra karaat ondo' binantu' Kuli ramuyun, mamagun ru Jiuda am Jirusalim. Baalon Ku gitio sabap ra marara' kau rumongog paat ra Aku mindagu, am marara' kau tumaam paat ra Aku mampiau.”

JIRIMIA 44:23

Karaat ondo' nakalumpa' ramuyun ra raino ti matong sabap ra nampataak kau ra taak simbalui ra tuhan-tuhan ra bokon, am sabap ra tula min ra Tuhan am kalo giminagaya' ra susuban Nano.”

JIRIMIA 44:4

Nararayus Aku nanusub ra ulipon Kuno, nabi-nabi ramuyun; nanginggalar ilo ramuyun nambaal ra malaat ondo' kasisangin Kuno.

JIRIMIA 5:21

Rongog no, ulun kau ra sasambungon am iisan! Makamato kau kaa' kalo makakito; makatalingo kaa' kalo rumongog!

JIRIMIA 6:10

Taam aku, “Osoi kia rumongog amon ru pakaraan ku ilo? Mokotog guang nilo am marara' rumongog ra tanou Muno; kuritin nilo tanou Muno ondo' pinasaboi kuno.

JIRIMIA 7:25

Intor ra kinamatuaan min miningkual intor ra Misir saboi ra orou raiti', magail Aku manusub ra ulipon-ulipon Kuli, nabi-nabi minongoi ramuyun.

GOSIA 11:2

Gino Aku piau-piau risilo, lumanja' ilo minggalur Raki'. Ulun Kuno mampataak ra taak simbalui ri Baal; monolob ilo ra kaminyan ra sinungkalalaing.

GOSIA 11:7

Totopot ilo masaga' mangiruan Raki'. Mampalaa ilo makiindangan sabap ra inimbolo', kaa' kolondo' osoi pana mampalabus risilo.

GOSIA 9:17

I Aki Kapuuno' ondo' sambaan Kuno mangimpai ra ulun Nano, sabap kalo riminongog ilo Riso. Masauk ilo ra ulun tumanggau ra gino ngai' ru bansa'- bansa'.

JAKARIA 7:13

Kalo tinaam Ku pakiasian nilo sabap marara' ilo rumongog paat ra Aku mindagu.

MATIUS 23:37

“Mamagun ru Jirusalim! Namatoi kau ra nabi-nabi am binobol min ulun-ulun ondo' sinusub ri Aki Kapuuno'! Ingkula' noyo Aku masaga' mangampin ramuyun, koson ra manuk puunan mampagupu' ra gogol ra kawo nano, kaa' akau marara'.