IMAMAT 15:27 - Tanou Moonsoi Timugon

²⁷ Majamol osoi ayuk ondo' mangambong ra kuliamos no am musiti' mampupu' ra bayang nano am mariu'; magulayun ulun no majamol saboi tumolop mato ru orou.

IMAMAT 15:27 ပူးပေါင်းရင်းမြစ်များ

YEHEZKIEL 36:25

Takisin Takamin ra timug mapasau, am mampapasau ramuyun intor ra ngaangai' sinungkalalaing min am ngaangai' no ondo' nampajamol ramuyun.

YEHEZKIEL 36:29

Palabuson Takamin intor ra ngaangai' ondo' mampajamol ramuyun. Susubon Ku gandum maa' raginio tumuu' ra malabung saboi kalo boo makaili' kau ra bitilan.

IMAMAT 11:24

Sasangulun ondo' mangambong ra baangkai ru bibiag ragitio majamol saboi ra tumolop mato ru orou: Ngaangai' bibiag ra makasalindu, ondo' ayuk am ondo' makajajampang am ondo' manapa' ra akanon ra kainduo no, am ngaangai' bibiag ondo' apat kalayam am ondo' makasalindu kumayus. Osoi ondo' magibit ra baangkai salinut ru gitio musiti' mampupu' ra bayang nano, kaa' io magulayun majamol saboi tumolop mato ru orou.

IMAMAT 15:13

Kopongo ungkuyon no mapali', musiti' io maginaa io saboi katuluan, am mampupu' ra bayang nano am mariu' ra timug intor ra taur ru timug, am io pana mapasau.

IMAMAT 15:21

Osoi ayuk mangambong ra katil ru ruandu' no kapoam atan ayuk ondo' naturungan no noyo, musiti' pupuin ru ulun bayang nano am niayuk mariu', am magulayun io majamol saboi tumolop mato ru orou.

IMAMAT 15:26

Moonong intok kaalangan nano, kapoam atan ayuk ondo' turungin nano paat raginio pana majamol.

IMAMAT 15:28

Mataru' kasarungan no, musiti' ruandu' no maginaa buoi katuluan, am io pana mapasau.

JAKARIA 13:1

Mindagu Tuhan Ondo' Maayo Kaga' Kuasa', “Paat raginio ra tauli no, rondo' taur ru timug sumalula' koson mamasau ra papag ri Daut am mamagun ru Jirusalim intor ra tula am sumamba ra sinungkalalaing ondo' binaal nilo.

UNTABAN 19:22

Atan ayuk ondo' kinambong ru sangulun ondo' majamol masauk ra majamol, am ulun bokon ondo' nangambong no niayuk masauk ra majamol saboi tumolop mato ru orou.

IBRANI 10:22

Intor raginio, pagindagu takau no ri Aki Kapuuno' mabaya' ra guang mabanis am pangintapatan maikang; mabaya' ra guang kolondo' sala am pampariwan ondo' mampakito ra itakau mapasau noyo.

IBRANI 9:14

Mulu' poyo raraa' ri Kristus ondo' makapamasau ra tula ru ulun. Sabap ra mansail ra Ambiluo mantilayun, i Kristus nampataak ra painawo Nano ri Aki Kapuuno' koson ra taak simbalui ondo' kolondo' sala. Am sabap ra raraa' Nano pinasasar, mampaintopot i Aki Kapuuno' ritakau ra kalo boo makasala takau intor ra binaal takau ra kolondo' onong i, maa' raginio makapangandoi takau ri Aki Kapuuno' ondo' maayag.

1 JUANIS 1:7

Kaa' amon ru maayag takau ralalom ru binusasal ru sinda, koson ri Aki Kapuuno' soroi ralalom ru binusasal no, moonsoi kaayagan takau ra rondo' am bokon. Am sabap ra raraa' ri Jisus, Anak Nano, pinasasar, mampakapasau Io ritakau intor ra ngaangai' tula.