GOSIA 8:8 - Tanou Moonsoi Timugon

⁸ Ulun ru Israil nasauk noyo koson ra bansa'-bansa' ra bokon ondo' kolondo' boo onong, koson ra pagangan ondo' napilang.

GOSIA 8:8 ပူးပေါင်းရင်းမြစ်များ

2 RAJA'-RAJA' 18:11

Kopongo raginio raja' ru Asyur nagibit ra ulun ru Israil minongoi ra Asyur koson ra ulun rinakop, am pinaayan santayaran intor risilo giu' ra bandar Galag, santayaran giu' ra kiing ru Sungoi Gabor giu' ra libung Gojan, am santayaran poyo giu' ra bandar-bandar ru pagun Madai.

JISAYA 30:14

Matutuk kau koson ra pagangan tana', am natutuk kaga' saboi kolondo' tayar mapakai koson pangalapan ra baa, kapoam susuuk panunuuk ra timug intor ra rarapu'.”

JIRIMIA 22:28

Aku, i Jirimia mindagu, “Koson kia Raja' Joyakin ra pagangan napilang ondo' pinatiran am kalo boo kasagain? Ginio kia sabap no ra io am anak-anak nano pinagiru' am pinatiran ra pagun ondo' kalo natutunan nilo?”

JIRIMIA 25:34

Pantangi' no, tingganai kau, akau ondo' nasauk ra magagalung ra ulun Kuno, pantangi' no ra mosongou! Panulaboi no am pagiluluir ra kaau, sabap ra nasaboi noyo paat no ra akau potoyon; simbaluyon kau koson ra domba gawayan.

JIRIMIA 48:38

Giu' ra rasawat ru taap ru baloi am giu' ra ngaangai' padang giu' ra Moab kolondo' morongog atan-atan pana ondo' ak am sinulaboi, sabap ra tinutuk Ku noyo Moab koson ra rarapu' ondo' kalo kasagain ru ulun.

JIRIMIA 50:17

Indagu Tuhan, “Ulun ru Israil koson ra sampanon ru domba ondo' inilou am pinantutuliar ru singa'. Binulunsar ilo galing ru raja' ru Asyur, kalupus raginio Raja' Nibukadnijar intor ra Babilonia, mangaliit ra bungul nilo.

JIRIMIA 51:34

Raja' ru Babilonia nongolot-ngolot noyo ra Jirusalim am inakan-akan no. Sinaliir no bandar no koson ra ulun nanaliir ra rarapu'. Koson ra tambuakal, tinolon no bandar no. Inalap no atan ayuk kasagaan nano, am ondo' bokon no patirin no.

SULABOI 2:16

Ngaangai' ru pantula' muno mangiis rirun am magilong rirun ra masisang. Manjabiu bibil nilo liliwa' magasab, “Pinuso mai noyo okou! Gitio noyo orou ondo' inaanin mai!”

SULABOI 2:2

Pinuso ru Tuhan ngaangai' kampung giu' ra Jiuda ra kolondo' guang makaasi', linunsai No kubu-kubu ondo' nasauk ra pangampin ru pagun. Nanauyu' Io ra pamarintaan am ulun nanguasa' nano.

SULABOI 2:5

Koson ra pantula', namuso noyo Tuhan ra Israil; namuso Io ra ngaangai' kubu am istana nano. Namparuang Io ra kangilukan ru mamagun ru Jiuda.

SULABOI 4:2

Ragili kamulakan ungkuyon ru bandar Sion koson ra mas ondo' mokologo, kaa' raino pinamakuan risilo koson ra rarapu' tembikar.

SULABOI 5:2

Rapu' tungkuson mai ginaau ru ulun ra bokon; ulun bansa' ra bokon tatanga' mayan ra baloi mai.

YEHEZKIEL 36:3

“Panala' no am potonowo' noyo atan ondo' paraguon Kuno, Tuhan Raja'. Paat ra bansa'-bansa' paginggaar mangala am mantakou ra kagunungan ru Israil, ilo ngaangai' magasab ra Israil.

IMAMAT 26:33

Porotongon Ku pangayawan giu' ra pagun mino, am mantutuliar kau giu' ra pagun ru ulun bokon. Makai' kalunsai bandar mino am mokoloso pagun mino.

ROMA 9:22

Mogondo' niayuk ra atan ondo' binaal ri Aki Kapuuno'. Masaga' Io mampakito ra sangit am kuasa' Nano, kaa' mataan Io risilo ondo' sotopot no sama' sangitin am luuson Nano.

SAGULION 28:25

“Tuhan mopoloso ramuyun kalaan ru pantula'. Mangatang kau ra bulunsar ra pantula', kaa' pantuliar boo ra magiru'. Ngaangai' bansa' ra tana' ti malaa' magilong ra sauk ondo' makalumpa' ramuyun.

SAGULION 28:64

Pantutuliaron kau ru Tuhan ra gino ngai' ru bansa'-bansa' ra titikop ru tana' ti. Giu' no mangandoi kau ra tuhan-tuhan ondo' binaal intor ra tataun am batu, tuhan-tuhan ondo' kalo igondo' kau samba kapoam sinamba ru kinamatuaan min.