DANIL 5:23 - Tanou Moonsoi Timugon

²³ Minanggal kou ra Tuhan panguasa' giu' ra suruga'. Pinakai mu mangkuk-mangkuk ondo' inalap intor ra Baloi ru Tuhan. Okou raja', ulun mangaatang muno, ngaangai' andu' am ruandu' parulug muno nanginum noyo ra wain intor ra mangkuk-mangkuk no, am niayuk nongompor ra dewa-dewa ondo' binaal intor ra mas, pirok, gangsa', basi', tataun am batu – dewa-dewa ondo' kalo makakito, kapoam mokorongog, kapoam makapandai ra atan-atan. Kalo nangurumat kou ri Aki Kapuuno' ondo' makakuasa' mangaru' ra okou no maayag kapoam matoi, am ondo' nanguasa' ra ngaangai' binaal muno.

DANIL 5:23 ပူးပေါင်းရင်းမြစ်များ

KASAUKAN 14:19

Nambarakat io ri Abram, kono, “Gama' ru i Aki Kapuuno' Ondo' Masawat Kaga' no, ondo' napasauk ra limbowon am tana' ti mambarakat ri Abram!

KASAUKAN 2:7

Alap boo Tuhan i Aki Kapuuno' ra sanganu tana' am pambaal Io ra ulun am sampuyo' boo ra painawo ondo' mapakaayag ralalom luang ru arung no; am ulun no maayag boo.

2 RAJA'-RAJA' 14:10

Okou Raja' Amajia, malupus nangala ra ulun ru Idom, Raja' Amajia nasauk ra malilimbau! Mamanggo ra kamanangan raino am porondon no ra baloi. Kua paguguyum ra panguyatan ondo' pupus no maparatong ra karaat ra inan ru Raja' Amajia am mamagun?”

AYUP 12:10

I Aki Kapuuno' makakuasa' ra kaayagan ru ilo ondo' maayag inangun Nano; painawo ru moonong ulun ralalom kalindu' ri Aki Kapuuno'.

AYUP 31:4

Nakapandai i Aki Kapuuno' ra ngaangai' binaal kuno; Makakito Io ra moonong tumpang kuno.

MAZMUR 104:29

Bulintok ra okou manululit, ilo ondo' maayag ra binangun Muno malaa'; amon sagulion Mu paminawo Muno, ngaangai' no mapuso, am sumaguli' ra tana', masauk saguli' ra kaau.

MAZMUR 115:16

Suruga' iono longgom ru Tuhan ayuk, kaa' tana' ti pinataak No ra ulun.

MAZMUR 139:3

Magilong Kou raki', bulintok ra aku mangandoi kapoam tumangus; napandayan Mu ngaangai' binaal kuno.

MAZMUR 146:4

Bulintok ra ilo matoi sumaguli' ilo ra tana'; paat orou raginio ngaangai' inatang nilono mapuso.

AMSAL 20:24

Ralan kaayagan ru ulun inaru' ru Tuhan; ginio sabap ra ulun kalo makarati' ra ralan kaayagan nilo.

JISAYA 13:11

Mindagu Tuhan, “Ukumin Ku tana' ti sabap ra kalaatan nano, am ngaangai' ulun sabap ra tula nilo. Paingganaan Ku moonong ulun malilimbau, am mangukum ra moonong ulun ondo' masawat guang am niayuk malaat kaga'.

JISAYA 14:13

Gumogot kou magaloi ra limbowon am mapauli ra panturungan muno ra rasawat ru butitin-butitin ondo' masawat kaga'. Pangkaraan muno makaturung kou koson ra raja' ra rasawat ru gunung giu' ra ralayo, intok timungan ru dewa-dewa.

JISAYA 2:12

Orou raginio Tuhan Ondo' Maayo Kaga' Kuasa' mapainggana' ra ngaangai' ulun ondo' minsawat guang, am mangukum ra ngaangai' ulun malilimbau.

JISAYA 33:10

Tuhan mindagu ra bansa'-bansa' no, “Ragino mimbuor Aku. Patalangon Ku kinaayo ru kuasa' Kuno.

JISAYA 37:19

am niayuk nonolob ra dewa-dewa nilono. Kaa' dewa-dewa no totopot kolondo' boo kuasa' sabap iono sinungkalalaing intor ra tataun am batu ondo' binaal ru ulun.

JISAYA 37:23

Osoi kia inulas am inasaban muno? Paliso muno lumimbau Raki', i Aki Kapuuno' ru Israil, i Aki Kapuuno' ondo' matulai.

JISAYA 42:5

Tuhan i Aki Kapuuno' namangun am napabingkal ra limbowon; binangun No tana' am niayuk nansalinut naayag ra rasawat nano; Manaak io ra painawo ra ulun. Ragino i Aki Kapuuno' mindagu ra ulipon Nano,

JIRIMIA 10:23

Iou Tuhan, makapandai aku ra kolondo' sangulun pana makakuasa' ra kaayagan nano; kolondo' sangulun pana mangaru' ra kiralan ru kaayagan nano.

JIRIMIA 48:26

Indagu Tuhan, “Liminimbau Moab Raki', ginio ra gaukon io. Magiluluir Moab ra ralalom ru lua' nano galama', am kuritin boo ru ulun.

JIRIMIA 50:28

Ulun nagigiru' intor ra Babilonia am minatong ra Jirusalim; tinunung nilo ati kulaan ra Tuhan, i Aki Kapuuno' takau nambalos ra binaal ru ulun Babilonia ra Baloi ru Tuhan.)

