Makapandai aku ra ngaangai' ondo' binaal ri Aki Kapuuno' ti mantilayun. Ulun kalo makapamparuang kapoam mangiruru' raginio. Nambaal i Aki Kapuuno' koon raginio maa' raginio urumaton takau Io.
Intor ra talimpuun pabalaan Ku baal ra orou matong, intor ra galing i maguang Ku atan kasaukan. Ragu Ku: Pamatasan Kuno maaru' masauk, kasagaan Kuno musiti' Ku baalon!
Piawon Ku sangulun mangunguasa' intor ra sirangon; matong io koson ra sanginan susuit kanui koson mapaugar ra pamatasan Kuno. Atan paraguon Kuno musiti' Ku baalon, atan ondo' inatang Kuno musiti' Ku baalon.
Ulun ra tana' ti kolondo' arati' Riso; malaikat giu' ra suruga' am ulun ra tana' ti, ngaangai' ragana' ru kuasa' Nano. Kolondo' osoi pana makaanggal ra kasagaan Nano, kapoam mangkuot ra binaal Nano.
Raino makamangkuot lair raki', “Amon ru koson ragino kua guat lakat ayuk poyo mampasala i Aki Kapuuno' ra ulun? Sabap ra kolondo' sangulun pana makaanggal ra kasagaan ri Aki Kapuuno'.”
Ngaangai' taak ra moonsoi am kolondo' sala, intor noyo ra suruga'; ioginio intor ri Aki Kapuuno' ondo' nampasauk ra ngaangai' sinda ru limbowon. Io ti kalo noyo makulau koson ra babara' ondo' kalo rumoro'.