IPISUS 6:19 - Tanou Moonsoi Timugon

¹⁹ Aku pana karaan ra pakiasian min, maa' raginio mangani' i Aki Kapuuno' raki' ra katandaan paat ra aku mindagu. Maa' raginio makakau' aku boo mampabala' ra atan ondo' kalo igondo' pinabala' intor ra Tanou Moonsoi no.

IPISUS 6:19 ပူးပေါင်းရင်းမြစ်များ

RINALATAN 13:46

Kaa' mulu' piboo i Paulus am i Barnabas makakau' mindagu, konilo, “Akau no galing sotopot no papasabayan ra bala' intor ri Aki Kapuuno' ti. Kaa' kalo inapu min am pangkaraan min poyo ra kalo noyo maaya' kau mokoowot ra kaayagan motopot am mantilayun ti. Ginio sabap ra akau iruanin mai am mongoi akai poyo ra ulun sala' ka Jaudi.

RINALATAN 14:3

Rasul-rasul nabuoi niayuk minayan ra giu' i am makakau' ilo boo mampasaboi ra tanou intor ra Tuhan. Nampainono' Tuhan ra pambalaan nilo intor ra togom Nano motopot ra mangani' risilo ra kuasa' mambaal ra kaimuagan am tatandu'.

RINALATAN 18:26

Makakau' io toojo mangila' ra baloi sambayangan. Paat i Prisila am i Akwila nakaining ra pangilaan nali, ibito' nilo io ra baloi nilai am pambala' riso ra motopot toojo intor ra pamayagan ri Aki Kapuuno' ralalom inggalan ri Jisus.

RINALATAN 19:8

Talu ngambulan buoi ri Paulus nampatanou ra ulun-ulun giu' ra baloi sambayangan am kalo malaa' io. Nakimansunur io risilo koson mampaintopot risilo intor ra Pamarintaan ri Aki Kapuuno'.

RINALATAN 2:4

Ilo ngaangai' kinuasa' ru Ambiluo ri Aki Kapuuno'. Tumalimpuun ilo mindagu ralalom nansalinut ragu ra bokon maya' ra atan ondo' tinaakan ru Ambiluo ri Aki Kapuuno' no risilo.

RINALATAN 28:31

Nangila' io risilo ra tanou intor ri Jisus Kristus am Pamarintaan ri Aki Kapuuno'. Kalo nalaa' io am kolondo' niayuk nongompong riso.

RINALATAN 4:13

Ulun ru Majlis Ugama nangimuag magilong ra kinabaani ri Pitrus am i Juanis, am poyo katutuni' nilo karuo rasul ti sala' ka ulun maatang am kolondo' sikul. Katutuni' nilo boo ruo ngaulun rasul ti rangan toojo ri Jisus.

RINALATAN 4:29

Raino Tuhan, ilai' ati kulaan akai lolobon nilo. Anii' akai, ulipon-ulipon Muti, ra kakawan mampabala' ra tanou Muno.

RINALATAN 4:31

Kopongo ilo makiasi', intok tinimungan nilai nauyog. Kinuasa' ilo ngaangai' ru Ambiluo ri Aki Kapuuno', am tumalimpuun ilo mampabala' ra tanou intor ri Aki Kapuuno' ra kalo malaa'.

RINALATAN 9:27

Kaa' inindangan io ri Barnabas ondo' nagibit riso paumaa' ra rasul-rasul. Tunungo' ri Barnabas risilo ati kulaan i Saulus nakakito ra Tuhan ra tanga' ru ralan am ati kulaan Tuhan minindagu riso. Nambala' io niayuk ra ati kulaan i Saulus makakau' toojo nampasaboi ra Tanou Moonsoi intor ri Jisus giu' ra Damsyik.

RINALATAN 9:29

Nakimantaam io niayuk ra ulun ru Jaudi ondo' mindagu ra ragu ru Junani, am nangkinam ilo poyo mamatoi riso.

ROMA 15:30

Pabukat kau ngaangai', kitaakon takamin toojo ralalom inggalan ru Tuhan takau i Jisus Kristus am ralalom ru togom tinaakan ru Ambiluo ri Aki Kapuuno', koson mababaya' takau mirot makiasi' ri Aki Kapuuno' ra bala kuno.

ROMA 16:25

Omporo' noyo i Aki Kapuuno'! Makakuasa' Io mampaikang ra pangintapatan mino sumugut ra Tanou Moonsoi intor ri Jisus Kristus ondo' pinabala' kuno ramuyun. Ginio potonowon kuno sumugut ra ondo' pinaintalang noyo ri Aki Kapuuno' raki', ioginio katapatan ondo' kalo igondo' pinabala' intor ra galing i.

1 KORINTUS 1:5

Sabap ra masuang boo katutunan min ralalom ngaangai' baal, niayuk ondo' raguon am kapandayan min.

