JIRIMIA 30:15 - Tanou Moonsoi Timugon

¹⁵ Pai' boo pambutok intor ru pilat min, sabap ra kolondo' kalansanan min ra mapali'. Mangukum Aku ramuyun ra ralan raginio, sabap ra tula min masuang kaga' am kalaatan min najanjayan kaga'.

JIRIMIA 30:15 ပူးပေါင်းရင်းမြစ်များ

IJRA 9:13

Raino nangukum Kou ramon sabap ra ngaangai' tula am inanggalan mai ra ukum Muno. Kaa' nakapandai akai iou Aki Kapuuno' mai, ra ukuman Muno mamaan poyo kaga' intor ra ondo' binaal mai; am Okou pana namayag ramon.

AYUP 34:29

Amon ru mamatas i Aki Kapuuno' koson ra mongkoror ayuk, kolondo' osoi pana mokololob Riso. Amon ru pasibunion No bulos Nano, kolondo' osoi pana makatuum Riso.

AYUP 34:6

Kinara' aku ra magabau, sabap ra mindagu aku ra motopot. Malandom pilat kuno, kaa' kolondo' sala kuno.’

MAZMUR 107:17

Mokoondo' niayuk ulun budu am naimbolo' sabap ra tula nilo, am niayuk inimbolo' sabap ra laat nilo;

JISAYA 1:6

Intor ra ulu suku' ra pampalar ru kalayam, kolondo' sanganu pana batang ru inan mino moonsoi. Inan mino naliput ra lanit, ruruko, am pipilat, ondo' kalo poyo piniiran kapoam binangkos, kapoam tinapisan ra umau.

JISAYA 5:2

Manangkul io ra tana' nano am mamatir ra batu-batu nano; mantanom io ra anggur napili', am nambaal io ra manara pantamungan. Mangkali io ra rondo' luang koson pamagaan ra kawa' ru anggur nano. Io pana mantamung saboi kawa' ru anggur maansak, kaa' moonong kawa' no mataris.

JIRIMIA 11:13

Tuhan-tuhan ru mamagun Jiuda masuang kaga', koson ra kinasuang ru bandar nilo. Mamagun ru Jirusalim nambaal ra altar koson mampataak ra taak simbalui ra Dewa Baal ondo' makatataman no; altar ondo' binaal nilo koson ra kinasuang ru ralan giu' ra Jirusalim.

JIRIMIA 15:18

Kua marayus aku ayuk maimbolo'? Kua ra pilat kutu malandom am kalo mapali'-pali'? Kuayan Muno mapasinduol kia raki' koson ra sungoi ondo' lumasak bulintok malasu'?”

JIRIMIA 2:19

Kalaatan muno galama' ondo' mangukum rirun; maimbolo' kou sabap ra nangiruan Raki'. Makaliman kou ra mapara' boo pait no am sala no nangiruan Raki', Tuhan, i Aki Kapuuno' muno, am kalo boo gumagaya' Raki'. Aku, Tuhan Raja' Ondo' Maayo Kaga' Kuasa' nakaindagu noyo.”

JIRIMIA 30:12

Indagu Tuhan ra ulun Nano, “Pilat min masaran toojo, pilat min ra kolondo' tatapis no.

JIRIMIA 30:14

Ngaangai' ambai min nakalilian noyo ramuyun; kalo boo mampalio ilo ramuyun. Koson ra pantula', mamulunsar Aku ramuyun, ukuman ondo' maagat nakalumpa' ramuyun sabap ra tula min masuang kaga' am kalaatan min najanjayan kaga'.

JIRIMIA 30:16

Kaa' raino ngaangai' ondo' monolon ramuyun tolonon, am ngaangai' pantula' min ibiton mugar koson ra ulun rinakop. Ngaangai' ulun ondo' nangimbolo' ramuyun imboloon, am ngaangai' ulun ondo' nantakou ramuyun takawin.

JIRIMIA 30:17

Kabalu' pana mindagu pantula' min, ‘Sion pinatiran noyo, am kolondo' mampalio riso,’ kaa' akau paligagon Ku saguli', am pilat min kapalion Ku.”

JIRIMIA 46:11

Mamagun kau ru Misir, ongoi no ra Giliad am pagalap ra tatapis! Ngaangai' ru tatapis min napandayan ra kolondo' onong; kolondo' rondo' pana makababas ramuyun.

JIRIMIA 6:13

Ngaangai' ulun ondo' maayo am niayuk ondo' boborok, magingkaut am kalo mabanis guang. Atan poyo ra nabi am imam pana mamparuung ra ulun.

SULABOI 1:5

Pantula' nakasugut sabap nakapanguasa' ra Jirusalim; Tuhan nambaal riso naimbolo' sabap ra masuang kaga' tula nano. Mamagun nano rinakop am inibit ru pantula'.

SULABOI 2:13

Okou Jirusalim, bandar ru Sion ondo' tagamin kaga', atan kia paraguon kuno? Kalo makapangansuk aku rirun. Osoi pana kalo poyo igondo' naimbolo' koson rirun. Karaat maayo koson ra raat malangka' am malandom lumumpa' rirun; kolondo' boo kalansanan ra tayar muno.

SULABOI 3:39

Kua kia pambutok takau paat ra ukumin sabap ra tula takau?

SULABOI 4:13

Kaa' baal raginio nasauk sabap ra nabi-nabi nano makatula noyo, am imam-imam nano namatoi ra ulun ondo' kolondo' sala.

MIKA 1:9

Pilat ru Samaria kalo mapali', am Jiuda mataki' malumpa' ru kaimbalaan ondo' nogondo'. Kapusaan nakasuku' noyo ra kulobon garabang ru Jirusalim, intok namagunan ru bansa' kuno.”

MIKA 7:9

Natulaan takau ra Tuhan. Ginio ra musiti' mansaan ra sangit Nano ra kalo mantilayun. Kaa' pupus nano sumaung Io ritakau am mangani' ritakau ra katimpakan. Magibit Io ritakau mingkual mongoi ra sinda, am makaliman takau ra pamayagan ru Tuhan.

NAGUM 3:19

Pilat muno kalo mababas am ruruko-ruruko muno kalo mapali'. Ngaangai' ulun ondo' nokorongog ra tanou katutukan muno magitapap ra longon sabap ra maansukan. Kolondo' sangulun pana makapamayag ra inan intor ra kalaatan muno ondo' kalo lumonggo'-longgo'.