JIRIMIA 32:20 - Tanou Moonsoi Timugon

²⁰ Paat ra galing i nambaal Kou ra kaimuagan am baal-baal ra makaimuag giu' ra Misir, am saboi raino pana lakat kou poyo mambaal raginilo, ra gino ngai' ru Israil am niayuk ra gino ngai' ru bansa' ra bokon. Koon raginio noyo Okou nauligan kaga' ra ati ayuk intok.

JIRIMIA 32:20 ပူးပေါင်းရင်းမြစ်များ

2 SAMUIL 7:23

Giti ra titikop ru tana' ti, kolondo' bansa' ra bokon koson ra Israil, ondo' binayag Mu noyo intor ra pangulipanan, am niayuk mapasauk risilo ra ulun Muno galama'. Binaal maayo am makaimuag no, ondo' binaal Muno risilo napatulai noyo ra inggalan Muno ra titikop ru tana' ti. Napagiru' Kou ra bansa'-bansa' ra bokon am dewa-dewa nilono paat ra ulun Muno jumalai mangayou, ulun ondo' binayag Muno intor ra Misir koson masauk ra ulun Muno galama'.

1 TUNUNG RU BANSA' ISRAIL 17:21

Giti ra titikop ru tana' ti kolondo' bansa' koson ra Israil, ondo' binayag Mu intor ra pangulipanan, koson mampasauk risilo ra ulun Muno galama'. Binaal maayo am makaimuag ondo' binaal Muno risilo, mampasauk ra inggalan Muno mauligan kaga' ra titikop ru tana' ti. Pinalabus Mu ulun Muno intor ra Misir, am napagiru' ra bansa'-bansa' ra bokon paat ra ulun Muno minongoi pangayou.

NIGIMIA 9:10

Nambaal Kou ra kaimuagan ondo' makaimuag, koson manggal ra raja', pagawai am mamagun ru raja', sabap ra Okou nakapandai ati kulaan ulun Muno inimbolo' nilo. Ginio ra inggalan Muno maayo kaga' saboi orou raiti'.

NIGIMIA 9:11

Linapak Mu raat koson nambaal ra ralan ru ulun Muno mongoi ra sandaup, nangator Kou risilo ra sandaup nansail ra lonor ru raat ondo' mapua'. Ulun ondo' nangilou risilo nolosor giu' ra raat ondo' malandom, koson ilo ra batu ondo' liminosor giu' ra raat ondo' makalalaa'.

MAZMUR 135:9

Ra giu' no mambaal Io ra baal ra makaimuag am pulanu koson mangukum ra raja' ru Misir am ngaangai' ru mangngandoi nano.

KAINGKUALAN 10:2

am maa' raginio mabalaan min anak am akupu min ati kulaan inanja'-anja' Ku ulun ru Misir, paat ra Aku mambaal ra kaimuagan. Makapandai kau ngaangai' ra Aku noyo Tuhan.”

KAINGKUALAN 3:20

Kaa' mamakai Aku ra kuasa' Kuno am mangukum ra ulun ru Misir am mambaal ra sauk ondo' makalalaa' ra giu' no. Mopongo raginio paugaron no akau.

KAINGKUALAN 7:3

Kaa' mangkinibit Aku ra raja' no bambalingatan, am kalo mangining ra ondo' raguon muno, kabalu' pana maparatong Aku ra masuang karaat ra Misir.

KAINGKUALAN 9:16

Kaa' polosoon Tokou maayag koson mapakito rirun ra kuasa' Kuno, maa' raginio inggalan Kuno mauligan toojo ra titikop ru tana' ti.

JISAYA 63:12

Ati kia Tuhan, ondo' ralalom ru kuasa' Nano nambaal Io ra baal makaimuag ondo' pinabala' galing ri Musa? Linapak No timug ru raat am mangitang ra ulun Nano sumandaup ra raat ondo' malandom, saboi inggalan Nano mauligan kaga' ra sabuoi-buoi no.” Koson ra kuda masigo kalo makasaru ilo sabap ra Tuhan mangindangan risilo.

JISAYA 63:14

Ati poyo kulaan ra tambiag ibiton giu' ra limayak malabung, ginio niayuk Tuhan mangitang ra ulun Nano am mapatangus. Kitangon No ulun Nano am maa' raginio ra inggalan Nano uramaton.

JIRIMIA 13:11

Koson ra tapi' mariwa' naigot ra awak ru nantapi' no, koon raginio noyo kuayan Kuno ra ulun ru Israil am Jiuda maa' raginio maigot Raki'. Koon raginio boo ra ilo masauk ra ulun Kuno am mamparatong ra ompor am urumat ra inggalan Kuno. Kaa' marara' ilo gumagaya' Raki'.”

DANIL 6:28

Io mangindangan am mamayag; mambaal ra kaimuagan-kaimuagan, ra tana' ti am poyo giu' ra suruga'. Io namayag ri Danil intor ra sinaam ru singa'.”

DANIL 9:15

“Nanulu' Kou ra kuasa' Muno bulintok ra Okou nagibit ra ulun Muno miningkual intor ra Misir, iou Tuhan, i Aki Kapuuno' mai. Lakat mai poyo makara' kuasa' Muno. Makatula akai noyo am nambaal ra kasalaan.

RINALATAN 7:36

Io ti noyo ondo' nagibit ra bansa' ru Israil miningkual intor ra Misir nabaya' ra kukula' kaimuagan sinauk no giu' ra Raat Malia' am poyo giu' ra tana' kaagisan saboi apat ngoopor ngambilor buoi.

SAGULION 11:3

am kaimuagan Nano. Nakito min noyo atan ondo' binaal Nano ra raja' ru Misir am titikop pagun nano.

SAGULION 4:34

Igondo' kia mokoondo' rondo' tuhan ondo' baani mangalap rondo' ulun intor ra bansa' ra bokon am saukon ulun raginio ra ulun nano galama', koson ondo' binaal ru Tuhan i Aki Kapuuno' min tayar min giu' ra Misir? Giu' ra talupak ru mato min galama' namakai Io ra kuasa' am kaikangan Nano ondo' maayo; maparatong Io ra maruol tumapik am pangayawan, mambaal ra kaimuagan am makaimuag, am niayuk mangkinibit ra baal makalalaa' masauk.

SAGULION 6:22

Akai galama' nakakito Riso nambaal ra kaimuagan am baal ondo' napakalalaa' ra ulun ru Misir, raja' nilo am ngaangai' pagawai ru raja'.

SAGULION 7:19

Karaa' noyo karaat makalalaa' ondo' nakito min ra mato galama', kaimuagan am tatandu', am niayuk kuasa' maayo am kinapanggol ondo' pinakai ru Tuhan i Aki Kapuuno' min koson mapalabus ramuyun. Koson ra Io namuso ra ulun ru Misir ra galing i, koson niayuk raginio io mamuso ra ngaangai' bansa' ondo' kalaanin min raino.