JIRIMIA 23:16 - Tanou Moonsoi Timugon

¹⁶ Indagu Tuhan Ondo' Maayo Kaga' Kuasa' ra mamagun ru Jirusalim, “Pai' rongogo' nabi-nabi ondo' magail mangani' ra kalansanan ondo' abau ayuk. Mampasaboi ilo ayuk ra pangkaraan galama' am sala' ka tanou intor Raki'.

JIRIMIA 23:16 ပူးပေါင်းရင်းမြစ်များ

JIRIMIA 14:14

Kaa' taam Tuhan, “Nabi-nabi raginio nagabau ralalom ru inggalan Kuno; Kalo sinusub Ku ilo, am kalo niayuk nanusub kapoam minindagu risilo. Pinaintalang ondo' tinunung nilono sala' ka intor Raki'. Manala' ilo ra baal-baal ra kolondo' onong, ondo' binaal-baal nilo galama'.

YEHEZKIEL 13:6

Pinaintalang risilo no kalo motopot am ondo' inala' nilo pana kalo motopot. Mangiou ilo ra mampasaboi ra ragu Kuno, kaa' kalo nanusub Aku risilo. Kaa' malansan ilo maa' raginio ondo' inala' nilono masauk.

MATIUS 7:15

“Ilalai' min ulun-ulun ondo' migiangku ra nabi. Rumatong ilo ramuyun tumilu ra domba, kaa' sotopot no ilo ti koson ra taani masangit.

YEHEZKIEL 13:3

Koon ragitio noyo ragu ru Tuhan Raja', “Aibui boo ra nabi-nabi sasambungon no! Ginuang nilono noowot intor ra kakaraan nilo galama' am pinaintalang risilo kalo motopot.

1 JUANIS 4:1

Pabukat kau ngaangai' ondo' tagamin ku! Pai' kau pangintopot ra ngaangai' ulun ondo' mindagu ra mokoondo' ilo ra Ambiluo ri Aki Kapuuno'. Kaa' kinami' min ilo po galing ru mokoondo' ilo ra Ambiluo intor ri Aki Kapuuno' kapoam kolondo'. Sabap ra raino ti masuang nabi magabau soroi ra ati-ati ayuk.

JIRIMIA 23:21

Indagu Tuhan, “Kalo manusub Aku ra nabi-nabi no, kaa' minugar ilo niayuk. Kalo nangani' Aku ra tanou risilo, kaa' mindagu ilo ralalom ru inggalan Kuno.

2 RAJA'-RAJA' 17:15

Marara' ilo gumagaya' ra susuban Nano. Kalo linio nilo nabantuan ondo' binaal ru Tuhan am kinamatuaan nilai. Kalo rinongog nilo ondo' pinakara'-pinakara' ru Tuhan. Sinamba nilo sinungkalalaing ondo' kolondo' onong, saboi ilo galama' nasauk ra kolondo' onong. Minaya' ilo ra kaindalaman ru bansa'-bansa' giu' ra liliut nilo, kabalu' pana nanginggalar noyo Tuhan ra baal raginio.

MIKA 2:11

Masaga' kau ra nabi ondo' masaga' magabau am mamparuung, am ondo' mindagu, ‘Manala' aku ra makaalap kau ra wain am inumon makagauk ondo' masuang toojo.’

JIRIMIA 23:26

Saboi sanggilan kia nabi-nabi mampalayau ra ulun Kuno ra abau ondo' binaal-baal nilo galama'?

YEHEZKIEL 22:28

Nabi-nabi nambuni ra tula-tula raginio koson ra ulun nangapur ra timbok. Nakakito ilo ra pinaintalang ondo' magabau, am nambaal ilo ra ragu inala' ondo' magabau niayuk. Minindagu ilo ra nampasaboi ilo ra ragu intor ra Tuhan, Raja', kaa' Aku, Tuhan kalo minindagu risilo.

