JIRIMIA 4:7 - Tanou Moonsoi Timugon

⁷ Koson ra singa' mingkual intor ra pansibunian nano, koon raginio noyo ra i mampaluus ra bansa'-bansa' minintor noyo. Matong io koson mamuso ra Jiuda. Bandar-bandar Jiuda masauk ra intok nangapuut, am kalo ayanin ru ulun.

JIRIMIA 4:7 ပူးပေါင်းရင်းမြစ်များ

2 RAJA'-RAJA' 24:1

Paat ra pamarintaan ru Raja' Joyakim, Raja' Nibukadnijar intor ra Babilonia namulunsar ra Jiuda. Buoi talu ngambilor Raja' Joyakim kiminuku' kalalaat ra Raja' Nibukadnijar, kaa' tauli no giminuor Raja' Joyakim.

2 RAJA'-RAJA' 25:1

Giminuor Raja' Jidikia ra Raja' Nibukadnijar intor ra Babilonia. Ginio ra namulunsar Raja' Nibukadnijar ra Jirusalim nabaya' ra ngaangai' saujor nano ra orou koopor, sila' koopor, bilor kasiam ru pamarintaan ru Raja' Jidikia. Nangkim ilo giu' ra liwar ru Jirusalim am nambaal ra timbok koson magawang ra bandar no.

JISAYA 1:7

Pagun mino pinuso noyo am bandar-bandar mino nakai' noyo solobo'. Mato mino galama' nakakito, ulun bansa' suai nampagaau ra tana' am ngaangai' no pinuso nilo.

JISAYA 5:9

Makaining aku ra Tuhan Ondo' Maayo Kaga' Kuasa' mindagu, “Ngaangai' baloi ondo' maayo am moonsoi ti kalo ayanin am kolondo' mangayan.

JISAYA 6:11

Mangkuot aku, “Kula' buoi ru kasaukan koson ragitio, iou Tuhan?” Taam Io, “Saboi bandar-bandar mapuut, magagai am kolondo' namagun, baloi-baloi kalo boo ayanin, tana' naliung-liung am niayuk mapua'.

JIRIMIA 2:15

Pantula' nano mansangal koson ra singa', am nampasauk ra tana' nano kolondo' tutuu' am masiluk; bandar-bandar nangaurus, am kolondo' ulun minayan.

JIRIMIA 22:6

Koson Raki', istana raja' ru Jiuda koson ra kinoonsoi ru tana' Giliad am Kagunungan Libanon, kaa' intok no saukon Ku ra tana' kaagisan ondo' kalo ayanin ru ulun.

JIRIMIA 22:7

Mangator Aku ra ulun koson manutuk raginio. Magibit ilo ra kapak, puuton boo lugu'-lugu' ondo' moonsoi, ondo' binaal intor ra tataun sidar. Mopongo raginio pasuboon nilo boo ra ralalom ru apui.

JIRIMIA 25:38

Nangiruan Tuhan ra ulun Nano koson ra singa' nangiruan ra luang batu nano. Kalaatan ru pangayawan am sangit ru Tuhan nangulau ra pagun ti nasauk ra tana' kaagisan.

JIRIMIA 25:9

‘Mampiau Aku ra ngaangai' bansa' intor ra ralayo, am niayuk ulipon Kuno, Raja' Nibukadnijar intor ra Babilonia. Susubon Ku ilo maa' raginio mamulunsar ra Jiuda am mamagun nano am niayuk mamulunsar ra ngaangai' bansa' ra liliut nano. Pusoon Ku mamagun ru Jiuda mababaya' ra bansa'-bansa' giu' ra liliut nano, am mompoloso risilo matutuk ra sabubuoi no. Osoi ayuk ondo' makakito risilo makatigog am malaa'. Aku, Tuhan, nakaindagu noyo.

JIRIMIA 26:9

Kua baani kou mindagu ralalom inggalan ru Tuhan ra Baloi Nati masauk koson ra Silo, am ra bandar ti pusoon am masauk ra intok ondo' kalo boo ayanin?” Linimpuan aku boo ru ulun masuang.

JIRIMIA 27:8

“Kaa' bansa' kapoam pamarintaan ondo' marara' kumuku' ri Nibukadnijar ukumin Ku ra pangayawan, bitilan am maruol tumapik saboi polosoon Ku i Nibukadnijar mamuso risilo ra lingonon.

JIRIMIA 33:10

Indagu Tuhan, “Kon ru ulun ra intok ti koson ra tana' kaagisan, am kolondo' ulun kapoam bibiag ondo' minayan ragiti. Ragu nilo tojojo motopot, sabap ra bandar-bandar Jiuda am ralan-ralan giu' ra Jirusalim masiluk ngaangai' no; kolondo' ulun am bibiag ondo' minayan ra giu' no. Kaa' giu' ra intok-intok raginio morongog poyo

JIRIMIA 34:22

Manusub Aku, am ilo pana mamulunsar ra bandar ti saguli'. Gaawon nilo bandar ti am solobon. Saukon Ku bandar-bandar giu' ra Jiuda koson ra tana' kaagisan ondo' kalo ayanin ru ulun. Aku, Tuhan, nakaindagu noyo.”

JIRIMIA 4:29

Posongonsol pulalai mangkuda am mamanah, mangkinibit ra ulun magiru' intor ra ngaangai' bandar. Mokoondo' ulun nagiru' ra kataunan, ondo' bokon nagaloi ra bulur batu. Ngaangai' bandar iruanin, kolondo' ulun ondo' masaga' mayan ra giu' no.

