JIRIMIA 14:18 - Tanou Moonsoi Timugon

¹⁸ Paat ra aku minongoi ra padang, nakakito aku ra baangkai pinatoi ra pangayawan. Paat ra aku minongoi ra bandar, nakakito aku ra ulun matikapatoi ra naitilan. Nabi am imam nampaugar ra kandoi ra kalo mangarati' ra atan ondo' baalon.”

JIRIMIA 14:18 ပူးပေါင်းရင်းမြစ်များ

YEHEZKIEL 7:15

Ulun mantutula' giu' ra ralan, ulun marualan am maitilan giu' ra ralalom ru baloi. Osoi ayuk ondo' soroi giu' ra liwar ru bandar matoi sabap ra pangayawan, am osoi ayuk ondo' soroi giu' ra ralalom ru bandar matiu' ra maruol am maitilan.

SULABOI 1:20

“Iou Tuhan, ilai' kaimbalaan kuno am kinapagon ru guang kuno. Guang kuno natutuk sabap ra tula kuno ragili. Pampatayan masauk giu' ra ralan maayo, kaa' niayuk giu' ra ralalom ru baloi pana mokoondo' patayan.

JIRIMIA 8:10

Ginio ra pataakin Ku umo nilono ra ulun bagu, am andu' nilo ra ulun bokon. Ngaangai' ulun ondo' maayo am niayuk boborok, maguyum ra kalabaan ra kalo mabanis guang. Niayuk poyo nabi am imam pana mamparuung ra ulun.

JIRIMIA 6:13

Ngaangai' ulun ondo' maayo am niayuk ondo' boborok, magingkaut am kalo mabanis guang. Atan poyo ra nabi am imam pana mamparuung ra ulun.

JIRIMIA 5:31

ngaangai' ondo' rinagu ru nabi-nabi abau ayuk; imam-imam mamarinta maya' ra susuban ru nabi-nabi no, am ulun Kuno masaga' ra baal raginio. Kaa' atan kia ondo' baalon nilo ra pupus no?”

SAGULION 28:36

“Tuhan mamatir ramuyun am raja' min giu' ra pagun ru bansa' ru bokon, intok ondo' kalo igondo' kasauk ra ayanan min kapoam kinamatuaan min. Giu' no mangandoi kau ra tuhan-tuhan ondo' binaal intor ra tataun am batu.

2 PITRUS 2:3

Ulun-ulun migigiangku ra mangingila' maringkumaa' am mansail ra tutunungon nilai ti noyo maguyum ilo ayuk ra ampos nilo galama'. Kaa' pinatampos noyo kalalair ukum pataakin risilo am kapusaan ondo' inaru' no, maginaa noyo risilo.

MIKA 3:11

Ilo panguasa' ru bandar nampaugar ra pamarintaan koson makaalap ra rasua, ngaangai' imam mambala' ra arati' ru Ukum koson makaalap ra gaji', am nabi-nabi niayuk nambala' ra pinaintalang koson makaalap ra ruit; kaa' mindagu ilo ngaangai' ra Tuhan mabaya' risilo. Konilo, “Kalo malumpa' takau ru karaat, sabap Tuhan mabaya' ritakau.”

SULABOI 4:9

Maimbolo' ilo am matoi ra inuton, sabap totopot kolondo' akanon. Ulun ondo' matoi giu' ra intok pangayawan, moonsoi poyo intor ra ulun ondo' matoi ra maitilan.

JIRIMIA 23:21

Indagu Tuhan, “Kalo manusub Aku ra nabi-nabi no, kaa' minugar ilo niayuk. Kalo nangani' Aku ra tanou risilo, kaa' mindagu ilo ralalom ru inggalan Kuno.

JIRIMIA 2:8

Kalo nangkuot imam-imam, ‘Ati boo Tuhan?’ Imam-imam Kuno pana kalo nakaulig Raki'. Panguasa'-panguasa' giminuor Raki'; nabi-nabi minindagu ralalom inggalan ru Baal am sinamba sinungkalalaing ondo' kolondo' onong.”

JISAYA 28:7

Nabi am imam pana nagauk kaga' saboi kakasumpil ayuk ra mugar. Masuang kaga' ininum nilo ra wain am arak saboi makasaru sabap naubong. Nabi-nabi nangagauk kaga' saboi kalo boo mauligan nilo atan ondo' pinaintalang ri Aki Kapuuno', am ngaangai' imam nangagauk kaga' saboi kalo boo mapatasan nilo kasaukan ondo' pinabala' risilo.

SAGULION 28:64

Pantutuliaron kau ru Tuhan ra gino ngai' ru bansa'-bansa' ra titikop ru tana' ti. Giu' no mangandoi kau ra tuhan-tuhan ondo' binaal intor ra tataun am batu, tuhan-tuhan ondo' kalo igondo' kau samba kapoam sinamba ru kinamatuaan min.

JISAYA 22:2

Kalo moonsoi ngaangai' ulun ru bandar mangiantak am magilakup maansukan. Ulun mino ondo' minatoi ralalom ru pangayawan ti sala' ka minatoi sabap ra namulunsar.

JIRIMIA 6:25

Kalo makakau' akai mugar giu' ra ralan maayo kapoam mongoi ra umo, sabap giu' ra ati pana pantula' ondo' manakinandoi mapatabual ra malaa'.”

AMOS 4:6

“Aku noyo ondo' namparatong ra bitilan ra ngaangai' ru bandar min, kaa' kalo siminaguli' kau Raki'.

SULABOI 2:19

Ruruli' no tumirong ra mosorondom, am piawo' noyo Tuhan; pabalaa' ngai' suang ru guang muno am pakimasi' no koson ra anak-anak muno, anak-anak ondo' tatanga' maitilan giu' ra moonong lisangon ru ralan.