GOSIA 2:18 - Tanou Moonsoi Timugon

¹⁸ Okou Israil, saukon Tokou ra andu' Kuno; mabanis guang Kuno am gumagaya'; pakitonon Ku togom am makaasi' rirun, am niayuk saukon kou ra longgom Kuno ra sabuoi-buoi no.

GOSIA 2:18 ပူးပေါင်းရင်းမြစ်များ

AYUP 5:22

Paat ra kapukaan am bitilan lumumpa', maikang kou am makakurit poyo boo. Kalo malaa' am magalabo kou makauma' ra bibiag masigo ondo' masangit.

AYUP 5:23

Umo ondo' raduon muno kolondo' batu, am bibiag masigo kalo mamulunsar rirun.

MAZMUR 148:10

ngaangai' bibiag ra makaup am masigo, ondo' maayo kapoam boborok, am niayuk susuit.

MAZMUR 23:2

Pinaluya' No aku ra tana' limayak ondo' makasakot malabung am mangitang raki' ra sungoi maliuk.

MAZMUR 46:9

Ibok, ilai' ga atan ondo' binaal ru Tuhan. Ilai' ga, binaal ri Aki Kapuuno' ra tana' ti makaimuag kaga'.

JISAYA 2:11

Masaboi orou ra limbau ru ulun liomon am minsawat guang ru ulun pusoon. Bagu no Tuhan ayuk omporon.

JISAYA 2:17

Limbau ru ulun liomon No, am minsawat guang ru ulun pusoon No. Ngaangai' sinungkalalaing liomon No saboi mapuso, am Tuhan ayuk omporon ra orou raginio.

JISAYA 2:4

Akimin No ngaangai' bansa' am manalasai ra pansasangaran nilono. Ilang nilo saukon ra radu', am tanggulan saukon ra pais pamutul. Ngaangai' bansa' kalo boo mangayou am kalo boo tumampos mongoi pamulunsar.

JISAYA 26:1

Masuku' bulintok no rimbayon ru ulun rimbai ragitio giu' ra tana' Jiuda: Bandar takau ti maikang! I Aki Kapuuno' mangampin ra timbok Nano!

JISAYA 32:18

Ulun ri Aki Kapuuno' kalo pana boo maimamang, am baloi nilono kalinuos ayuk am makakaansayan,

JISAYA 54:5

Namangun rirun no koson ra ralaki muno, i Aki Kapuuno' matulai ru Israil ioginio mamamayag rirun. Tuhan Ondo' Maayo Kaga' Kuasa', ginio noyo inggalan Nano, Io Aki Kapuuno' mangunguasa' ra titikop ru tana' ti.

JISAYA 65:25

Taani am anak domba masisimpung mangakan, singa' mangakan ra rami koson ra sapi', am kukuo kalo boo makakalalaa'. Giu' ra Sion, bulur Kuno ra matulai, kolondo' boo makalalaa', kapoam malaat.”

JIRIMIA 23:6

Paat ra io masauk ra raja', ulun ru Jiuda maayag, am ulun ru Israil maayag ra moonsoi. Raja' no sabiton ra ‘Tuhan Mamamayag Ritakau’.

JIRIMIA 30:10

Ulun Ku ngai', pai' kalaa'! Ulun kau ru Israil, pai' ponontol! Bayagon Takamin intor ra pagun ondo' maalur, intor ra pagun intok min rinakop ru pantula'. Muli' kau ra pagun min am maayag ra kaansayan. Maayag kau, am kolondo' ulun mampakalalaa' ramuyun.

JIRIMIA 33:16

Mamagun ru Jiuda am Jirusalim bayagon, am maayag ilo ra mamimio. Bandar no inggalanin ra ‘Tuhan Mamamayag Ritakau’.

YEHEZKIEL 34:25

Makimabantu' Aku risilo ondo' makapamayag risilo. Unjawon Ku ngaangai' bibiag masigo intor ra pagun no, maa' raginio domba-domba Kuno maayag ra matanda' giu' ra padang am mombolong giu' ra kataunan.

YEHEZKIEL 39:1

Indagu Tuhan Raja', “Okou ulun mapandai matoi, ulaso' i Gog, ulun manguasa' kasaa' ru pagun Misik am Tubal, am balai' ilo ra Aku ti pantula' nano.

JAKARIA 14:4

Paat raginio, migor Io giu' ra Bulur Jaitun giu' ra tampilon sirangon ru Jirusalim. Kopongo raginio Bulur Jaitun malapak kapiruo ru limayak ondo' malangka', tumalimpuun intor ra sirangon saboi ra kalasaan. Sampiruo ra bulur no minsir mongoi ra tampilon ralayo am sampiruo poyo mongoi ra tampilon rabugus.

JAKARIA 14:9

Tuhan pana masauk boo ra raja' ru titikop ru tana' ti. Moonong ulun sumamba Riso koson ri Aki Kapuuno' am makaulig Riso ra nogondo' inggalan.

JAKARIA 2:11

Paat raginio masuang bansa' matong ra Tuhan koson masauk ra ulun Nano. Mayan io ra tatanga' min, am makapandai kau boo ra Tuhan nanusub noyo raki' mongoi ramuyun.

JAKARIA 3:10

Paat orou raginio masaboi, moonong ulun mangkimait ra pasambalayan nano matong am sumia' ra kaansayan am kinamio giu' ra tatanga' ru umo ru anggur am puun ru ara min.”

JAKARIA 9:10

Indagu Tuhan, “Patirin Ku kurita' kuda intor ra Israil, am niayuk kuda giu' ra Jirusalim; busur ondo' pinakai ralalom pangayawan pusoon. Raja' min makimobonsoi ra gino ngai' ru bansa'; pamarintaan nano malangka' intor ra raat saboi ra raat, intor ra Sungoi Iprat saboi ra pompor ru tana' ti.”