JIRIMIA 17:11 - Tanou Moonsoi Timugon

¹¹ Koson ra susuit nangamut ra talu' ondo' sala' ka io tangan, koson raginio noyo ulun ondo' kalo mabanis guang mokoowot ra rapu'. Paat ra umur lakat poyo mamulok matatakan io ra ngaangai' rapu' nano. Paat ra pupus ru bayag nano mainono' ra io ulun ondo' sasambungon kaga'.

JIRIMIA 17:11 ပူးပေါင်းရင်းမြစ်များ

AMSAL 28:20

Ulun mabanis guang barakaton io ru Tuhan, kaa' ulun ondo' mataki' lumangkaya', kalo makalabus io ra ukumin.

AMSAL 21:6

Kinalangkayaan ra naalap intor ra ralan kalo mabanis guang, sala' ka ayuk kalo mantilayun kaa' maaru' magibit ra kapatayan.

JIRIMIA 22:17

Kaa' okou ondo' maguyum ayuk ra ampos galama'; mamatoi kou ra ulun ondo' kolondo' sala, am mangimbolo' ra mamagun muno ra malaat kaga'. Ginio noyo ragu ru Tuhan.

JIRIMIA 22:13

Aibui boo ra ulun ondo' nambaal ra baloi nano ra kolondo' katimpakan, am kinaayo no ra kolondo' kabanisan ru guang. Nanusub io ra ulun mangandoi ra kalo gajiin, am kalo nambayar ra gaji' nilo.

AMSAL 28:8

Osoi-osoi masauk ra langkaya' ondo' kologoon no bunga' ru ruit am niayuk mamparuung ra ulun bokon, rapu' nano masauk ra longgom ru ulun bokon ondo' makaasi' ra ulun musikin.

AMSAL 15:27

Ulun maguyum ra mauli' kaa' ralalom ralan kalo matanda', mapakapagon risilo sambaloi. Ulun ra kalo maambi' maawar painawo.

2 PITRUS 2:14

Ilo ti kalo majajala' mambaal ra tula am makapaliso ilo ra pansasawaan. Ulun ondo' malawo pangintapatan, rukuon nilo palayawo'. Maringkumaa' ilo am ginio kaindalaman nilo. Kaa' ulason ilo ri Aki Kapuuno'!

TITUS 1:11

Moonsoi sonsongon kabang nilai no, sabap ra mampakalayau ilo ra sasambaloi ra pangilaan nilai ra kalo motopot ti. Baal nilo ti makauyuyu' toojo sabap ra maguyum ilo ayuk ra panginduitan galama'.

JIPANYA 1:9

Ukumin Ku ngaangai' ulun ondo' siminambayang koson ra ulun ondo' kalo nakaulig Raki', am ondo' nantakou am niayuk namatoi koson nompososok ra baloi ru tingganai pangandayan nilo ra kuliamos-kuliamos tinakou.”

AMSAL 28:22

Ulun makalit mampaguang ra mataki' lumangkaya'. Kalo malimanan no ra kamusikinan mataki' makalumpa' riso.

AMSAL 13:11

Linangkayaan noowot ra ralan maluoi, makai' mataki', kaa' rapu' ra tinimung-timung rumuang poyo.

MAZMUR 55:23

Pataako' noyo pagalabaan muno ra Tuhan, am manungka' Io ramuyun; kalo polosoon No ulun mabanis guang kalaan.

LUKAS 12:20

Kaa' indagu i Aki Kapuuno' riso, ‘Ulun sasambungon! Rondom ra raiti' niayuk patayan muno! Osoi mangalap ra ngaangai' ondo' tinimung muno galama'?’ ”

2 PITRUS 2:3

Ulun-ulun migigiangku ra mangingila' maringkumaa' am mansail ra tutunungon nilai ti noyo maguyum ilo ayuk ra ampos nilo galama'. Kaa' pinatampos noyo kalalair ukum pataakin risilo am kapusaan ondo' inaru' no, maginaa noyo risilo.

1 TIMOTIUS 6:9

Ulun ondo' maguyum ayuk ra kalangkayaan, maingkinibitan boo ru gogot ru guang nilo ondo' kalo matanda' am makalalaa', ginio ondo' mamparatu' am mamuso ayuk ra ulun.

MATIUS 23:13

“Aibui boo ramuyun, mangingila' ra Ukum ri Musa am ulun-ulun ru Parisi! Maabau-abau kau kaga', akau galama' kalo masaga' masauk ra ulun ri Aki Kapuuno', am niayuk mongompong kau ra ulun bokon ondo' masaga' masauk ra ulun ri Aki Kapuuno'. [

MALIAKI 3:5

Mindagu Tuhan Ondo' Maayo Kaga' Kuasa', “Matong Aku koson mangakim ramuyun. Mataki' Aku masauk ra sasi' koson manggal ra ulun mapandai kaga' ra sihir, ulun mansawa', ulun mangani' ra inono' kalo motopot, ulun nambaal ra malaat ralalom ru baal mampagaji' ra ulun mangandoi, ulun ondo' mangimbolo' ra ruandu' napuor, nailusan ra matuo, am ulun bansa' ra bokon, am niayuk ra ngaangai' ulun ondo' kalo mangurumat Raki'.”

JAKARIA 5:4

Minindagu Tuhan Ondo' Maayo Kaga' Kuasa' ra porotongon No pagulasan no ra moonong baloi ru moonong mantatakou am baloi ru moonong ulun ondo' nagibot ra kalo motopot. Pagulasan no mayan ra baloi nilo saboi ngaangai' no masauk ra tunturan ru napuut.”

MIKA 7:3

Ngaangai' ilo mapandai mambaal ra kalaatan. Ngaangai' pagawai am akim makitaak ra rasua. Ulun ondo' mauligan toojo mampajajal ra atan gogoton ru guang nilo. Ginio ra maguguum ilo koson mambaal raginio.

MIKA 2:9

Pinagiru' min ngaangai' ruandu' ru ulun Kuno intor ra baloi ondo' kasagaan nilo; ginaau min barakat Kuno ra sabuoi-buoi no intor ra lalaing-lalaing nilo.

AMOS 3:10

Indagu Tuhan, “Sinuangan ru mamagun ru Samaria baloi nilo ra kuliamos-kuliamos ondo' noowot intor ra kalaatan am nantakawan. Totopot ilo kalo makapandai ra mabanis guang.

AMSAL 28:16

Mangunguasa' ra sasambungon no malaat kaga', kaa' mangunguasa' ondo' masisang ra kalo mabanis guang pamarintaan nano mabuoi.

AMSAL 23:5

Ruit mataki' makai' koson kinataki' ru ganit, koson ayuk ra ruit no makakawo am mansiab ra limbowon koson ra kanui.

MAZMUR 49:13

Kabalu' pana ulun no langkaya', koson niayuk ra bibiag, ilo pana mapandai matoi niayuk.

JIRIMIA 6:13

Ngaangai' ulun ondo' maayo am niayuk ondo' boborok, magingkaut am kalo mabanis guang. Atan poyo ra nabi am imam pana mamparuung ra ulun.

JIRIMIA 8:10

Ginio ra pataakin Ku umo nilono ra ulun bagu, am andu' nilo ra ulun bokon. Ngaangai' ulun ondo' maayo am niayuk boborok, maguyum ra kalabaan ra kalo mabanis guang. Niayuk poyo nabi am imam pana mamparuung ra ulun.

AYUP 20:21

Paat ra ilo mangakan, kalo igondo' mokoondo' ra suwo, kaa', raino napupusan noyo kalangkayaan nilo.