IMAMAT 5:16 - Tanou Moonsoi Timugon

¹⁶ Musiti' ulun no mambayar ra atan ondo' kalo nasugut nano ragili, ruangin poyo ra ruo ngoopor piatus. Musiti' io mapataak ra bibiag no ra imam. Pataakon boo bibiag no ru imam koson ra taak simbalui koson mangampun ra tula ru ulun no, am ampunon boo ulun no ru Tuhan.

IMAMAT 5:16 ပူးပေါင်းရင်းမြစ်များ

MAZMUR 69:4

Naagui aku nampiau ra makiindangan, am bambalangan kuno maruol. Mato kuno mapari' maginaa ra pangindanganan Muno.

KAINGKUALAN 22:1

“Amon ru mantakou sasangulun ra sapi' kapoam domba, am simbaluyon kapoam talanon, musiti' aligin no sanginan sapi' ra limo ngainan sapi', am sanginan domba aligin no ra apat ngainan domba.

IMAMAT 22:14

“Amon ru sangulun ondo' sala' ka sasambaloi ru imam, am kalo singonon nangakan ra taak ondo' palilion ayuk, musiti' io mangani' saguli' ra imam no ra ondo' nogondo' suang no, ruangin poyo ra ruo ngoopor piatus.

IMAMAT 27:13

Amon ru makaguang ulun no mamuli' ra bibiag no, musiti' io mambayar ra logo no ruangin ruo ngoopor piatus.

IMAMAT 27:15

Amon ru makaguang ulun no mamuli' ra baloi nano, musiti' io mambayar ra logo no ruangin ra ruo ngoopor piatus.

IMAMAT 27:27

Kaa' anak kasaa' ru bibiag majamol mapuli' sumugut ra logo ondo' inaru' giu' ra Kim ru Tuhan, ruangin ra ruo ngoopor piatus. Amon ru kalo pulion, matalan bibiag no ra ulun bokon sumugut ra logo ondo' inaru' giu' ra Kim ru Tuhan.

IMAMAT 27:31

Amon ru makaguang sasangulun mamuli' ra santayaran intor ra ampos no, musiti' pulion no sumugut ra logo ondo' inaru' giu' ra Kim ru Tuhan, ruangin ra ruo ngoopor piatus.

IMAMAT 4:20

Baal pinamakuan no ra sapi' no nogondo' koson ra pinamakuan no ra sapi' gawayan tayar ru taak simbalui koson mangampun ra tula. Koson ragitio noyo Tingganai Maayo Imam no mapataak ra taak simbalui tayar ru tula ru ngaangai' ulun, am ampunon ilo boo ru Tuhan.

IMAMAT 4:26

Musiti' io monolob ra ngaangai' lomok ru kambing no giu' ra rasawat ru altar, koson ra io monolob ra lomok ru bibiag ondo' simbaluyon tayar ru taak simbalui koson makibarakat ra Tuhan. Koon raginio ralan ru imam mapataak ra taak simbalui koson mangampun ra tula ru sangulun tingganai, am ampunon boo tingganai no ru Tuhan.

IMAMAT 5:10

Kopongo raginio mapataak boo imam no ra sanginan poyo ra susuit no koson taak simbalui koson mapabansuk ra guang ru Tuhan, sumugut ra aturan. Koon raginio noyo mapataak imam no ra taak simbalui koson mangampun ra tula ru ulun no, maa' raginio ampunon boo ulun no ru Tuhan.

IMAMAT 5:13

Koson raginio noyo imam no mapataak ra taak simbalui koson mangampun ra tula ru ulun no, am ampunon boo ulun no ru Tuhan. Suwo ru tapung no imam noyo tatangan, koson ra taak simbalui koson paringkuanangan ra Tuhan.

IMAMAT 5:6

Koson ra ukuman ru tula nano, musiti' ulun no mapataak ra Tuhan ra sanginan domba ruandu' kapoam kambing ruandu'. Musiti' imam mapataak ra taak simbalui no koson mangampun ra tula ru ulun no.

IMAMAT 7:2

Bibiag ru taak simbalui ragitio musiti' simbaluyon giu' ra tampilon ralayo ru altar, intok manimbalui ra bibiag tayar ru taak simbalui koson mapabansuk ra guang ru Tuhan, am raraa' no musiti' pawason ra kaapat-apat sapapa' ru altar no.

UNTABAN 5:7

ulun no musiti' mangiou ra tula nano am mambayar ra kalubatan ra koyoon, ruangin ra ruo ngoopor piatus ra ulun ondo' nalubatan no.

UNTABAN 5:8

Kaa' amon ru ulun ra nalubatan no minatoi noyo am kolondo' pabukat ra mamaar ondo' mangapu ra bayaran ru kalubatan, bayaran no musiti' pataakon ra Tuhan am masauk ra imam tatangan. Pambayaran ra kalubatan no iono paruangon ra domba gawayan ondo' maindalom pataakon ra tayar ru upacara pamasawan ra ulun makasala.

LUKAS 19:8

Kaa' bigor i Jakius am indagu ri Jisus, “Tuan, rongogo', sampiruo intor ra rapu' kuno tatayaron ku ra ulun musikin, am ondo' rinuung kuli pana, pasagulion ku poyo saboi inggapat suang no!”

RINALATAN 26:20

Ginio ra mambala' aku toojo ra ulun ra musiti' ilo tumalikur intor ra tula nilo am sumaguli' ri Aki Kapuuno', am niayuk maayag ra matanda'. Giu' ra Damsyik galing nambalaan kuno raginio, giu' poyo ra Jirusalim am niayuk ngaangai' ru Judia am poyo intok ru ulun sala' ka Jaudi.

1 SAMUIL 6:3

Taam ilo, “Pai' min pasagulio' Kaban Nabantuan ri Aki Kapuuno' ru Israil no ra kolondo' paayaan ra atan pana taak ra tayar Riso no. Moonsoi Kaban no bayain ra taak ru tayar ra mamuso ra tula takau. Koon raginio noyo ra akau babason, am makapandai kau boo ra sasaban ri Aki Kapuuno' no mararayus mangukum ramuyun.”