JIRIMIA 50:29

“Susubo' pulalai mamanah mamulunsar ra Babil. Susubo' moonong ulun ondo' mapandai mamakai ra busur am panah. Pagawangi' bandar no am pai' polosoo' sangulun pana makapagiru'. Balasi' ngaangai' binaal ru Babil; baalo' Babil koson ra ati kulaan pinamakuan ru Babil ra ulun bokon, sabap ra Babil liminimbau Raki', Ondo' Matulai Kaga', i Aki Kapuuno' ru Israil.

YEHEZKIEL 28:17

Malilimbau kou sabap ra bulos muno maindon, am mambaal kou ra sasambungon sabap ra nauligan kou kaga'. Ginio noyo sabap ra pinampasan Tokou ra tana', am nampasauk rirun koson ra pampakaraan ra raja'-raja' ra bokon.

YEHEZKIEL 28:2

“Okou ulun mapandai matoi, posoboyo' atan ondo' paraguon Kuno, Tuhan Raja' ra raja' ru Tirus, ‘Malilimbau kou am mangkara' ra inan muno dewa ondo' nanturung giu' ra tatanga' ru raat. Tumilu kou koson ra dewa, ondo' sotopot no ulun kou ayuk ondo' mapandai matoi!

YEHEZKIEL 28:5

Mapandai kou mantalan am magail maulian. Lumimbau kou sabap ra kalangkayaan muno!’

YEHEZKIEL 31:10

“Ginio ra Aku, Tuhan Raja' mambala' ramuyun atan ondo' masauk ra puun tataun ondo' untu nano nakasaboi ra gaun. Gumaai sawat nano, gumaai limbau ru puun tataun no.

DANIL 11:12

Raja' ru Misir lumimbau sabap ra kamanangan nano, am sabap ra masuang saujor ondo' pinatoi nano, kaa' kalo marayus io mamanang.

DANIL 4:37

“Raino aku, i Nibukadnijar, mongompor, mangurumat am mampatulai ra Raja' panguasa' giu' ra suruga'. Ngaangai' binaal Nano motopot am matimpok. Masaga' io mapainggana' ra osoi ayuk ondo' lumimbau.”

DANIL 8:11

Sangau boborok no baani kaga' manggal ra Panglima ru saujor-saujor ru suruga', nopolonggo' ra taak simbalui orou-orou ondo' pataakon ra Panglima no, am nampajamol ra Baloi ru Tuhan.

ABAKUK 2:4

Gitio noyo tanou no: ‘Ulun ondo' nambaal ra kalaatan pusoon, kaa' ulun ondo' nambaal ra kasagaan ri Aki Kapuuno' maayag sabap ra gumagaya' ilo ri Aki Kapuuno'.’ ”

RINALATAN 17:25

Mokoondo' Io no ngaangai' am kalo pana indanganon ru ulun. Kaa' Io ondo' nangani' ra ngaangai' ulun ra painawo am kaayagan am atan-atan ayuk.

1 KORINTUS 8:4

Ondo' pangkuatan min ra mangakan ra akanon ondo' pinairang ra sinungkalalaing: Makapandai takau raginilo sotopot no binaal ayuk ru ulun, sabap ra kolondo' tuhan ra bokon. Nakapandai takau niayuk ra rorondo' ayuk i Aki Kapuuno', am kolondo' boo bokon.

1 TIMOTIUS 3:6

Musiti' io ti poyo sala' ka bagu ayuk siminauk ra Kristian, sabap ra maagu minsawat lair guang nati am ulason io mogondo' ra Tingganai ru riwato ra galing i.

IBRANI 4:13

Kolondo' atan-atan inangun ri Aki Kapuuno' makasibuni intor Riso, sabap ra ngaangai' maukab am makito Nano. Am ri Aki Kapuuno' niayuk musiti' takau mangakun ra ngaangai' ondo' binaal takau.

PINAINTALANG 9:20

Kaa' ulun-ulun ra bokon ondo' kalo napatoi ra talu kapaganan malaat no, kalo niayuk timinalikur intor ra ondo' binaal ru kalindu' nilo galama'. Kalo liminonggo' ilo sumamba ra riwato am sinungkalalaing ondo' binaal nilo ra mas, pirok, gangsa', batu am tataun. Ginilo kalo makakito, mokorongog kapoam makaugar.

TINGGANAI RU BANSA' 16:23

Paat ra sangarawan, natitimung raja'-raja' ru Palistin koson munsag am mapataak ra taak simbalui ra maayo ri Dagon, dewa nilo. Kon ru raja'-raja' no, “Nangani' noyo dewa takau ra kamanangan ritakau ri Simson, pantula' takau!”

1 SAMUIL 17:26

Nangkuot i Daut ra saujor ondo' soroi ra mamaar riso, “Atan kia ondo' taakin ra ulun ondo' makapamatoi ra ulun ru Palistin no am mapalabus ra Israil intor ra pagasaban? Makakau' kaga' ulun ru Palistin no, ulun ondo' kalo makaulig ri Aki Kapuuno', manggal ra saujor ri Aki Kapuuno' ondo' naayag!”

1 SAMUIL 17:36

Namatoi aku noyo ra singa' am baawang, am ulun ru Palistin ondo' kalo nakaulig ri Aki Kapuuno' no, niayuk nogondo' pamakuan kuno koson ra bibiag raginio, sabap ra makakau' io manggal ra saujor ri Aki Kapuuno' ondo' naayag.