IPISUS 6:6 - Tanou Moonsoi Timugon

⁶ Pai' gagaya' ayuk paat ra akau tainuin, koson ra makiompor kau ayuk risilo. Kaa' suguto' min noyo toojo ra kasagaan ri Aki Kapuuno', koson ulipon kau ri Kristus.

IPISUS 6:6 ပူးပေါင်းရင်းမြစ်များ

JIRIMIA 24:7

Aniin Ku ilo ra kasagaan nilo koson makarati' ra Aku noyo Tuhan. Koon raginio ilo masauk ra ulun Kuno, am masauk Aku ri Aki Kapuuno' nilo, sabap ra sumaguli' ilo Raki' ra sotopot ru guang.

JIRIMIA 3:10

Kabaal ngaangai' no, i Jiuda ondo' kalo gumagaya' no babaalon ayuk siminaguli' Raki', sabap ra guang nano kalo mabanis. Aku, Tuhan nakaindagu noyo.”

MATIUS 12:50

Osoi ayuk mampagagaya' ra kasagaan ri Ama' Kuno giu' ra suruga', ulun ragitio noyo pabukat Kuno ra ungkuyon, pabukat Kuno ra ruandu' am ina' Kuno.”

MATIUS 7:21

“Sala' ka ngaangai' ulun ondo' mindagu ra Aku Tuhan nilo masauk ra ulun ri Aki Kapuuno', kaa' ilo ayuk ondo' sumugut ra kasagaan ru Ama' Kuno giu' ra suruga'.

MARKUS 3:35

Osoi ayuk mambaal ra kasagaan ri Aki Kapuuno', io no pongkotob Kuno ra ungkuyon, io no pongkotob Kuno ra ruandu', io no ina' Kuno.”

ROMA 6:17

Kaa' paringkuanangan ri Aki Kapuuno', sabap ra galing i inulipon kau ru tula, kaa' raino gumagaya' kau toojo ra pangilaan motopot ondo' inapu min.

1 KORINTUS 7:22

Sabap ra sangulun ulipon ondo' piniau ru Tuhan, sotopot no pinalabus io no ru Tuhan. Mogondo' niayuk ra sangulun sala' ka ulipon ondo' piniau ru Tuhan, uliponon io no ri Kristus.

GALATIA 1:10

Ati boo kulaan, maguyum aku kia ra pangiawan intor ra ulun? Kalo, pangiawan intor ri Aki Kapuuno' ayuk gogoton kuno. Makikiilong aku kia ra ulun? Kalo, amon ru koson raginio sala' ka ulipon aku ri Kristus.

IPISUS 5:17

Ginio ra pai' kau noyo bungas, kaa' uyumo' min noyo atan ondo' kasagaan ru Tuhan.

PILIPI 2:12

Sabap raginio pabukat ondo' tagamin kuno, koson masalok kau niayuk giminagaya' raki' paat ra aku soroi ramuyun, mulu' poyo gagaya' mino ra raino ti ra itakau nakapaginggalur. Pirot kano mompogogot ra kaansayan ru pamayagan minti, ioginio mansail ra ati kulaan kinapirot ru guang min sumugut am mangurumat toojo ri Aki Kapuuno'.

KOLOSI 1:9

Ginio nai ra intor poyo ra akai nakaining raginio, masalok akai boo mangkara' ramuyun ralalom pakiasian mai. Makiasi' akai ri Aki Kapuuno' ra makatutun kau ra atan sotopot no kasagaan Nano, ioginio aniin kau ru Ambiluo ri Aki Kapuuno' ra kapintaran am kapandayan.

KOLOSI 4:12

Bilin kaansayan poyo intor ri Ipapras. Akau niayuk ra ulun. Io ti ulipon ri Jisus Kristus am masalok io mapirot mangkara' ramuyun ralalom pakiasian nano. Intor noyo ra pakiasian nano ri Aki Kapuuno' maikang kau am totopot makaintutun am poyo sumugut niayuk ra ngaangai' ru kasagaan ri Aki Kapuuno'.

1 TISALONIKA 2:4

Kaa' sotopot no, pai' ru mampakaansuk akai ra guang ru ulun kaa' guang ri Aki Kapuuno', ondo' mangkinam ra guang mai. Io no ondo' nampasauk ramon koson maaya' akai mampasaboi ra Tanou Moonsoi no.

1 TISALONIKA 4:3

Sabap ra masaga' i Aki Kapuuno' ra kaayagan mino mapasau, ginio ra inggalur kano ra baal ru pansasawaan.

IBRANI 10:36

Musiti' pantataan ayuk guang min, maa' raginio makapampagagaya' kau ra kasagaan ri Aki Kapuuno' am makaalap kau ra atan ondo' binantu' Nali.

IBRANI 13:21

Gama' ru mangani' Io ramuyun ra moonong baal moonsoi, koson makapambaal kau ra kasagaan Nano. Gama' ru ralalom ri Jisus Kristus noyo, mampasauk Io ra kasagaan Nano ralalom kaayagan takau. Musiti' takau mongompor ri Kristus ra sabuoi-buoi no! Amin.

1 PITRUS 2:15

Sabap ra kasagaan ri Aki Kapuuno' noyo ginio, ra mambaal kau ayuk ra moonsoi, koson mopolonggo' kau ra panguwan ru ulun bungas ondo' kolondo' onong no.

1 PITRUS 4:2

Gagaya' kano ra kasagaan ri Aki Kapuuno' buoi ru kaayagan min am pai' noyo bayaa' kinibit ru guang min.

1 JUANIS 2:17

Tana' ti am ngaangai' suang nano ondo' gogoton ru ulun, tumalimpuun mapuso. Kaa' ulun ondo' gumagaya' ra susuban ri Aki Kapuuno', maayag io ra sabuoi-buoi no.