YEHEZKIEL 13:23

Raino pinaintalang ra kalo motopot am ondo' ragu inala' mino ondo' nampakalayau no napupusan noyo. Tatanga' Aku mamayag ra ulun Kuno intor ra kuasa' mino maa' raginio makapandai kau ra Aku noyo Tuhan.”

YEHEZKIEL 13:16

iono nabi-nabi ondo' minindagu ra ragu manala' ra Jirusalim moonsoi, kaa' sotopot no kalo!” Koon raginio noyo ragu ru Tuhan Raja'.

JIRIMIA 29:8

Aku Tuhan, i Aki Kapuuno' ru Israil, nampakara' ramuyun maa' raginio kalo mokoloso inan ruungon ru nabi-nabi ondo' minayan ra tatanga' min kapoam ru osoi pana ondo' minindagu ra makapanala' ilo ra orou matong. Pai' lioo' inupi nilo.

JIRIMIA 9:20

Indagu aku, “Rongogo' ragu ru Tuhan, ruandu' kau ngai', talinaasi' ragu Nano. Ilaa' noyo anak-anak ruandu' min ra manulaboi, ilaa' rangan-rangan mino ra marimbai ra rimbai panguliran.

JIRIMIA 2:5

Indagu Tuhan, “Atan kia panguwan ru kinamatuaan min Raki'? Kua kia talikur ilo Raki'? Sinamba nilo sinungkalalaing ondo' kolondo' onong, saboi ilo galama' nasauk ra kolondo' onong.

AMSAL 19:27

Alii ra anak kuno, amon ru lumonggo' kau migigila', malilianan min mataki' ngaangai' inigigilaan mini.

ROMA 1:21

Kabalu' pana nakatutun ilo ri Aki Kapuuno', kalo mangurumat kapoam maringkuanang ilo Riso. Kaa' pamaguangan nilo kolondo' onong am guang nilo ra jajajou no liminondom.

JIRIMIA 9:12

Pangkuot aku, “Iou Tuhan, kua ra pagun ti nasauk ra kolondo' tutuu' am napua' koson ra tana' kaagisan, saboi kolondo' ulun mansail no? Osoi kia ondo' sama' pintar koson makarati' ra ngaangai' no? Osoi kinua' balain Muno intor ra baal ragitio maa' raginio makapambala' io ra ulun bokon?”

SULABOI 2:9

Kulobon-kulobon garabang nalunsai napumpunan ru ondo' nalunsai, am tataun ru umpok nano nangapandak. Raja' am tingganai-tingganai raino giu' ra pagun pamatiran. Ukum ru Tuhan kalo boo pailaan, am nabi-nabi kalo boo mangapu ra pinaintalang intor ra Tuhan.

1 RAJA'-RAJA' 22:11

I Jidikia anak ri Kinaana, sangulun intor ra nabi no, nambaal ra kukula' sangau ru basi' am indagu ra Raja' Agab, “Koon raginio ragu ru Tuhan, ‘Sangau-sangau basi' ti noyo makapangala kou ra ulun ru Siria saboi maala ilo kalingon.’ ”

2 TUNUNG RU BANSA' ISRAIL 18:5

Ginio ra pampiau Raja' Agab ra nabi-nabi, ondo' suang no olo'-olo' apat ngaatus ngaulun. Pangkuot io risilo, “Maalap ku kia ra bulunsar Ramot kapoam kalo?” Taam ilo, “Bulunsaro' noyo, mangani' i Aki Kapuuno' rirun ra kamanangan.”

JIRIMIA 29:23

Koon raginio noyo pupus nilo sabap ra nambaal ilo ra tula mangaayo giu' ra Israil: nansasawa' ilo, am namakai ra inggalan ru Tuhan koson nagabau. Binaal raginio nansala' ra kasagaan ru Tuhan. Nakapandai Io ra atan ondo' binaal nilo, am Io galama' nasauk ra sasi' ondo' manggal risilo. Tuhan nakaindagu noyo.”