JIRIMIA 48:8 - Tanou Moonsoi Timugon

⁸ Rondo' bandar pana kalo makalabus intor ra kapusaan, bulur am limayak pusoon! Aku, Tuhan nakaindagu noyo.

JIRIMIA 48:8 ပူးပေါင်းရင်းမြစ်များ

JIRIMIA 15:8

Pagun min mososok ru ulun napuor, masuang poyo intor ra agis giu' ra nagas. Potoyon Ku ulun mamulok saboi ina' nilo maimbolo'. Pulali' Ku porotongon i mamumuso saboi ra ilo malaa' am magalabo.

JIRIMIA 25:9

‘Mampiau Aku ra ngaangai' bansa' intor ra ralayo, am niayuk ulipon Kuno, Raja' Nibukadnijar intor ra Babilonia. Susubon Ku ilo maa' raginio mamulunsar ra Jiuda am mamagun nano am niayuk mamulunsar ra ngaangai' bansa' ra liliut nano. Pusoon Ku mamagun ru Jiuda mababaya' ra bansa'-bansa' giu' ra liliut nano, am mompoloso risilo matutuk ra sabubuoi no. Osoi ayuk ondo' makakito risilo makatigog am malaa'. Aku, Tuhan, nakaindagu noyo.

JIRIMIA 48:18

Akau ondo' namagun giu' ra bandar Dibon, tuun no intor ra intok min ondo' naurumat, am turung no ra ralalom ru kaau ra tana'. Ulun mamuso ra Moab nakasaboi noyo, am nampalunsai ra ngaangai' kubu nano.

JIRIMIA 51:56

Matong pantula' koson mamuso ra Babil; saujor-saujor no rinakop noyo, busur nilo pana pinandak noyo. Aku, i Aki Kapuuno' ondo' nangukum ra kalaatan; pamakuan Ku ra Babil no nogondo' ra binaal nano.

JIRIMIA 6:26

Indagu Tuhan ra ulun Nano, “Pambayang no ra konoon karung am pagiluir no ra kaau. Pangulir no am panulaboi no ra malumpus koson ra ulun manulaboi ra pinatayan ru anak ungkuyon ondo' langkuir, sabap ra io mampaluus no mamulunsar ramuyun ra mamulali'.”

YEHEZKIEL 25:9

polosoon Ku pantula' mamulunsar ra bandar-bandar ondo' mangampin ra balitan ru Moab, nakaaya' bandar-bandar ra moonsoi kaga' iono Bit-Jisimot, Baal-Mion am Kiryataim.

JOSUA 13:17

Wilayah raginio nakasimpung Gisybon am ngaangai' bandar giu' ra tana' marata' masawat: Dibon, Bamot-Baal, Bit-Baal-Mion,

JOSUA 13:21

Wilayah no niayuk nakasimpung ngaangai' bandar giu' ra tana' marata' masawat am titikop pamarintaan ru Raja' Sigon, raja' ru ulun ru Amori ondo' nakaili' namarinta giu' ra Gisybon. I Musa nangala riso am ulun-ulun nanguasa' ru Midian: Iwi, Rikim, Jur, Gur am Riba. Ngaangai' ulun ragitio nakaili' namarinta ra tana' no ra tayar ru Raja' Sigon.

JOSUA 13:9

Wilayah nilo nakasimpung Aroir (giu' ra kiing ru limayak Sungoi Arnon) am bandar ondo' nakatatanga' ra limayak no, nakasimpung ngaangai' tana' marata' masawat intor ra Midiba saboi ra Dibon.