1 KORINTUS 2:7

Kapintaran ra rinagu kuli io no kapintaran intor ri Aki Kapuuno', ondo' kalo igondo' pinabala'. Ginio nga ra kalo poyo biningkal tana' ti, pinongo noyo ri Aki Kapuuno' kapintaran Nano koson itakau pana katulayon.

1 KORINTUS 4:1

Karaa' min noyo ra akai ti ulipon ri Kristus. Akai ti noyo inanian ra kandoi mampatanou ra katapatan ri Aki Kapuuno' ondo' kalo igondo' pinabala'.

2 KORINTUS 1:11

Ra indangan ru pakiasian min mamayag Io poyo ramon. Sabap ra masuang pakiasian mini iowon ri Aki Kapuuno', am mambarakat io ramon, am sabap raginio, masuang ulun boo maringkuanang ri Aki Kapuuno'.

2 KORINTUS 3:12

Sabap ra makakalansanan akai raginio, makakau' akai boo mampatanou.

2 KORINTUS 6:11

Pabukat kau ngaangai' ra bandar Korintus, naransak rinagu mai ramuyun. Pinabala' mai ra motogom akai toojo ramuyun.

2 KORINTUS 7:4

Malansan am maringkuanang aku ramuyun. Ginio boo ra kabalu' pana masuang kapaganan mai, kaa' guang kuno pinaikang min am maansukan aku toojo.

2 KORINTUS 8:7

Mokoondo' noyo ngaangai' ramuyun: maikang pangintapatan, matanda' mindagu, makakapandayan, mataau am motogom kau ramon. Ginio nai boo ra piroto' min poyo pangindanganan moonsoi ti.

IPISUS 1:9

Itakau noyo napaintalangan no ra ondo' kalo igondo' pinabala', ioginio inatang no kalalair i, koson ralalom ri Kristus ginio pinongo.

IPISUS 3:9

Mampakito aku ra ngaangai' ulun ra inatang ri Aki Kapuuno' ondo' kalo igondo' pinabala' ti. Nga Io ondo' nampasauk ra ngaangai' limbowon am tana' ti, kalo nambala' Io ra inatang Nano intor ragili.

KOLOSI 2:2

Bagu raginio, guang nilai ti baani am mokopontogom ilo ra rondo' am bokon am niayuk makakalansanan ilo toojo sabap ra makakaintutunan ilo ra katapatan. Ginio am makaulig ilo poyo ra ondo' kalo igondo' pinabala' ri Aki Kapuuno', ioginio i Kristus galama'.

KOLOSI 4:3

Karaa' min niayuk akai ralalom ru pakiasian min, maa' raginio i Aki Kapuuno' mangani' ramon ra kaluagan mampasaboi ra tanou ri Kristus ondo' kalo igondo' pinabala'. Sabap ra kinibit ru kandoi ragitio noyo ra aku pinasubol ra pangaputan ti.

1 TISALONIKA 2:2

Nakapandai kau ra kalo poyo nakaratong akai ramuyun ra Tisalonika, inimbolo' am inasaban akai giu' ra bandar Pilipi. Kaa' iou pana masuang ulun tumula' ramon ragili, inindangan akai ri Aki Kapuuno' ra makaatas akai mampasaboi ra Tanou Moonsoi ondo' intor Riso.

1 TISALONIKA 5:25

Pabukat ku ngai', karaa' min niayuk akai ra pakiasian min.

2 TISALONIKA 3:1

Pupus ti, pabukat ku ngai' pakiasi' kano ramon ra Tuhan, maa' raginio bala' ru Tuhan mataki' makatanou am apuon mabaya' ra urumat, mogondo' koson ra intok min ragili.

1 TIMOTIUS 3:16

Kolondo' sangulun pana makapagali' ra mumpara' boo bonsoi ru pangilaan motopot ondo' kalo igondo' pinabala' i, ioginio: Minintalang i Jisus Kristus am nasauk ra ulun, iniou Io ru Ambiluo ri Aki Kapuuno', nakito Io ru malaikat-malaikat. Pinatanou Io ra ngaangai' bansa', inintopot Io ru ulun ra ngaangai' libung ru tana' ti, am kinayang Io minuli' ra katulayan ru suruga'.

PILIMON 1:22

Liliwa' raginio, pongoono' raki' kalalair rondo' lamin giu' ra baloi muno, sabap ra malansan aku i Aki Kapuuno' mangiou niayuk ra pakiasian min ngaangai', koson mokoongoi aku po tuum saguli' ramuyun.

IBRANI 13:18

Kasalok kano pakiasi' ri Aki Kapuuno' ramon. Mangintopot akai ra bolos ru guang mai no mapasau, sabap ra mirot akai mambaal ra motopot ra ngaangai' baal.