JIRIMIA 2:11 - Tanou Moonsoi Timugon

¹¹ Kolondo' bansa' ra ati pana ondo' nakaili' nangalig ra tuhan nano, kabalu' pana tuhan-tuhan no i aki kapuuno' ondo' kalo motopot. Kaa' ulun Kuno nangalig Raki', i Aki Kapuuno' ondo' nangani' risilo ra intok ondo' matulai, ra rondo' ondo' kalo mambaal ra atan pana.

JIRIMIA 2:11 ပူးပေါင်းရင်းမြစ်များ

1 RAJA'-RAJA' 11:33

Baalon Ku baal raginio sabap ri Salomo nangimpai Raki' am siminamba ra dewa-dewa: Asyitorit, dewi ru ulun ru Sidon; Kamos, dewa ru ulun ru Moab; am Molok, dewa ru ulun ru Amon. Kalo gumagaya' i Salomo Raki'. Kalo nogondo' io koson ra ama' nali i Daut ondo' gumagaya' Raki' am nanugut ra susuban Kuno.

2 RAJA'-RAJA' 1:3

Kaa' panusub malaikat ru Tuhan no ri Ilia, nabi intor ra Tisbi, mongoi tuum ra ulun sinusub ru Raja' Agajia am mangkuot risilo, “Kua ongoi kau pangkuot ra Baal-Jibub, dewa ru bandar Ikron no? Kalo kia nakapandai kau ra soroi i Aki Kapuuno' giu' ra Israil?

2 TUNUNG RU BANSA' ISRAIL 13:9

Pinagiru' min imam-imam ru Tuhan, iono imam-imam papag ri Arun am pinagiru' min niayuk ulun ru Liwi. Koson ra palit nilo, linantik min imam sumugut ra kaindalaman ru bansa'-bansa' ra bokon. Osoi ayuk ondo' matong ra sanginan sapi' gawayan kapoam tulu' ngainan domba, malantik masauk ra imam koson rorondo' ondo' sala' ka i Aki Kapuuno'.

MAZMUR 106:20

Aligin nilo i Aki Kapuuno' ondo' matulai no ra sinungkalalaing ru sapi' mongkotop ra sakot.

MAZMUR 115:4

Sinungkalalaing nilono binaal intor ra mas am pirok, binangun ru kalindu' ru ulun.

MAZMUR 3:3

Mangalimut ilo am mindagu, “Kalo mangindangan i Aki Kapuuno' riso!”

JISAYA 37:19

am niayuk nonolob ra dewa-dewa nilono. Kaa' dewa-dewa no totopot kolondo' boo kuasa' sabap iono sinungkalalaing intor ra tataun am batu ondo' binaal ru ulun.

JIRIMIA 16:20

Makapambaal kia ulun ra tuhan nano galama'? Totopot kalo! Atan ondo' binaal nano maaru' sala' ka i Aki Kapuuno' ondo' motopot.”

JIRIMIA 18:13

Indagu Tuhan, “Kuati' ra moonong bansa' ru mokoondo' kia baal ragitio nasauk noyo. Ulun ru Israil nambaal noyo ra ondo' makalalaa'!

JIRIMIA 2:5

Indagu Tuhan, “Atan kia panguwan ru kinamatuaan min Raki'? Kua kia talikur ilo Raki'? Sinamba nilo sinungkalalaing ondo' kolondo' onong, saboi ilo galama' nasauk ra kolondo' onong.

JIRIMIA 2:8

Kalo nangkuot imam-imam, ‘Ati boo Tuhan?’ Imam-imam Kuno pana kalo nakaulig Raki'. Panguasa'-panguasa' giminuor Raki'; nabi-nabi minindagu ralalom inggalan ru Baal am sinamba sinungkalalaing ondo' kolondo' onong.”

JIRIMIA 5:7

Indagu Tuhan, “Kua kia musiti' Aku mangampun ra tula ru ulun Kuno? Nangiruan ilo Raki' am sumamba ra tuhan ondo' kalo motopot. Aniin Ku ulun Kuno ra akanon saboi ilo maasug, kaa' nansawa' ilo am minongoi ra baloi ru ulun mantalan ra inan.

YEHEZKIEL 14:5

Ngaangai' sinungkalalaing no nampainggalur ra ulun ru Israil intor Raki', kaa' taam Kuno malansan Aku manimayo risilo sumaguli' Raki'.’

YEHEZKIEL 5:7

Okou Jirusalim, rongogo' atan ondo' paraguon Kuno, Tuhan Raja'. Sabap ra kalo giminagaya' kou ra ukum Kuno am kalo siminugut ra susuban Kuno, namparatong kou ra masuang poyo kapaganan intor ra bansa'-bansa' ra liput muno. Minaya' kou ra kaulayan ru bansa'-bansa' ra bokon.

MIKA 4:5

Moonong bansa' sumamba am gumagaya' ra dewa nilo galama', kaa' itakau sumamba am gumagaya' ra Tuhan, i Aki Kapuuno' takau ra sabuoi-buoi no.

ROMA 1:23

Sala' ka i Aki Kapuuno' ondo' mantilayun sambaan nilo, kaa' sinungkalalaing ondo' tumilu ra ulun mapandai matoi, susuit, bibiag mamuntana' kapoam bibiag manungkama'.

1 KORINTUS 8:4

Ondo' pangkuatan min ra mangakan ra akanon ondo' pinairang ra sinungkalalaing: Makapandai takau raginilo sotopot no binaal ayuk ru ulun, sabap ra kolondo' tuhan ra bokon. Nakapandai takau niayuk ra rorondo' ayuk i Aki Kapuuno', am kolondo' boo bokon.

GALATIA 4:8

Ra galing i, paat ra akau kalo poyo nakaulig ri Aki Kapuuno', akau inulipon ru riwato ondo' karaan ra tuhan, ondo' kuasa' nilo sala' ka intor ri Aki Kapuuno'.

SAGULION 32:16

Sumamba ilo ra sinungkalalaing, am nomposolon ra Tuhan, nambaal ilo ra kalaatan, am napasangit Riso.

SAGULION 32:21

Mangkinibit ilo Raki' mangusolon ra ondo' sala' ka Aki Kapuuno', am sumangit ra sinungkalalaing nilo. Ginio ra mangkinibit Aku risilo sumangit ra ondo' sala' ka bansa'. Mangkinibit Aku risilo mangusolon ra bansa' ondo' sasambungon.

SAGULION 33:29

Akau Israil, maansukan kau kaga'! Kolondo' osoi pana koson ramuyun, bansa' ondo' binayag ru Tuhan. Tuhan galama' noyo ondo' nasauk ra perisai am ilang min, koson manaung ramuyun am manaak ramuyun ra kamanangan. Matong pantula' min makimasi', am kikinjangin min ilo.

1 PITRUS 1:18

Nakapandai kano ra logo ondo' binayaran nampalabus ramuyun intor ra kaulayan ra kolondo' onong ondo' sinugul min intor ra kinamatuaan min i. Pai' ru koson ra pirok kapoam mas ra maalap kalunsai no ondo' nakapampalabus ramuyun;

1 SAMUIL 4:21

Ininggalanan no anak raginio i Ikabod. Kono, “Nairu' noyo boo ra Israil ti katulayan ri Aki Kapuuno'.” Rinagu no ginio sabap ra Kaban Nabantuan ginaau noyo am iwan nano ra ungkuyon am niayuk ralaki nano minatoi noyo.