JIRIMIA 44:12 - Tanou Moonsoi Timugon

¹² Mamagun ondo' lakat poyo minayan ra Jiuda, am ondo' gumogot mongoi giu' ra Misir am mayan ra giu', maaru' pusoon Ku. Ilo ngaangai', maayo am poyo boborok, matoi giu' ra Misir ralalom ru pangayawan kapoam sabap ra bitilan. Baal nilo makalalaa'. Ulun magasab risilo am mamakai ra inggalan nilo koson ra pagulasan.

JIRIMIA 44:12 ပူးပေါင်းရင်းမြစ်များ

JISAYA 1:28

Kaa' pusoon No moonong ulun ra makatula am niayuk ulun gumuor Riso no. Potoyon No moonong ulun ondo' mangiruan Riso.

JISAYA 65:15

Ulun pinili' Kuno mamakai ra inggalan mino koson ra pagulasan, Aku, Tuhan Raja' mamatoi ramuyun, kaa' ilo ondo' gumagaya' Raki' aniin Ku ra inggalan bagu.

JIRIMIA 16:4

Matoi ilo sabap ra matiu' ra maruol ondo' magibit ra matoi. Kolondo' sangulun pana manulaboi kapoam mompolobong risilo. Baangkai nilo kumalayatan koson ra baja ra tana'. Matoi ilo ralalom pangayawan kapoam matoi ra bitilan. Baangkai nilo akanon ru susuit am bibiag masigo.

JIRIMIA 18:16

Sinauk nilo pagun ti ra intok makalalaa', saboi nasauk ra pangiisan ra sabubuoi no. Ngaangai' ulun ondo' mansail ra pagun ti makatigog magilong raginio, malaa' ilo am mamisik ra ulu.

JIRIMIA 24:9

Mamparatong Aku ra karaat risilo saboi ngaangai' bansa' ra titikop ru tana' ti malaa'. Iison ilo, pasaukon ra kukuritin am tauyuon. Ati ayuk pantutuliaron Ku ilo, inggalan nilo alapon ra pagulasan.

JIRIMIA 26:6

Amon ru mansang kau ayuk, pamakuan Kuno ra Baloi Kutu koson ra pinamakuan Kuno ra Silo, saboi ngaangai' bansa' ra tana' ti mamakai ra inggalan ru bandar Jirusalim koson ra pagulasan.’ ”

JIRIMIA 29:18

Ilowon Ku ilo ra pangayawan, bitilan am maruol tumapik saboi ngaangai' bansa' ra titikop ru tana' ti malaa' magilong ra baal nilo. Giu' ra ati-ati pantutuliaron Ku ilo, ulun mangalaa' am magalabo magilong ra atan ondo' nasauk risilo. Asabin ilo, am inggalan nilo alapon ra pagulasan.

JIRIMIA 29:22

Paat ra ulun ondo' inibit intor ra Jirusalim pinoongoi ra Babilonia, masaga' magulas ra sasangulun, mindagu ilo, ‘Gama' ru pamakuan ru Tuhan rirun koson ri Jidikia am i Agab, ondo' sinolob ra naayag poyo ru raja' ru Babilonia.’

JIRIMIA 42:1

Kopongo raginio ngaangai' tingganai ru saujor, nakaaya' i Joganan anak ri Karia am i Ajaria anak ri Gosaya, minatong nababaya' ra mamagun intor ra ngaangai' ru ulun manampagun.

JIRIMIA 42:22

Ginio ra karaa' noyo: matoi kau ralalom pangayawan, kapoam sabap ra bitilan, kapoam maruol tumapik ra pagun ondo' kasagaan min mayan.”

JIRIMIA 43:11

Matong i Nibukadnijar am mangala ra Misir. Ilo ondo' inaru' ra matoi sabap ra maruol, ilo ondo' inaru' masauk ra ulun rinakop ru pangayawan no masauk ra ulun rinakop ru pangayawan, am ilo ondo' inaru' matoi ralalom ru pangayawan no matoi ralalom ru pangayawan.

JIRIMIA 44:22

Saboi orou raiti' pagun min nalunsai am kolondo' osoi pana minayan ra giu' no. Baal nano makalalaa'. Inambai poyo ra pinakai ru ulun inggalan nano koson ra pagulasan. Ngaangai' baal raginio nasauk sabap ra Tuhan kalo boo mokoorot ra kinalaat am binaal makauyuyu' min.

GOSIA 4:6

Ulun Kuno mapuso sabap ra marara' ilo mangiou Raki'. Akau, imam-imam, kalo mampalio Raki' am nangimpai ra pangilaan Kuno. Ginio ra Aku pana mangimpai ramuyun am kalo mangiou ra anak-anak mino koson ra imam Kuno.

GOSIA 9:6

Paat ra karaat makasaboi am mamagun nantutuliar, ulun ru Misir manimung ramuyun koson potoyon am koson lobongon giu' ra Mimpis! Rapu' mino intor ra pirok am tana' ru baloi min ragili malungkutan ru sakot am bulungkut makaruui.

JAKARIA 8:13

Akau mamagun ru Jiuda am Israil! Paat ragili, bulintok ru ulun bansa' ra bokon magulas ra rondo' am bokon, mindagu ilo, ‘Gama' ru karaat ondo' nakalumpa' ra Jiuda am Israil makalumpa' niayuk ramuyun!’ Kaa' bayagon Takamin, saboi ulun bansa' ra bokon no mindagu ra ilo po ngai', ‘Gama' ru barakat ondo' pinataak ra Jiuda am Israil pataakin niayuk ramuyun!’ Ginio ra kaikango' guang mino am pai' kalaa'!”

UNTABAN 5:27

Amon ru liminapau noyo ruandu' no, mangkinibit timug no riso ra marualan kaga'; kumabung tinai' nano am kumumpis tingkuangon nano. Inggalan nano masauk ra ulas ra gino ngai' ru bansa' nano.