JIRIMIA 44:2

Gitio noyo ragu ru Tuhan Ondo' Maayo Kaga' Kuasa', i Aki Kapuuno' ru Israil, “Akau galama' nakatainu ra kapusaan ondo' pinalumpa' Ku ra Jirusalim am ngaangai' bandar ra bokon giu' ra Jiuda. Saboi raino pana bandar-bandar raginio lakat poyo ralalom ru baal nalunsai am kolondo' minayan.

JIRIMIA 46:18

Aku, Tuhan Ondo' Maayo Kaga' Kuasa', Aku noyo raja'. Aku noyo i Aki Kapuuno' ondo' maayag. Koson ra Gunung Tabor masawat poyo intor ra gunung ra bokon, am Gunung Karmil masawat poyo intor ra ralimbou ru raat, koon raginio noyo kaikangan ru ulun ondo' mamulunsar ramuyun.

JIRIMIA 49:19

Koson ra singa' miningkual intor ra kataunan gimbaan giu' ra kiing ru Sungoi Jordan am nagaloi ra padang ru sakot ondo' masansam, koon niayuk ra Aku matong am mangkinibit ra ulun ru Idom magiru' ra mamulali' intor ra pagun nilo. Kopongo raginio tingganai ondo' pilion Kuno mamarinta ra pagun no. Osoi kia ondo' mogondo' Raki'? Osoi kia baani gumula' Raki'? Panguasa' ra ati kia ondo' masaga' manggal Raki'?

JIRIMIA 5:6

Ginio sabap ra ilo pinatoi ru singa' intor ra kataunan; bibinsangon ilo ru taani intor ra tana' kaagisan, am ampunguon saugar-ugar giu' ra bandar-bandar nilo. Amon ru mingkual ulun, bibinsangon nilo, sabap ra tula nilo masuang kaga'; ruruli' ilo no nangiruan ri Aki Kapuuno'.

JIRIMIA 50:17

Indagu Tuhan, “Ulun ru Israil koson ra sampanon ru domba ondo' inilou am pinantutuliar ru singa'. Binulunsar ilo galing ru raja' ru Asyur, kalupus raginio Raja' Nibukadnijar intor ra Babilonia, mangaliit ra bungul nilo.

JIRIMIA 50:44

“Koson ra singa' miningkual intor ra kataunan gimbaan giu' ra kiing ru Sungoi Jordan, am nagaloi ra padang masakot ondo' masansam, koon raginio niayuk ra Aku, Tuhan, matong am mangkinibit ra ulun ru Babilonia magiru' ra mamulali' intor ra bandar nilo. Tingganai ondo' pilion Kuno pana ondo' mamarinta boo ra pagun no. Osoi kia ondo' mokogondo' Raki'? Osoi kia ondo' baani manggal Raki'? Panguasa' ra ati kia ondo' makakau' manggal Raki'?

JIRIMIA 8:16

Soroi noyo pantula' giu' ra bandar Dan; gala' ru kuda nilo morongog noyo. Titikop ru pagun mangalaa' paat ra kuda nilo mampagala'. Pantula' nakaratong noyo koson mamuso ra titikop ru pagun takau, am niayuk bandar takau am niayuk ngaangai' ru mamagun nano.”

JIRIMIA 9:11

Indagu Tuhan, “Saukon Ku Jirusalim ra intok panunturan ra nangapuut, intok pansibunian ru uku' kataunan. Bandar-bandar ru Jiuda masauk ra masiluk, intok ondo' kalo boo ayanin.”

YEHEZKIEL 12:20

Bandar-bandar ondo' raino nososok ra ulun mangapuso, am pagun no masauk ra tana' kaagisan. Paat raginio noyo bagu no makaliman ilo ra Aku noyo Tuhan.”

YEHEZKIEL 21:31

Makaliman kau ra sangit Kuno koson ra apui ondo' bibilak paat ra Aku mapaabus raginio ramuyun. Pataakon Takamin ra ulun mapuka', ondo' nakaigila' mamuso ra ulun.

YEHEZKIEL 32:2

“Okou ulun mapandai matoi, anii' ra pampakaraan moporos ra raja' ru Misir. Posoboyo' ragu Kuno riso, ‘Giu' ra saang ru bansa'-bansa' ra bokon ilai' kou ayuk koson ra singa', kaa' baal muno koson poyo ra buayo ondo' minabol giu' ralalom ru sungoi. Kalayam muno nampalutok am nampajamol ra sungoi-sungoi.

DANIL 5:19

Nasauk io ra maayo kaga' saboi ulun intor ra ngaangai' bansa', bansa' boborok am ragu malaa' am monontol riso. Mamatoi io kapoam mompoloso ra sasangulun maayag sumugut ra kasagaan nano. Painsawaton kapoam paingganaan no osoi ayuk sumugut ra kasagaan nano.

DANIL 7:4

Kasaa' no baal nano koson ra singa', kaa' mokoondo' ra kawo koson ra kawo ru susuit kanui. Tatanga' aku magilong, kawo nano nautus intor riso. Bibiag no nakayang intor ra tana', am pinabigor ra kalayam nano koson ra ulun, am inanian ra utok ru ulun.

IMAMAT 26:31

Mapalunsai Aku ra bandar mino am niayuk intok pampakanan mino. Kalo mangapu Aku ra taak intor ramuyun.

IMAMAT 26:33

Porotongon Ku pangayawan giu' ra pagun mino, am mantutuliar kau giu' ra pagun ru ulun bokon. Makai' kalunsai bandar mino am mokoloso pagun mino.