JIRIMIA 42:11 - Tanou Moonsoi Timugon

¹¹ Pai' boo kalaa' ra raja' ru Babilonia. Mabaya' Aku ramuyun, am palabuson Takamin intor ra kuasa' nano.

JIRIMIA 42:11 ပူးပေါင်းရင်းမြစ်များ

2 RAJA'-RAJA' 25:26

Kopongo raginio ngaangai' ulun ru Jiuda, ondo' langkaya' am niayuk musikin, nababaya' ra pagawai-pagawai ru saujor, nangiruan ra intok no am nagiru' ra Misir sabap ra malaa' ilo ra ulun ru Babilonia.

MAZMUR 118:6

Kalo malaa' aku sabap ra Tuhan mabaya' raki'; atan kia maalap kabaal ru ulun no raki'?

MAZMUR 46:11

Minindagu Io, “Langgai' noyo pangayawan, uligi' min noyo ra Aku ti i Aki Kapuuno', ondo' matulai intor ra ngaangai' bansa' am ra titikop ru tana' ti.”

MAZMUR 46:7

Ngaangai' bansa' mangalaa', ngaangai' pamarintaan monontol; bulintok ri Aki Kapuuno' maningkalur, tana' ti pana magagai.

JISAYA 41:10

Pai' kalaa' sabap ra Aku minaya' ramuyun. Pai' pagalabo sabap Aku i Aki Kapuuno' min. Paikangon am indanganon Takamin; sindungin am bayagon Takamin.

JISAYA 43:2

Bulintok ra akau sumandaup ra raat malandom, mabaya' Aku ramuyun; kalo makalom kau ralalom kapaganan. Bulintok ra akau mansail ra apui, kalo mosolob kau; kalo majamaran kau ra pangkinaman-pangkinaman ra maagat.

JISAYA 43:5

Pai' kalaa', sabap ra Aku mabaya' ramuyun. Intor ra sirangon am kalasaan ibiton Ku anak am akupu mino muli'.

JIRIMIA 1:8

Pai' no kalaa' risilo sabap ra mabaya' Aku rirun koson manindung rirun. Aku, Tuhan, nakaindagu noyo!”

JIRIMIA 15:20

Saukon Tokou koson ra timbok gangsa' risilo. Manggal ilo rirun, kaa' kalo makapangala rirun. Mabaya' Aku rirun koson manindung am mamayag rirun.

JIRIMIA 27:11

Kaa' bansa' ondo' masaga' kumuku' am masaga' mangandoi ayuk ra raja' ru Babilonia polosoon Ku mayan ra pagun galama' nilo koson magitanom ra giu' no. Aku, Tuhan, nakaindagu noyo.”

JIRIMIA 27:12

Pinasaboi ku baal ra nogondo' ra Raja' Jidikia intor ra Jiuda. Indagu aku, “Musiti' kou makirakop ra raja' ru Babilonia. Pangandoi no riso am ra mamagun nano, maa' raginio maayag kou.

JIRIMIA 27:17

Pai' rongogo' ilo! Musiti' kau makirakop ra raja' ru Babilonia, maa' raginio maayag kau. Kua ra bandar ti polosoon masauk ra tuntur ru nangalunsai?

UNTABAN 14:9

Pai' guor ra Tuhan, am pai' kalaa' ra mamagun ru tana' raginio. Makapangala takau risilo ra maluoi. Tuhan mabaya' ritakau, am nakapangala Io noyo ra mangampin risilo; ginio ra pai' no kalaa'.”

MATIUS 10:28

Pai' kano kalaa' risilo ondo' makapamatoi ramuyun, kaa' ondo' kolondo' kuasa' mampasubol ramuyun ra naraka. Kaa' kalaa' kano ri Aki Kapuuno' ondo' makapamatoi ramuyun am makakuasa' mampasubol ramuyun ra naraka.

MATIUS 28:20

Ilaa' ilo ti mampagagaya' ra atan ondo' panusuban Kuli. Karaa' noyo, soroi Aku mabaya' ramuyun saboi ra orou pupus ru tana' ti.”

RINALATAN 18:10

sabap ra mabaya' Aku rirun. Kolondo' sangulun pana mampakaruol rirun sabap ra masuang ulun Kuno ra bandar ti.”

ROMA 8:31

Sabap raginio, atan boo paraguon takau? Amon ru i Aki Kapuuno' bala takau, osoi kia makagula' ritakau? Maaru' kolondo'!

SAGULION 20:4

Tuhan i Aki Kapuuno' min mabaya' ramuyun; manaak Io ramuyun ra kamanangan.’

2 TIMOTIUS 4:17

Kaa' Tuhan noyo ondo' nangampin raki' am nampaikang raki' saboi naalap ku mampabala' ra ngaangai' ru Tanou Moonsoi no, suku' maining boo ru ulun sala' ka Jaudi. Ginio ra pinalabus aku niayuk intor ra potoyon raan.

JOSUA 1:5

Okou Josua, kolondo' sangulun pana makapangala rirun buoi ra okou maayag. Mabaya' Aku rirun koson Aku nabaya' ri Musa. Magail Aku mabaya' rirun, am kalo toojo mangiruan rirun.

JOSUA 1:9

Karaa' noyo susuban Kuno rirun maa' raginio mangintopot am baani kou! Pai' kalaa' kapoam mapalo guang, sabap Aku Tuhan i Aki Kapuuno' muno, mabaya' rirun ra ati ayuk angayan muno.”