JAKARIA 11:16 - Tanou Moonsoi Timugon

¹⁶ Pinangandoi ku sangulun magagalung koson magalung ra domba Kuno, kaa' kalo nampalio io domba ondo' natatak. Kalo naguyum io ra domba ondo' nakalayau, kapoam namabas ra ondo' napilat, kapoam nangani' ra akanon ra domba ondo' lakat poyo naayag. Kaa' inakan no kual ru domba ondo' molomok kaga', am namagus ra salindu ru domba.

JAKARIA 11:16 ပူးပေါင်းရင်းမြစ်များ

KASAUKAN 31:38

Buoi ruo ngoopor ngambilor ti aku minayan rirun, kambing am domba muno kolondo' kalo nansayat am kalo poyo igondo' aku pakaakan ra kambing gawayan muno.

KASAUKAN 33:13

Taam i Jakub, “Aka', nakapandai kono ra lalaing-lalaing ti mangalawo, am mangkara' aku poyo ra domba am ngaangai' ru bibiag ondo' lakat poyo tumiti'. Amon ru ulisokon ugar no kabalu' pana songorou ayuk, mamagatoi ilo ngaangai'.

JISAYA 40:11

Alungin No ulun Nano koson ra sangulun magagalung; timungon No am kubibilon No anak-anak ru domba, am ralalom kinolomoi, aakon No indung-indung ru domba.

JIRIMIA 23:2

Gitio noyo ondo' pinaragu ru Tuhan, i Aki Kapuuno' ru Israil, intor ra ilo panguasa' ondo' sotopot no magalung ra ulun Nano, “Kalo inalungan min ulun Kuno; pinantutuliar min boo am pinagiru' min ilo. Raino ukumin Takamin sabap ra kalaatan min.

JIRIMIA 23:22

Amon ru nakapandai ilo ra atan soroi ralalom ru pangkaraan Kuno, maaru' mampatanou ilo ra tanou Kuno ra ulun Kuno. Koon raginio ulun Kuno lumonggo' mambaal ra tula am mambaal ra ondo' malaat.

YEHEZKIEL 34:10

Aku, Tuhan Raja', mampatanou ra Aku pantula' min. Alapon Ku domba-domba Kuno intor ramuyun, am domba-domba kalo boo palansanin ramuyun. Kalo boo mangiou Aku ramuyun magalung ra kaatangan min galama' ayuk. Bayagon Ku domba-domba maa' raginio kalo masauk ra akanon min.’ ”

YEHEZKIEL 34:16

“Uyumon Ku ilo ondo' natatak, ibiton muli' ilo ondo' nakalayau, am babason ilo ondo' marualan; kaa' ilo ondo' molomok am maikang pusoon Ku, sabap ra Aku magagalung ondo' mambaal ra matimpok.

YEHEZKIEL 34:21

Sangawon min am anjungon min domba ondo' marualan saboi maanjung ilo intor ra sampanon ru domba.

DANIL 11:36

“Raja' ru Siria mambaal maya' ra kasagaan ru guang. Nabaya' ra kalimbawan, karaan ru raja' ra maayo io poyo intor ra dewa ru ati pana, am poyo makakuasa' poyo intor ri Aki Kapuuno' Ondo' Masawat Kaga'. Nambaal raja' no raginio saboi ra paat ri Aki Kapuuno' mangukum riso. Baalon ri Aki Kapuuno' totopot koson ra inatangan Nano.

JUANIS 10:1

“Balain takamin toojo: Ulun ondo' sumubol ra kandang ru domba kalo maya' ra kulobon, kaa' mangkiwa' ayuk ra timbok, io no sangulun mantatakou am mampapagaau.