IMAMAT 8:15 - Tanou Moonsoi Timugon

¹⁵ Simbaluyo' boo ri Musa sapi' no am alapo' sanganu raraa' no. Ra bubua' ru kalindu', pakupilo' boo ri Musa raraa' no ra sangau ru altar koson patimpokon no. Pasasaro' no suwo ru raraa' no ra tampilon ragana' ru altar. Ginio noyo ralan ri Musa napakapasau ra altar no am patimpokon no ra Tuhan.

IMAMAT 8:15 ပူးပေါင်းရင်းမြစ်များ

2 TUNUNG RU BANSA' ISRAIL 29:24

Kopongo raginio, imam-imam nanimbalui ra kambing-kambing am pasasaro' raraa' ru kambing giu' ra rasawat ru altar, koson mamuso ra tula ru ngaangai' mamagun, sabap ra nanusub noyo raja' risilo mampataak ra taak simbalui koson mapabansuk ra guang ru Tuhan am taak simbalui koson mangampun ra tula ru ngaangai' mamagun ru Israil.

YEHEZKIEL 45:20

Paat ra orou katulu', sila' raginio, musiti' kau mambaal koson raginio tayar ru osoi ayuk makatula ra kalo siningon kapoam ra kalo napandayan no. Koson raginio noyo ra akau magalung ra kapasawan ru Baloi Kuno.

DANIL 9:24

“Intulu' tulu' ngoopor ngambilor iono buoi ondo' inaru' ri Aki Kapuuno' koson mampalabus ra bansa' muno am bandar muno ondo' matulai no intor ra tula am kalaatan. Tula ampunon am katimpakan ondo' mantilayun potolorogon, maa' raginio pinaintalang am ragu inala' no totopot masauk, am maa' raginio Baloi ru Tuhan ondo' matulai patimpokon saguli'.

IMAMAT 1:11

Bibiag no musiti' simbaluyon tampilon ralayo ru altar, am raraa' ru bibiag no musiti' pawason ru imam-imam ra kaapat-apat sapapa' ru altar.

IMAMAT 1:5

Sapi' ungkuyon no musiti' simbaluyon ra giu' no niayuk, am imam-imam ra papag ri Arun musiti' mapataak ra raraa' ru sapi' no ra Tuhan, am pawason raraa' no ra kaapat-apat sapapa' ru altar ondo' pinabanta' ra kulobon ru Kim ru Tuhan.

IMAMAT 16:20

Pakapambaal i Arun ra upacara mapatulai ra Lamin Matulai Kaga', tayar ra bokon ra Kim ru Tuhan am altar, am tayar ru Tuhan, musiti' io mapataak ra kambing gawayan ra biag ondo' pinili' ra tayar ru Ajajil.

IMAMAT 3:2

Musiti' ulun no mapabanta' ra kalindu' nano ra rasawat ru ulu ru sapi' no, simbaluyon boo ginio ra saang ru kulobon ru Kim ru Tuhan. Pawason raraa' ru sapi' no ru imam-imam ra papag ri Arun ra kaapat-apat sapapa' ru altar,

IMAMAT 3:8

Musiti' io mapabanta' ra kalindu' nano ra rasawat ru ulu ru domba no am simbaluyon boo ra saang ru Kim ru Tuhan. Pawason ru imam-imam raraa' no ra kaapat-apat sapapa' ru altar,

IMAMAT 4:25

Imam ondo' mangandoi no musiti' mopososop ra bubua' ru kalindu' nano ra ralalom ru raraa' ru kambing no, pakupilon raraa' no ra sangau ra pisuk ru altar, am suwo ru raraa' no pawason boo ra tampilon ragana' ru altar.

IMAMAT 4:30

Musiti' imam no mopososop ra bubua' ru kalindu' nano ra ralalom ru raraa' ru kambing no, pakupilon raraa' no ra sangau ra pisuk ru altar, am suwo ru raraa' no pawason boo ra tampilon ragana' ru altar.

IMAMAT 4:7

Musiti' io mapaluit boo sanganu intor ra raraa' no ra sangau ra pisuk ru altar intok ru kaminyan giu' ra ralalom Kim ru Tuhan. Musiti' io mapawas ra suwo ru raraa' no ra tampilon ragana' ru altar intok panalaban ra taak, ondo' pinabanta' giu' ra saang ru kulobon ru Kim ru Tuhan.

IMAMAT 6:30

Kaa' amon ru makararaa' ru bibiag no ondo' inumpasan ralalom ru Kim ru Tuhan pinakai boo koson upacara pangampunan ra tula, kual ru bibiag no kalo maakan; bibiag no musiti' solobon.

UNTABAN 8:12

Mopongo raginio ulun ru Liwi musiti' mapabanta' ra kalindu' ra rasawat ru ulu ru karuo-ruo sapi' gawayan no; sanginan pataakon tayar ru taak simbalui koson mangampun ra tula am ondo' sanginan poyo tayar ru taak simbalui koson mapabansuk ra guang ru Tuhan. Ralalom ru upacara raginio noyo ulun ru Liwi kinapasau.

ROMA 5:10

Galing i mantutula' takau ri Aki Kapuuno', kaa' itakau pinobonsoi saguli' Riso mansail ra pinatayan ru Anak Nano. Raino, ra itakau rangan ri Aki Kapuuno', maaru' bayagon takau sabap ri Kristus maayag.

IPISUS 2:16

Sabap ri Kristus nakapangiru' ra nantulaan raginio ra pinatayan Nano ra salip. Am gitio noyo nampasimpung ra ruo bansa' ti masauk rondo' inan am nagibit risilo saguli' ri Aki Kapuuno'.

IBRANI 2:17

Ginio noyo sabap ra musiti' Io masauk ra ulun koson ra pabukat Nano ralalom ngaangai' baal. Maa' boo raginio nasauk Io ra Tingganai Maayo Imam ondo' makaasi' toojo ritakau am masalok gumagaya' ra susuban ri Aki Kapuuno'. Intor ra kandoi Nano raginio tula ru ulun ampunon boo ri Aki Kapuuno'.